لاشك أن شعر العاميه المصرية هو الرافد الشعري الأقرب إلى الوجدان الشعبي , فبرغم مروره بمراحل تطور مختلفة منذ ظهوره الشفاهي لدى الشاعر الشعبي والذى ظل باقيا عبر
لاشك أن شعر العاميه المصرية هو الرافد الشعري الأقرب إلى الوجدان الشعبي , فبرغم مروره بمراحل تطور مختلفة منذ ظهوره الشفاهي لدى الشاعر الشعبي والذى ظل باقيا عبر الرواة وحتى مرحلة التدوين فى العصر الحديث وبداية من طرحه لخلاصة الحكمة الإنسانية فى مربعات إبن عروس وحتى ظهور قصيدة النثر المكتوبة بالعامية فى بداية التسعينيات من القرن الماضي والتى اتجهت إلى طرح اليومي والهامشي والعناية بالتفاصيل الصغيرة , متجاورة مع أشكال وقوالب أخرى مثل القصيدة الزجلية وقصيدة التفعيلة , ظلت القصيدة العامية ملاحقة لتطور القصيدة المكتوبة بالفصحى وكان من أسباب انتشارها فى العصر الحديث بمختلف البلدان العربية ظهور الوسائط الإعلامية الحديثة , مثل السينما والتلفاز وأخيرا الإنترنت , كما تطورت أيضا أشكال الكتابة بالعاميه من جيل إلى جيل حتى هذا الجيل الذى يشق طريقه فى فضاء إبداع العاميه الرحب , هذا الجيل المستوعب لمنجزه السابق فى محاولة للإختلاف عن الرواد والأعلام الراسخة , قد يشوب تجربته أحيانا تأثيرا بجماليات خاصة لشاعر ما الا أنها تجاهد مخلصة لصناعة صوتها الخاص وشخصيتها الفارقة باختلاف الظروف الإجتماعية والمتغيرات السياسية التي تحاوط هذا الجيل , ولا مجال هنا للتعرض إلى هذه المتغيرات بقدر التعرض لتجربة شريحة من هذا الجيل من شباب كتاب العاميه المصرية , نقدمهم كنموذج لقصيدة العاميه التى تتشكل فى بوتقتها الخاصة لتكون مؤشرا لجيل يمتد عبر ربوع المحروسة ليشكل خريطة شعر العاميه القادمة ,
هؤلاء الشعراء الشباب يشتركون فى عدم صدور ديوان خاص لأحدهم برغم وجود مخطوطات دواوين لدى البعض منهم , يتعثرون لنشر أعمالهم إلا على مواقع التواصل الإجتماعي والتي أتاحت فرصة التعرف عليهم وعلى تجاربهم , منهم من نشر ورقيا بجريدة أو بمجلة أو بديوان مشترك , ولكن يظل النشر الأليكتروني هو الأيسر والأكثر إهتماما لديهم ,
وباستثناء الشاعر (عمرو العزالي) وهو أكبرهم سنا على ما أعتقد ويكتب قصيدة النثر العاميه وقام بنشر عدة قصائد بجريدة أخبار الأدب وأماكن أخرى , مادون ذلك من الشعراء فهم فى العشرينات من عمرهم , يعيشون فى مدن وقرى مصرية وليسوا ببعيدين عن المركز , يتواصلون عبر الأثير مع جمهورهم الإفتراضي , يلعبون باللهجة والمجاز كما يحلو لهم ولنا يتنفسون هوائهم النقى ويكتبون قصائدهم بوعيهم الخاص والذى يطرح لنا رؤى فى تأمل الحياة والموت وتفاصيلهما الخاصة, يشتبكون مع اليومي والمقدس وماوراء الأشياء , ويسردون العلاقات الرومانسية المفعمة بدفأ المشاعر ولا يهملون همهم العام الذى هو همنا , وهكذا كانت القصيدة العامية عبر تاريخها وتحولها من الشفاهية إلى الكتابة , وهكذا كان النقد غائبا عنها ، لايقوم بوظيفته المرجوة فى اكتشاف الجيد من الكتابة وتقديمه لجمهور القراء باعتبار أن قصيدة العامية المصرية أصبحت تخضع لجماليات التدوين مع احتفاظها بجماليات القول واقترابها من أذن وعقل ووجدان المتلقى بما تحمله من إيقاع اللغة المتفردة حتى وإن كان النص نثريا , فهو نتاج ثراثها المكتوب والشفاهي , تداخل مع الحكاية الشعبية والموروث وايضا مع الحداثة والعولمة, قصيدة لها مرجعيتها ولها أيضا طموحها فى الاستقلال عن سابقتها وهو الطموح الذى لا يعترف بحدود فى المعرفة والإبداع , استفاد من الرواية الحديثة ولعبة سوبر ماريو والكوميكس كما استفاد من الموشحة والمربع والقصيدة العمودية ,
