شعبان عيسى: الشيخ إمام مظلوم إعلاميًا رغم تأثيره

شهادات تذاع لأول مرة «11» ابن أخيه الذى جلس تحت قدميه طفلا وغنى معه فى دمشق عرفت من الصحافة أنه فى سوريا فذهبت أبحث عنه فى «حلب» و «اللاذقية» ووصلت إليه فى دمشق آخر أغنية قدمها فى مشواره كتب كلماتها الشاعر التونسى آدم فتحى الجمهور رفع سيارته من الأرض ورفض الغناء إلا بعد دخول الجميع للقاعة

حين سألنا عن عائلة الشيخ إمام في "أبو النمرس"/ جنوب الجيزة، أولاد الحلال دلونا على شعبان عيسى ابن أخيه، لم يكن الإسم غريبا تمامًا، فقد أثنى الشيخ إمام على صوته فى حوار مطول أجراه مع الكاتبة صافيناز كاظم سنة 1975.

من المشهد الأول، يبدو شعبان، بجلبابه الشعبي ولهجته الريفية مثل ملايين المصريين الذين يعيشون فى القرى ويعملون في مهن بسيطة، لكن بعد دقائق من الجلوس معه، ستكتشف الفنان الذي يسكنه، ويحرضه على الغناء، ويجعله حافظا لعدد كبير من أغانى الشيخ. شعبان عيسى، كان في السابعة من عمره حين رأي الشيخ إمام لأول مرة، وجلس عند قدميه وهو يغنى، ثم شاء القدر ان يغنى جواره على مسرح في دمشق، كان حفلا تاريخيا، استقبل الجمهور فيه الشيخ بحفاوة لا تُنسى، حتى أنهم رفعوا السيارة التي أقلته من على الأرض. في هذه الشهادة، شعبان عيسى لا يتوقف عند الذكريات، لكنه يطرحسؤالاً مباشرًا : كيف يظل اسم بحجم الشيخ إمام حاضرًا في وجدان الناس، غائبا عن الاهتمام الإعلامي؟

عرفت وقربت من الشيخ إمام إمتى وفين؟

أول مرة أشوف الشيخ إمام كان سنة ٦٨، في الفترة دي كان عمل حفل نقابة الصحفيين في القاهرة، فتحمس مجموعة من شباب البلد وتكاتفوا لعمل حفلة للشيخ إمام في أبو النمرس، وقتها كان عندى 7 سنين، قعدت تحت رجليه على المسرح لغاية الليلة ما خلصت بعد كده تم اعتقاله ما شفتوش لغاية ٧٢ أو ۷۳، بدأت أتردد عليه في "حوش قدم" مع والدي من وقت للثاني، وبعد وفاة والدي سنة ٨٠ ما قطعتش زياراتي عن الشيخ إمام.

الشيخ إمام قال إن صوتك حلو في حواره مع صافيناز کاظم سمعت الشهادة دى؟

أه طبعا، وسمعت الكلام ده منه في إحدى المرات قال إنى أذن موسيقية وصوتي كويس الشيخ إمام بطبيعته كان لماح، يعنى لما كنا نبقى سهرانين في أي بيت من بيوت الأصدقاء في أبو النمرس، فكله كان بيسمع وعايز يردد بس مش كله مؤهل إنه يردد بشكل منظم وحلو، فكان دايما يقول إن صوتى ماشي معاه

عرفت إنك غنيت معاه في أكثر من حفلة ؟

غنيت معاه هنا في أبو النمرس، إنما بره أبو النمرس لا، لكن وأنا في سوريا سنة ٨٥ عرفت من الجرايد والإذاعة والتليفزيون إن الشيخ إمام موجود

وهيقيم بعض الحفلات في المدن السورية فسافرت وراه حلب ما التقتش بيه سافرت وراه "اللاذقية" برضه مالحقتوش، التقيت بيه في "دمشق" العاصمة وعملت معاه حفلتين.

حفلة منهم شالوه بالعربية تقريبا ؟

بالظبط، إحنا لما وصلنا لمكان الاحتفال شالونا فعلا بالعربية شيل القاعة كانت يتسع ٥ أو ٦ الآف، وفيه بره أكثر من ١٥ ألف عايزين يسمعوا الشيخ إمام ولأن الشيخ عنيد، فقال أنا مش هاغنى والناس دى بره القاعة اتصل بوزيرة الثقافة، وكان ليها تحفظات إزاى العدد الكبير ده يخش القاعة والقاعة أصلا مليانه، قالها إنتوا سيبوهم يدخلوا وهما هايتصرفوا، وفعلا ده اللى حصل الكرسى اللى بيشيل واحد قعد عليه ٣ أفراد، والشباب قعدوا على الأرض في كل مساحة فاضية، ما سابوش غير جزء بسيط جدا يادوب ٥ متر في ٥ متر نقعد فيهم ونحط المياكات وأجهزة الصوت.

رغم إنك واخد شهاده من عمك إن صوتك كويس وممكن تكمل مشواره وشاركت فعلا في حفلات معاه، لكن انت مركزتش في الحكاية دي؟

أصل الحكاية كانت عايزه تركيز من بدري، إنما دلوقتى ما أعتقدتش الظروف تسمح، يمكن لو حصل من ٢٠ سنة كان ممكن، لأن الواحد ساعتها كان فاضي مافيش مسئوليات اجتماعية مافيش حد مسئول منه دلوقتي صعب.

