ابن القارئ والمبتهل عبد السميع بيومى أمين الترزى: إمام اتعلم على إيد أبويا لكن عمره ما لحن له من الباطن أبويا امتداد لمدرسة الشيخ على محمود عاصر الملك وكان له وضعه فى الإذاعة أمين الترزى: إمام اتعلم على إيد سمع الشيخ «إمام » وضمه للبطانة وخلاه ملازمه فى كل حاجة قبل ما يموت «إمام» بيوم لف فى المنطقة كأنه بيودّعها أخويا كامل فضل يراعيه لآخر يوم فى حياته ودفناه فى مقابرنا زى ما طلب
في كل سيرة كبيرة، هناك دائما البسطاء الذين لا يظهرون في الكتب ولا تلتقطهم عدسات الكاميرات، مع إن شهادتهم غالبا ما تكون الأصدق، لأنها تخلو من التجميل، من هؤلاء عم أمين الترزى، ابن الشيخ عبد السميع بيومى الذى تبنى الشيخ إمام فى بداياته، وشقيق كامل الترزي الذي راعي الشيخ إمام في آخر أيامه.
حين سجلنا هذه الشهادة في 2012، كان عم أمين في السبعين، لا أعرف إن كان الله أمد فى عمره للآن أم لا ؟، لكنني مازلت أشم رائحة حارة "حوش قدم" كلما صادفتني صورته، تلك الحارة التي وصفها أحمد فؤاد نجم في إحدى قصائده بأنها "مجارى وناموس / مراية وفانوس /دقون ع الكروش / عرق ع القروش / شقوق فى البيوت بيوت في الشقوق / مساءً تموت / صباحا تفوق".
في هذه الشهادة، يكشف عم أمين، عن مسيرة الشيخ إمام، قبل أن يلتقى نجم ويتحول إلى "صوت للثورة"، عن إنسان بسيط يعيش في حارة شعبية، يتحول إلى تلميذ مجتهد في بطانة الشيخ عبد السميع بيومي قبل يشق طريقه فى عالم التلحين والغناء والسياسة والاعتقال، كما يكشف حكايات عن رحيله قد لا يعرفها كثيرون.
امين هو الشيخ عبد السميع بيومي؟
والدى، كان مقرنا للقرآن في الإذاعة ومبتهلا ويقول تواشيح من أيام الملك والسرايا، وهو خليفة الشيخ على محمود وكانوا بيقولوا إن نبرة صوته واخدها عن والده الشيخ بيومى عیسی یعنی وراثه والشيخ عبد السميع كان له صيت جامد وكان بيطلبوه في البلاد العربية عشان يحى ليالي قرآن، وكان يقرأ على الدكة على الهواء مباشرة في جامع الأزهر أو الحسين، وكان له مكانته في الإذاعة.
وكان عنده بطانة طبعا ؟
كان عنده بطانة خد فيها الشيخ إمام ضمن التبيعة إللى بيقولوا وراه، وكان معجبا بصوت وأداء الشيخ إمام فزاد أهمية عنده، علمه، كان بيرسيه على النوتة، وخلاه ملازمه في كل كبيرة وصغيرة، لحد ما الشيخ إمام خد وضعه وبقى يقول حاجات لوحده وبقى له مكانة كويسة في المجتمع، وفضلت العلاقة مستمرة بينا بعد وفاة والدى، كان الشيخ إمام يجى يقعد عند أخويا كامل في المحل بتاعه، وأخويا كان ملازمه بيطلع يصحيه من النوم وبيجيبله الفطار وأى شيء يعوزه، وأنا كنت بحبه جدا لأنه من ريحة والدى، ولما كنت باشوفه كأني شوفت أبويا.
كانوا بيعملوا إيه في البطانة ؟
كانوا بيعملوا بروفات قبل ما يروحوا التأدية بتاعتهم الشيخ يقول والتبيعة يردوا وراه، كان أبويا الله يرحمه يوعى المشايخ، لا خلى صوتك كذا، إعمل كذا يعملوا بروفة مرة واثنين وعشرة لحد ميعاد الحفلة، والحفلات كانت على الهوا مافيش تسجيل ولا حاجة.