يقول الشاعر أحمد خير الله ( ... نبضك بيعزف لحن مش معروف / وانت اللي بادئ رقص فى الدنيا / تتهجى بعيونك تفاصيل الحياه / فتتوه مابين ضحكتك والآه / وتتوه مابين المختلف وملامح المألوف / وتتوه مابين جذب السما للروح / وجذب التراب للجسم ...) فيطرح لنا تأمله فى الحياة والموت وحيرته الكونية ويقول الشاعر أحمد عفيفي ( ... سكير كفيف / عمره ماشاف الكاس لكن داقه / عمره ماخاف م الليل وأعبائه / اضناه على طول الطريق / قصص انتظار خطو النبي / عدى النبي ماشافوش ..) يشتبك الشاعر هنا بسؤال خفى مع مقدسه , يطرحون أسألتهم الوجودية واليومية , فى قوالب تبدو تقليدية , بروح مفعمة بالتمرد وعدم الرضوخ للمألوف ,
نحن هنا لسنا فى موضع مسح لقصيدة هذا الجيل وتحليل جمالياتها فهذا شرف لا ندعيه ، لكنها محاولة متواضعة لتقديم مجموعة من الشعراء يمثلون نموذجا لجيل عمرى وإبداعى بأطروحتهم التى تتعامل بحساسية مع العاميه على مستوى الفكرة والوعى حتى فى استخدام المفردة التى تتضافر أحيانا مع المفردة الفصحى وهو استخدام جمالي ليس بجديد ، لكنه يقدم لنا تجربة يجب علينا أن ننتبه لرهافتها
يقول الشاعر محمد رضا العوضي: ( .. هانزف دموعي فى خلوتي / واخرج عليك ِ مبتسم / حاولى انتٍ بس تصدقي / إن هذا الحضن مش ليكِ / مابقاش دفيان / اصبح بيبخ وداع ..)
تقترب النصوص أحيانا من خبايا النفس ومن لحظات الفراق القاسية وتلجأ إلى الغناء والموسيقي كما تلجأ أحيانا إلى السطر الشعري المركب لكنها تشترك فى طزاجة التصوير وبكارته فى ذهنيتها وحركتها السينمائية الوامضة . وأخيرا اتوجه بالشكر للشاعر الشاب محمود رأفت لمساعدته فى التعرف على تجارب جيله الواعد من شعراء العاميه المصرية .
حاتم مرعي
اللعَب مش بتجري على فقاعات الميه اللي بتملى المحل
كفاية تبص وتضحك
وتطق على كف اللي جنبها
يومياً
بتملى الفترينة ضحك
على مشهد ( سقيل ) في ( تخاريف )
القرد بيطبل نفس الطبلة
وقت التجربة للزبون ...
ومحدش بيسيبه يكمل لحن للآخر
وبيبقى نفسه يداري العيب اللي فيه علشان يهج
هو الوحيد اللي عارف انه اعادة تصنيع من اسد
ولعبة العساكر
اللي بتتباع دلوقت من غير سلاح
ومتنفضه من أي حبة رمل
بتضحك ضحكة مش مفهومة
للفوانيس الصيني اللي مش حابة صوت عبد المطلب
لسه قدامها سنين على ما تتعود ..
وبعدين تحبه
مش مهم الحب ييجي في الاول
ومش مهم ان البلاستيك
مش بيرضي عزة نفس القطر
اللي واقف هنا
من أيام انا ما خسرت كل فلوسي في بنك الحظ
ومن ايام ما بدأت العروسة الرخيصة
تدور يوماتي في صفحة الوفيات على سوبر مان
اللي أقنعها انه بطّل يطير
وانه هيموت لو افترقوا
اللعب الغالية زهقت م الشرب
وم الاشاعات والنميمة
في حفلات بتتعمل من غير مناسبة
والرخيصة زهقت م التراب
ومستعدة كل يوم
تنادي الأبهات م الشوارع
وتفكرهم بتواريخ الميلاد
وبتشاور لعيون العيال بمحبة
وبتفتن لهم ع الفلوس اللي في الجيوب المتدارية
وبتتقطع وهي مش قادرة تمسح من على خدودهم حرمان يومي
وهي عارفة انها وسيلة ضغط وحيدة
من شريكها الوحيد
في العالم الافتراضي
الدباديب
بتريح ضميرها بطريقة واحدة
لما بتدخل بمنتهى المودة
في احلام يقظتهم
ومفيش مانع تقضي معاهم اسبوع الاكتئاب بتاع اول جرح
وتسيبهم يسلفوها لأصحابهم
وتروح لهم
في اي حلم
في اي ساعة متأخرة
وتشارك البنات
في عنيهم اللي ملت البص من ورا النضارات العملاقة النو فريم
ع العيال المتعبية في كراتين
ومالية الشوارع
بزرار حركة مفوت
وع الجيل اللي صدق ان الامير اتجوز الكاميريرا سندريلا
عشان الساحرة وفردة الجزمة
ورشاش بتمان اصوات
صوت واحد للقتل
والباقي على ذوق اللي بيسمع
جيل
كان مستعد بصدق أي حد يركب له
زرار حركة سليم.