أيه رأيك في الفرق إللى بتغنى للشيخ إمام دلوقت زي حبايبنا وإسكندريلا؟

لو اللي بيغنى للشيخ إمام بيغني بنفس أداء الشيخ، أكيد هابقى حابب أسمعه لو حاول يخرج عن النص ويروح يمين أو شمال مش ها حب، وأفتكر فيه بعض التجارب الأغنيات خاصة بأحمد نجم غناها الشيخ إمام، ثم غناها مطربين بألحان ثانية، قارن بين اللحن ده واللحن ده هتلاقى نفسك بتميل ناحية الشيخ إمام.

اليه مافيش اهتمام بجمع تراث الشيخ إمام من خلال عيلته ؟

الإهتمام بجمع تراث الشيخ إمام قائم بشكل جدى بواسطة صديق عزيز له الأستاذ سيد عنبه بالتعاون طبعا مع كثير من الأصدقاء إللى عندهم تسجيلات للشيخ إمام على مدار سنين طويلة وعلى رأسهم طبعا أسرة المستشار نور الدين العقاد فمن الناحية دى إطمن مفيش مشكلة.

و دور أسرة الشيخ إمام؟

عيلة الشيخ إمام عيلة بسيطة، الشيخ إمام كان له أخ واحد إللى هو والدي والشيخ ما اتجوزش أو بمعنى أصحإتجوز جوازة ما استمرتش كتير فمعملش أسرة، فعيلة الشيخ إمام بتتمثل دلوقتي فيا أنا وأخويا، وكان ليه أخت لم تنجب أبناء ذكور فالعمليه ضيقة.

اكل الناس عارفه الشيخ إمام في أبو النمرس ؟

لا طبعا مش الكل يعرفه الجيل الواعي إللى عاشوا فترة السبعينات والثمانينات وظهرت ناس تعرفه بعد ثورة ٢٥ يناير وبعد عرض فيلم الفاجومي وغناء أحمد سعد لبعض أغانيه، بعض الشباب بيسمعوا الأغاني دى ومش عارفين بتاعة مين كل إللى يعرفوه إن الأغنية دی طلعت من میدان التحرير، إنما ما اعتقدتش يكون عارف هي كلمات أو ألحان مين والشيخ إمام غناها إمتى؟

إنت أيه رأيك في استعادة أغاني الشيخ إمام في ميدان التحرير وقت ٢٥ يناير؟

أنا قعدت مع ناس كثير من اللى أقاموا الـ ١٨ يوم في ميدان التحرير، ومنهم شعراء، كانوا بيقولولنا أن أغاني الشيخ إمام وقود حيوى بالنسبة لهم، البنزين إللى بيحركهم، يعنى كانوا بيفضلوا طول اليوم هتافات، وفي المسا بيريحوا ويغنوا أغاني الشيخ إمام فكانت بتديهم دفعة بليوم التالي.

إزاى بتشوف انطباع الناس عن اسم وسيرة الشيخ إمام؟

سيرته في وسط المثقفين والناس المحترمة مش عايزه نقاش بس الشيخ إمام ظلم إعلاميا المفروض المسئولين عن الإعلام يدوله بعض حقه، يذيعوا أغانيه باستمرار ميذيعش جزءا من أغنية في برنامج لا يذيع شغله باستمرار ويقول إن الأغنية دي كلمات أحمد فؤاد نجم وألحان وغناء الشيخ إمام زي ما بيحصل مع كل الناس.

إيه رأيك في الأغاني إللى كتبها شعراء تانيين للشيخ إمام غير أغاني نجم ؟

كلها أغان ممتازة لأن الشيخ إمام ماكنش بيغني لأي حد ولا بيغني أي حاجة، ولو بصيت للأغاني اللي كتبها فؤاد قاعود وزين العابدين وفؤاد نجيب سرور هتلاقيها لا تقل قيمة وجمال عن أعمال أحمد نجم وفي نفس الخط الثوري مثلا أغنية العزيق لفؤاد قاعود من الأغاني الجميلة جدا للشيخ إمام بيقول فيها: "وهبت عمرى للأمل ولا جاشي وغمرت غيطى بالعرق معطاشي ورعیت لمحبوبی هواه مرعاشي / والليل عليا طويل وأنا العليل موصوف عليا دواه بس الطبيب مرضاشى"، وأغنية حلو المراكب" لنجيب سرور برضه من الحاجات الجميلة والشيخ أبدع فيها. وبالمناسبة آخر حاجة غناها ما يتوقف إنتاجه بعد الرحلة الأخيرة إللى عملوها لفرنسا والجزائر وتونس كانت من كلمات الشاعر التونسی آدم فتحی غناله حاجتين منهم أغنية "يا ولدى".

ا إيه تفسيرك لقلة التجارب إللى عملها الشيخ بره نجم؟

البداية، بداية اللقاء كانت مع نجم وماكنش لقاء عابر الاثنين إقتنعوا ببعض وأقاموا مع بعض إقامة كاملة الشعراء التانيين كان كل واحد في إتجاه بيجمعهم مع الشيخ القعدات والسهرات، أما نجم فكان معاه طول الوقت عشان كده ٩٠٪ من أعمال الشيخ إمام كلمات نجم.