كان بيعزف الشيخ عبد السميع بيومى آلة معينة ؟
كان بيعزف عود، وكان ملما بالنغمات والمقامات، لأن عاشر ناس متسيطة من زمان أمثال الشيخ على محمود.
مين أشهر ناس كانت في بطانته أو بتتردد عليها ؟
إحنا كنا واخدين شقة كبيرة 5 مطارح في ۱۲ عاطفة الذهبى حارة الروم، كان بيجي الشيخ محمد الفيومي من الحسين وكان كفيف من عمر والدى وصوته كان جميلا وكان بيجي الشيخ زكريا أحمد والشيخ درويش الحريري والشيخ محمد إسماعيل وأنا كنت أوقات بأوصل الشيخ إسماعيل لأنه كان ضرير برضه، وكان بيلحن حاجات وبياخد أتعابه، كنت تسمع "سامر جميل". في كل حته يلاحقك، ولما سيبنا حارة الروم وجينا حوش قدم في بيت ملكنا اتعرف عليه الشيخ إمام، صوته عجب والدي بدأ يعلمه الطبقة دى عالية دى واطية، ومكنش فيه كبر في أي حاجة إنت تديني معلومة وأنا أديك معلومة مش عيب.
مين إللى كان يسمع الناس دى ؟
المحبون للشيخ عبد السميع ناس بتفهم في الفن، وتلاقى حد طلع يقول: لا يا عم الشيخ دى كانت عايزه شوية هنا تبقى حلوة، وكانت الناس الكبيرة بتقبل الكلام كان فيه محبة وأخوية وصفاء قلب.
لحن الشيخ إمام تواشيح للشيخ عبد السميع ؟
أبويا هو إللى كان بيلحن، ماكنش فيه حد بيلحن له حاجة، يكون في علمك الراجل إللى واخدها من الصغر بيبقى عنده كفاءة، وهو عاشر ناس قدام وشاف أيه الصح وشاف أيه الغلط.
ابس فيه ناس بتقول إن الشيخ إمام عمل للشيخ عبد السميع الحانا من الباطن؟
محصلش، إسألني أنا، انا عندى ٧٠ سنة جرى هذا الحوار في (۲۰۱۲)، وأعرف الشيخ إمام من أيام ما كان راجل بسيط ولا كان فيه نجم ولا محمد على ولا الناس دى كلها، أنا عشت معاهم، وعمرى ما سمعت حاجة زي كده
الشيخ عبد السميع توفى سنة كام؟
توفى سنة ٨٠ أو ۷۹، حتى كان جالنا عزا من رئاسة الجمهورية والرئيس السادات الله يرحمه.
ا ولحد وفاته، كان الشيخ إمام على علاقة بيه ؟
لا، الشيخ إمام شق طريقه وبقى مستقل بذاته اتعرف على أحمد فؤاد نجم ومحمد على، وكانوا بيناموا مع بعض الأستاذ أحمد فؤاد يكتب والشيخ إمام يلحن، ويقولوا حاجات مع بعض.
أيه أهم الحاجات إللى لحنها وعملها الشيخ عبد السميع بيومي؟
حاجات كتير أنا مش متذكرها، بس بتيجى في محطة القرآن الكريم لحد النهاردة، وأما تسمع شغله تقول الكلام ده تقيل فيه لحن وفيه نغم.
أنت شوفت الشيخ إمام وهو لسه جای حوش قدم، كان شكله إزاى بالجبة والقفطان ولا البنطلون والقميص ؟
كان بالبنطلون والقميص، وكان لما يروحيسهر مع أبويا كان يديله جبة وقفطان وعمة، كان راجل بسيط جدا طيب مؤدب، وأحمد فؤاد نجم كان راجل مؤدب جدا، كلهم الحقيقة من الناس الكمل ما يتعوضوش كفاية حديثهم معاك وأسلوبهم، ناس بتفهم في الحياة وبيتكلموا عن واقع الحياة، بيطلعوا اللي جواهم، وإللى كان بيطلع اللي جواه كانوا يعتقلوه.