هاقول الشعر
لو كان البراح خانق
وكل الناس
بقت ع البعد بتعافر
وخوفهم كل يوم بيزيد
من الفرصه وشوق لجديد
ونار ولعانه جواهم
براح خانق
وضلمه عنيده لم تزهق
وانا واقف كده ضاحك
عليهم بس تحت لتحت
ماحبيتش الغباء يفهم
بإني ارتحت
وإني أخيراً اتفتّحت
ورق نورِي
بقى زاهد فى كل الخلق
وشوقي للي فات بيقل
ولما العمر بيطوّل
حنيني بينكمش
ولاّ الغرام بيطل؟
باشوفِك فى السما غنوه
واشوفهم زحمه ع الأراضين
وصوره تملّي سطحيه
لخلق مبروزة الميادين
أنا طبعا هاعود للطين
مافيش مهرب
ولا عادت حكاية الموت
تخلّي الجسم يتكهرب
طبيعي الصدمه بتغيّر
شريد البال ومتغرّب.
مالت علي كتفي
رفرف ورق طوبي
وقع علي معصمي
رًقص خطوط كفي
طيور الجنة شفايفها
عزفت لحنها عاشقاك
خيوط الصراط دي رموشها
تهديني سيره
لو قالت حباك
إن نهديكِ الكوثر
و انا كل اما اشرب باسكر
و انا كل اما اسكر أشرب
و غريبة عطشي بيكبر
و انا كل اما اعطش أزهد
ف اشتاق
و انا شوقي روح شهدا
شايلين ف كفوفهم
دمع لعشاق متفارقة
و يزيد الحمل علي إيديهم
ف بتنزل دمعة
تحيا ف سما عيونّا
ف يبان لمعان
جاي يعلن شوقنا
ف قولوا للقلوب الكافرة بالهوي
إزاي بتتعبد
ادائي ماكانش صَلة
لما قلعت قلبي
عند باب المسجد
ما مطرتش عيني دموع
ما زارش روحي خشوع.
او لم تؤمن؟!
بلي ...اقسم بالله
والسر هوايا اتجاه.
الرصيف
أكبر مخآدع فى الوجود
رمز الحدود
شال الفقير فى البرد بس مدفاهوش
نآيم عليه كل العيال الطآمحين
والحالمين .. برغيف بشوش
ولا عمره فكر مرة يعرض أي شئ
بيمص بدل الدم عمر ويسقي طين
بيربي كل المجرمين على إنهم أهل الشرف
بيلم أولاد الترف تحته فى خآنة " مخطوفين "
يمكن يكون .. ملّه وعلم لمجروحين
لكنه كان صاحب عشان زاده الدموع
إسأل جميع من دآقوا نومة على الرصيف
راح يحكوا إنه قد سلب حق الرجوع
من تآني للطعم النضيف
عوّدهم النوم الخفيف
لما تعوز انك تكون جوا ف أحضان الوطن
وتحس طعم جفاه ومعناة الشجن
إذهب إليه .. هتحس فيه :
وكإن كل رسالة فيها خوف و لوم
او غيرها م اللي فيه هموم
كآنوا اتحكوا للنيل فى يوم
راحوا إليه
بيبان لك انه
- قهوة للي نآقصه راحه أو فرح
أو بار لمن كآن انجرح
أو إنه حتى ملاذ كبير
لحد خآنه حلمه إنه يبقى فوق
او حتى للي جاي له بيحاسبه الضمير-
ده صديق صدوق
لكنّه ذا القلب الضرير
تربه عشان الأمنيات
بينتشي يشوف البشر تلهث إليه
ويحب يتسلطن بأصوات الأهات.
بيقولوا العمر اما بيطوَل
بيلبس صاحبه الشوك ع اللحم
والشعر الابيض عنده وقار
بيساعده سواعي ف شيل الهم
كُبَّاره وفاهم ومجرب
وماحدش يستجري يقرب
من واحد
أمراض الدنيا
بتخلص منه خطايا صباه
عن واحد كمل دلوقتي
إسبوع بالظبط ف إيد مولاه
كان عم دسوقي المتوفي
فى خناقة عطوه الميكانيكي
مع سيد سواق اللوري
بيقول مسامحكم ياحبايب
وياريتكو ف آخر أنفاسي
تتصالحوا وتيجوا تباركوا لي
هاتزف الليله علي إيديكم
بالكفن الابيض علي قبري
وهافرتك كل اللي جنيته
وخبيته ف حصالة صبري
الشارع يومها كان مليان
والزحمه ويا اللهفه تخض
مع إن الراجل ده بالذات
عمره ماكان طيب يوم مع حد
كان نفسي أطير من فوق الناس
واوصل له بأي طريقه تكون
واحكي له حكايه أخرها سؤال
ويقول لي قبل مايمشي الرد
عن نادر صاحبي المتوفي
بالشنق ف أوضته المقفوله
وسايب لي كلمه تفكرني
بالحلم وأيامنا الأولي
ببساطة لغته اللي وارثها
من جده الميت من سنتين
كان نادر عمره لسه مجاش خمسه وعشرين
شاب ماعندوش نفس الخبره
وانتهي مالصبر وطول لياليه
طب عم دسوقي اللي معدي
الخمسه وتمانين
كان صابر كل العمر ده ليه؟!
وقفِت على صدري
بتتنهد
رقصِت
فاتلخبط دق القلب بدق الكعب
المشهد
شجرة جميز
ومقام
وعيال
وعجوز بينهم يشبههم
واد منبوذ م الدنيا
سلموه للبرد
نشف جتته
جات بنت
لمسها جسمه فارتعش
لان
بان ضعيف
سلبوه جلده القديم
وادوّله بدله مرقعه
موتِى
كما مات الأمل
خليكِ فكره ما تطرحيش
مش قولت لِك ما تقربيش
القرب حارق للفراش
وقفتِ ليه وسط الطريق
بتشاوري ف المطلق
هانزف دموعي ف خلوتي
واخرج عليكِ مبتسم
حاولِى انتِ بس تصدقى
إن هذا الحضن مش ليكِ
مابقاش دفيان
اصبح بيبخ وداع
الشارع المليان بشر تايه
ياهل ترى دول اللي ماتوا
ولا اللي غابوا هم اللي عايشين
ارجوكِ موتِى
بس موتِى بعيد
قلبي مش قبر للفقرا و العابرين
كل فاس بتدق فيه
بتعذبه
ارجوكِ سيبي الضلع ده
مش ليكِ
الضلع ده لامي
ف الصحرا سيبتِك
جيتِى سيبتيني
احاسبِك أو تحاسبيني
ده شيء مرفوض
خلينا نتكلم بجد عن الحدود
مات العيال على خط مش موجود
وعيال بتيجي تدفن الموتى
وعيال بتنزف دم ف الضله
وعجوز بياخد فخر ف الاخر
وانتِ
كان كل فكرِك عن حدود بينِك وبيني
ان انتِ خايفه يرعشك لمسي
ترقصي
فتدوبِ فوق صدري
بنت
عينيكِ بس الفاضله من صورتِك
مجرد عنين
من غير نضاره ما بتشوفش
خلينا بجد
نتكلم عن بيت
اوسع من وطن الموت
مجرد ورقة توت
شميتها
فتهت
وسيبيني لشبحِك
مين فينا هيقدر مايملش م التاني
ويموت
وان سألوا عليكِ ف بعدِك
هنزف دموعي ف خلوتي
واخرج لهم مبتسم
وعينيا بتحلف
ان انا كداب
والشارع
هايتوه اكتر
يا هل ترى دول اللي ماتوا
الاتنين مساكين
واخدين م الدنيا حدود البعد
وسنين بتزق سنين
والواد
يفضل منبوذ
إكمنه ماكانش ف يوم أراجوز
باحلم و اخاف م الحلم
باحلم و اخاف م الخوف
باحلم و اسير أعمي
عكس اتجاه الشوف
نبضك بيعزف لحن مش معروف
و انت اللي بادئ رقص ف الدنيا
تتهجي بيعيونك تفاصيل الحياه
فتتوه ما بين صوت ضحكتك و الآه
و تتوه مابين المختلف و ملامح المألوف
و تتوه ما بين جذب السما للروح
و جذب التراب للجسم
ما هيبقي منك غير طشاش الإسم ف بطاقتك
و عشان حقيقي الذكريات كما حمل فوق طاقتك
مابتشيلهاش
ببساطة جدا تتنسي
و تبيعك الدنيا لعدم
ببلاش
الناس يوماتي تزيد
و انت الوحيد بتقل
انت العتيق القديم الكلاسيكي الممل
الغير مواكب لهذا العصر ف سلوكه
فكيت ايديك بصعوبة م التخبيل و الربطة بسلوكه
و عرفت إن الدايرة ممكن تنقسم م الوسط
و ان الزمن مادة
يمكن شراءها بقسط
و ان اللي فات بيموت مايسيبش غير شوكه
و بدأت ترقص تاني من غير قصد
قافل صوابعك الاربعة و فارد صباع المنتصف للكون
و بدون تعب م الوحدة او م الليل
بتميل بشغفك للجديد و الجاي
و تميل بكرهك للسؤال ب"ازاي"
و تميل بعشقك للأنين ف الناي
فتدوب ف اقصر وقت / تتناغم .