هو أيه إللى خلى الشيخ إمام ينقل من التواشيح ويروح للسياسة ؟
اللى شجعه أحمد فؤاد نجم، والشيخ إمام برضه كان صريح، يقول للأعور إنت أعور في عينه، وكان بيهاجم بأسلوب جميل وأنا أحب أسمع له الحاجات بتاعته، وكان فيه ظلم زمان وناس طاغيين.
لحقت إنت أما كان بيجى الأمن يا خدهم؟
كنت باسمع علشان كنت شغال بره في السوق، إنت عارف بقى الإلتزامات والعمل الواحد كان بيقوم بدرى، الساعة 1 الصبح يكون في الشارع، وأسمع بعد كده إنهم خدوا الشيخ إمام وحصل كذا كذا.
الشيخ إمام ماكنش بيخاف من الاعتقال ؟
ماكنش بيخاف، ولا أحمد فؤاد نجم كان بيخاف
ماحدش كان بينصحهم في المنطقة مثلا يهدوا وكفاية سياسة ؟
أصل النظام القديم بتاع عبد الناصر كان فيه حاجات مش كويسة كتير، يعنى حددوا الملكية، قالك كل واحد ٥٠ فدان ناس خدوا أرضها، كان أبويا يروح زمان في رمضان يسهر عند الناس الحلوين دول يوصلوه بالعربية لحد البيت بحاجات محترمة، كانت ناس شبعانة وبتفهم في الأصول.
ما تعرفش ليه اختلف الشيخ إمام مع نجم ومحمد على؟
الشيخ إمام تعب كان بيسافر تونس وهنا وهنا، وكان يقولك أنا ببذل مجهود وما يبقاش مشكور هو كان راجل مؤدب وخدوم وعنده حياء.
أخوك الحاج كامل هو اللي كان بيراعيه آخر أيامه، كان بيعمل ايه بالظبط ؟
كان يعدى عليه كل يوم الصبح، يسأله عاوز ايه يا سيدنا الشيخ؟، يقوله عاوز كذا وكذا.
وقبل وفاته بيوم إشتراله بطيخه الشيخ إمام قاله خدني تحت خده قعد يلف في المنطقة وكأنه ييلف حوالين الكعبة، أنا قولت لأخويا بيتهيئ لي فيه حاجة، وفعلا تاني يوم توفاه الله، أخويا عدى عليه لقى السر الإلهى طلع، وكان الشيخ طالب إنه يدفن في المقابر بتاعتنا وفعلا كان فيه لا مؤاخذه لحد فرداني دفناه فيه.
فين المقبرة دى يا عم أمين؟
قدام حديقة الأزهر على طول تنزل كده فيه سلالم تخوش شمال تانی شارع شمال هتلاقی مدفن الشيخ عبد السميع بيومي وأسرته، وكل واحد هتلاقي اسمه في يافطة حامد، وكامل، ويافطة كبيرة باسم والدي، والشيخ إمام
حد بيزور المقبرة دى ؟
من أهله لا ماحدش بيجي
ومن محبيه ؟
ساعات حد يجي من بره يقرأ الفاتحة وإذا كان التربي موجود يفتح له، وفيه ناس بتيجى تسأل عن المدفن في حوش قدم، بيوديهم، المحبين، أو مثلا الأستاذ سيد عنبة بيكون معاه ناس بياخدهم لأن الأستاذ سيد فضل مخلص للشيخ إمام لحد دلوقتي.
محرر بالموقع الموحد للهيئة الوطنية للإعلام
فى ذكرى ميلاده الخامس والتسعين أحدث نقلة فى المسرح الشعرى العربى.. وحرر المسرحية الشعرية من القصيدة الغنائية كان سابقا فى...
الرواية التاريخية مغرية لأى كاتب لا يوجد قالب جاهز أو كتالوج يلتزم به الكاتب اعتبر نفسى كاتبة نسوية
بدأت فلسفة الاختيار بمناقشة مسألة القدر المحدد بعلم الله مسبقاً ومن هنا ظهرت مذاهب فلسفية كالجبرية والمعتزلة والأشعرية
تربّى فى الزاوية ودرس العلوم الشرعية وكان يحب مجالس العلماء ويقربهم إليه وامتلك واحدة من أكبر وأهم المكتبات فى العالم...