أخرك هاتصعد جبل و تنط من فوقه
حبيت رغيف حريتك من قبل ما تدوقه
عاوز تطير تصرخ في وش المدي
"يا خلق ما تفوقوا"
يتردلك صوت الصدي سهمين علي جناحك
يصبح سقوطك حر
رغم انه بس سقوط
هتموت لأول مرة بتدوق الرغيف بالمر ..
و تمر موته تجر كام موته
جسمك طريق للروح
و السكة مسدودة
جواك بشر قاعدين
و بيحكوا حدوته
و بيبعتوا المراسيل ف ستاير الدخان
جوفك مالوهش أمان
عشرين حريق ف اليوم و انت اللي بتولع
علبة سجاير كافية تقتل كل يوم واحد
و كافية برضوا تخرجك م الصمت
انت اللي ميت بس متدلع
و انت اللي راكب جوا كون باعد
بيمشي بطئ
عشان لاربع فرد ع الجنط
اقلع هدومك و اجري ف الضلمة
الكل واقف بس شوفه اعمي
الكل واقف ف الطابور لاجل ان ينول لقمة
و الكل واقف برضو حاجز يمنع النسمة
الكل واقف و الوقوف قسمة
اقلع هدومك و انزل البحر اللي ف الرسمة ..
اهبل ..
يجوز
بس الإيحاء بيعوز هبل ..
جواك يا صاحبي الليل دبل
حدفّنا بنجومه ف منام الفجر / فجرينا
و غنينا
و عدينا الطريق بالعرض ماوصلناش
فكملنا الطريق بالطول و تعبت منا رجلينا
و ماعرفناش
لا فين كنا و لا بقينا ..
طللٌ وريح
زعق الصفيح
في الحشد اضنانا البكا
طلل بكا
علي اغنيات الحرب
على كل رايات المدن
جبلٌ بيشتال المسيح
صلبٌ بيغتال الرؤا
وبينهى ملحمة السما
اخر خطى العارفين
براح
اول خطا الجايين
جراح
وانا من هناك
انا من هنا
انا لحن هارب من كمان
عن مين كمان
ومين كما
اضناه لما
كل الشفاه
يا عدرا يا نهد الحياه
زينب
يا حمله زين
وزين شايل في صلبه
الاوليا
الشيله كانت
صعبه جدا
لكن قدها
كف النبى
وابن النبى
وبنت النبى
يا عين صبى
الجند خايف منها
عن مين حسين
ومين حسن
ومين طريق
ومين كفن
ومين يغنى للوطن
باسم القصيده السر
صف الغوانى مَر
كل البكا اكبر
نص الملاحم بيد
يا ايد حديد
تمتد
يا رقصتين عالمد
وغنوتين للحمام
البرج عام
وقت الطوفان
سكة نجاين الحرب
ابواق المكان
سر القصايد مش
في مين قالها
سر القصايد
مين ارتعش في الجذب
مين اللى جاع مالزهد
ومين شبع في الجدب
الارض حمالة خطا
صهل الفرس
السيل سطا
صلى العرايا للغطا
فاتغطو بالتراتيل
غطيت قلوع المركبه بالنص
كان الشراع
بيحس
يرقص
يجس نبض النوه
تغرق فيه
قلبى العليل
ميل
طرح القمر
ليل
عرق النخيل
ملّا
املى
وما مله
مين للنبى قِبله
خال الخدود قُبله
شال الشهيد اطلال
موال ايا موال
غنيت وما غنيت
رنيت لاهل البيت
والبيت براح
موسم حصاد الرمل
سرق الرغيف مالحلق
صبيت كؤوس الراح
ساعة حضور الطلق
كان النبى جالس
تيّم عليل عابس
كان منتظر
كل النذُر
كان منتظر نهد السما
يحلب نصوص
يايها المدثر
قم في البلد أنذر
وانظر وما تنظر
عين الفؤاد اكبر
كبر علي السكران
يمكن يقوم يسكر
يمكن يبوح اكتر
عديت كإن المنادى
نادى على غيرى
بصيت لطير السما
دبج الغنا طيرى
يا طير يا طاير فى السما
خودنى
معاك
يمكن اكون عصفور هناك
اقرب لمن فوق ارتباك
كل النصوص
وقت اشتباك
كل الدقون مع بعضها
اهل التآويل
قدها
وانا اخرى انظر واجرى
وادحرج
اخرى اموت مالحب وماطلش
سكير كفيف
ماقبح النص السخيف
عمره ماشاف الكاس لكن داقه
عمره ماخاف مالليل واعبائه
اضناه على طول الطريق
قصص انتظار خطو النبى
عدى النبي ماشافوش
عد الصبى ماطلوش
عدى الطوفان حصده
تبت يدى جسده
لما اتقطع مسده
لما البكا صابه
صابه وكان غرقان
والكاس نديم حيران
يجرى ورا البرهان
يجرى اللى كان منه
سقراط فتل كل الحقايق حبل
لكن نسانى هناك
فوق الجبل مصلوب
وكانى شئ معطوب
مكتوب علي كف السفر
وقت اللقا ابن القدر
لما انتظرت
دبلت
لما دبلت عطشت
لما عطشت بكيت
صليت وما صليت
وشربت دمعى مدام
يا ايها الانسان
الصلب للغفران
الرب قدم للبشر قربان
والمهد قدم للوليد لعنه
ان في كل اللى فات معنى.
البنت شبه الخيل
كعب الصبيه امام بيصف ف اللى وراه
لو يضرب الخلخال بتشق قلب الارض
و الشوق يضاهى النار
كل البشر مجاذيب ؛
كل البشر ف النار
مانشت ف الاخبار :
تمكين لذاك الدين اللى يدين بيها
يا أم العيون جنه ؛
كل البشر تحتاط علشان تخطيها
داب ف الهوا اللذات
و الشعر فيه محطات متفصله ليها
يا مخليه الشوق جلىّ
مدقوق على ايديها ..
يتوضى ذاك الولى من سلسبيل بيسيل
و يصلى بين كفها ؛ ف ترد بالتنزيل
جِيدها ب ملو الشجن بيصب فيه النيل
سمرا سمار الارض و بتبعت المراسيل
فوق خدها المرمرى ،، يسقط شعاع الشمس روح الربابه تتوه ،، تعزفها بالمواويل.
طب فاضل ايه..
غير رعشه خلت ضلي مهزوز ع الطريق..
دخان طليق
خالق سحابه من ألم نشرت هموم
بدرت فزع..
ضلعي اتجزع..
عارفه الوجع؟!
سرسب أهاته ف جتتي
سكرة وداع روح جدتي
زي البراندي ف لزعته
وانا مش نديم
ولكني سكران م البكا
مجذوب بيسطل نفسه لما بيفتكر
عارفه احتمال فقد المعاد
فقد الرضيع
للضرع وقت ما يفطموه
كان عندي اموت ولا أتفطم
عارفه اما افارق امي مغصوب ع البعاد
زي انسلاخ الضل م الارض ف غروب
ملعون ابوه البعد يامّه بيفتري
كل القصايد م الوجع
بتحلا للناس تتقري
وانا وجعي مش حزن وسكات
عارفه انشراخ الخد كويا بالدموع؟ ا
شبه لهذا الخد جدا ف الخضوع
سلمت امري للي فات..
لعفار بيملا الامكنه بتراب اغاني من زمن
ولعين حبيبه كت سبب ف الانهزام
جرحي انفتأ..
معرفش معني الالتئام..!
البنت دي
تأثير صداع برفانها لما يخشني
يِنْحِل أوي..
في نسيج وضلع وغنوه تشبه حسنها
سلمت امري لحضنها
ولقيتني بحضن ف السراب
ولقيتها فجأه بتختفي..
دخانها شارخ ف النفوخ
بأسم المسوخ
كل اللي خارج من سنين العشق متعلم ندوب
مقطوع ردائه من ورا قطعه فراق!
بأسم الاماكن لما بيتوه المعاد
بعد البعاد
تسكنها روح مشتاق امين
سلمت امري لكل شئ فايتاه يدغدغ ف السنين
سلمت روحي للحنين صابني الوباء!!
سلمت روحي لكل شئ الا الشفاء.
قامت تصلى
وقبل ما تنوى الصلاه
عنيها لفت فى المكان
على كل صوره فى الجدار متعلقه
خدهاالحنين فاتصورت
أن الصور بتهزها
وبتمسح الدمع اللى باين فى العنين
شافت محمد جوه صورته بيبتسم
وشويه تعلى ضحكته وسط العيال
فاقالتله بس اسكت يا واد
الضحكه هتصحى الجيران
وحياة ابوك
أنا خايفه يا ابنى ليحسدوك
أسكت يا واد
يرضيك حال ابنك يا فؤاد
يرضيك ميسمعش الكلام
تب اقولك ايه ما انته اللى علمته العناد
فاكر عليك لما مسكته وقولتله
اوعاك تفرط فى التراب
اوعاك تطاطى للكلاب
اوعاك وكام اوعاك يا شيخ
ومقلتلوش اوعاك تسيب أمك يا واد
فاكر يا شيخ
ولا كلامك فى الوطن
قلب الوطن
جرح الوطن
حلم الوطن
خليت دماغ الواد يا شيخ زى الحجر
خليته زيك فى العناد
الله يسامحك يا فؤاد
عارف يا شيخ
رغم البعاد
والقلب ده اللى معدشى فيه
غير الاشتياق
صبره يا شيخ
ولحد ما يجى الميعاد
الله أكبر
نويت أصلى ركعتين
رحمه للواد والشيخ فؤاد
يارب انا صاحى من بدرى
ومستنى اطول رزقك
وجبت معايا كام نجمه
فمنهم واحده تشهدلك
بانى اخدت من صبرك بنيت توبى
ونجمه تكونلى فغروبى
رفيق يعملى من سحر الجمال عناقيد
فامد ايديا واتشعلق بحباته
وواحده تكون لى فالوجع صاحب
وواحده تاخد لى دعواتي وتطلع فوق لسمواتك
ولاجل ماتوصل الدعوه
فضلت ابعت فاوجاعى على السموات
فزادت همها بكيت
ونسيت كل ابوابها على البحرى
فدخلت واحده لاعتابك
وادينى يارب مستنى
قسمت اللقمه بالملى مابين الطير
وعيشت افهم الّعيال
ماتبدر غير سنابل خير
وعشت اوزع الضحكه على العايشين
ورغم الحوجه للضحكه
فلكن قول لى ليه اضحك
واقاسم ضحكتى مع مين
ولسه يارب مستنى
بوزع رحمه عالصايم
واوزع غنوه عالهايم
ونيجى ع اللى قتله الشوف
ف حرفي كان يكون كفنه
وبكره تملى من عشمه
فكان بيروح لكل الخلق من بدرى
ولا يقدم لى يوم اعذار
ولما رسمت يومها نهار
فكانت شمسه بنوته
ف ضحكه تفتح الجنه
بدمعه الدنيا كات تدبل
فقول لى يارب ايه تانى عشان تقبل
كفرت بكل احلامى
امنت بعطفك الزايد
ابويا
اللى فصل لي الأمل فى تابوت
جاى بعد عمر من الوجع يحصد بكايا
العمر اللى راح فى اللف والتنطيط
ييجي كام سنه
على كام وجع
مع كام صراط
ياتودعوا الليل الحزين
ياتصلوا ع الفجر اللى مات
ياربنا
تبت يدا كل اللى باعوا الحلم بسنين العجاف
كل اللى باعوا الأنبيا بخردل
حالهم بيشبه للمسيح ويهوزا في زمانه
خلوا اللى باقى للوطن دعوه
يتعكزوا بيها الغلابه فى عز أمشير الغبى
خلو اللى باقي فغنوتى حبة حروف
تقنع سيزيف
يرمي القصايد المستباحه ف أرضنا
وتفهمه
إن الجبل أصلا سراب
وان الغنا لو كان يخالف وحيهم
أاصلا حرام
يارب
خد اللى باقي من الدفا فروحى
ودفيهم
فصل لهم من جلدى الشايل امال الكون وطن
لو يرسموه فالفصل يتباهوا
لو يدخلوه الملايكه
مايسيبوهوش
وبحق جاه المرمطه
خد منى روحى تودهم
صدقه
تغازلهم
تغطيهم
وقت اما اموت
هقدر اسيب جوا في ضلوع الوطن حارس
وهى تقدر تموت فيهم
عارف هموت فالعمر كام مره
ابعت ملايكه يونسوا السكه
ويرددوا اللحن الاخير للموت
ويختموا لك غنوتى بدعوه
سلام هى حتى مطلع الروح مالوجع
عاش اللى عاش
مات اللى مات
ولسه الشمس عايشه لنا
توزع غلب ع الفقرا
يشبه كما سكر نبات.
ف ديسمبر ..
طعم كل الرقص ماسخ
حتى رقصى ع الوجع
كان مجرد عشوائيه ولخبطة ل يمامه مكسوره الجناح
بتحاول تهرب م الواقع و من التفاصيل وتعيش عادى
خوّفنى وجودى معاك ف الحلم
كان لازم يعنى ساعتها الزحمه تزيد
الميكروباص
يقف هناك بالظبط
_قدام الحلم_
كان لازم أخاف
علشان البنت اللى لاقيتها قدام الباب
كات تشبهنى
وإتمنيت فعلا لو ينفع
أنده على إسمى
جايز..
تطلع نفس الاسم
"منــى"
زى سخرية القدر مثلا
ف اضحك لو ردت
وأنصحها ب إنها تمشى
علشان مش لازم يتكرر نفس المشهد ف وداع العام
كان لازم تفهم من بدرى
إن الشهر دا
غاوى الضلمه
ضحكتها وهو ما يجتمعوش
كان لازم تعرف إنه كئيب
ف ما تتعشّمش
ف ديسمبر..
كل الناس فاقدين
الفاقد حب..
الفاقد حد..
الفاقد روح
كل الناس جواها نواح
وماهوش عن عمد
دا بفعل الغصب
بفعل الشهر الغاوى يزعّق ف العصافير ويسكّتهم
الغاوى عياط
الغاوى يزوّد وجع القلب
كان عايز إيه من تانى ديسمبر .. ماتقول لى ؟؟!
وأنا لسه يادوب بتحايل ع الواقع بعينيك
وبحايل فيك إنك تفضل
ازاى يتمادى ف تعذيبنا
ويبعترنا كيف التايهين
الرغبه وقله حيل القلب عن الضمّه
لإتنين راجعين للدنيا بـوعد
بلهفة ل قرب خضوع الحلم إلى التأويل
...
"ما تصدقوش الأحلام
هذا الزمان مافيهوش مبادئ أنبيا ولا معجزات"
_صوت الشتا والرعد رددها_
قلبى كساه الخوف وما تكلّمش
محتاج يتبّت ف البواقى حياه
عشمان ف ضمّه تهد ضهر الليل
عشمان ف صبح ما هوش ف ديسمبر
لو ينكتبلى أعيش ف غيبوبه
ف أحمينا شر سواد نهاية العام
هيكون دُعايا والمطر نازل
اكفيك انين التوهه و أتْحمّل
واصحى ف يناير وانت بتغنى..
"كل عامٍ
وأنتِ حبيبتى".
-----------------------------------------------------
الليل مخاوي والقمر بكاي
الشمس حالمه والدفا في بكاي
عيني بترمش لما قولت الاه
جسمي بيرعش وقت عزف الناي
.....
يا طوبه طالعه من ضلوع الهد
يا اها طالعه من جسد مكتوم
البحر خدني لما زاد المد
البحر سابني لما كنت باعوم
..........
انا قلبي كوم وانتي البشر والقوم
انا جسم عايش و لا ميت شوق
القلب عاشق و الغنا معشوق
القلب راحل والغنا ضواي
.........
سجن القلوب قصده البكا ف الراح
صنع المشاعر من عبير مداح
الليل ف قلبي وانتي ليا صباح
الليل بيقسى وقلبي ليه نساي
يا عاشقه نوري ونولي تتمني
الفل راكع ليكي ... اتحني
كل الصبايا من ربُا الجنه
كل العطاشا ..من خيالي الجاي.
محرر بالموقع الموحد للهيئة الوطنية للإعلام
نهاية العالم أن يموت كل جميل .. أن نصحو ذات صباح ولا نجد الذين نحبهم .. نهاية العالم أن نفقد...
أحد أهم أعلام النقد الأدبي في مصر، وهب حياته للنقد والأدب والبلاغة، وأصدر العديد والعديد من الكتب في الشعر والسرد...
لاشك أن شعر العاميه المصرية هو الرافد الشعري الأقرب إلى الوجدان الشعبي , فبرغم مروره بمراحل تطور مختلفة منذ ظهوره...
هو الذي كتب على الطين فشهق الحرف نورا و حضارة هو المولود من رحم نخلة على ضفاف الفراتين هو الباحث...