press_center
تقديم: محمد صلاح
تاريخ الحلقة:28/10/2008
الضيوف:
د.علي لطفي "رئيس وزراء مصر الأسبق"
الكاتبة الصحفية: جيلان جبر
محمد صلاح: لو قارنا الصحافة المصرية في الفترة اللي فاتت بصحافة العالم حنحمد ربنا على النعمة اللي إحنا فيها ، صحافة العالم مليانة كلام عن كوارث وانهيارات في أسواق المال ، والعقارات ، أزواج بيطلقوا زوجاتهم ، شركات بتقفل ، بنوك بتفلس ،إحنا طبقا للي بتقوله الصحافة- تأثير الأزمة علينا والحمد لله بسيط جدا
كمان صحافة العالم مفيهاش ولا كلمة عن السحابة السودا ، جايز لأن السحاب هناك ملوش غير لون واحد ، شفتوا بقى الهنا اللي إحنا فيه ، شفتوا الكلام
أهو كلام ......... والسلام
فاصل
محمد صلاح: الأخبار الصحيحة بتطمن الناس والأرقام الدقيقة الموثقة تديهم إحساس بالأمان حتى أثناء الأزمات وفي الوقت اللي الصحافة المصرية كانت بتطمنا و قايمة بدور إل Anti-Biotic يعني المضاد الحيوي المهدئ للأعصاب أثناء الأزمة المالية العالمية كان فيه ناس تانية بتدور على حلول إزاي الناس تتعامل مع الازمة على سبيل المثال في أيسلندا الأخبار بتقول إنهم نظموا مهرجان موسيقي لرفع الروح المعنوية عند الناس اللي عندها أزمات بعد ما 3 بنوك فلسوا يسمعوا موسيقى كلاسيك أعصابهم تروق ينسوا الأزمة ويعرفوا يتعاملوا معاها ، إحنا عندنا هنا برضه نفس الحكاية كل واحد بقى وأزمته.. اللي تعبان شوية عنده أزمة مالية جامدة ممكن يروح الاوبرا يشوف بقى عرض اوبرالي اوركسترالي يشوف أوبرا عايدة مثلا إذا عرضت, يشوف باليه مثلا دون كيشوت أو بحيرة البجع فالأزمة تقل شوية الخيارات كمان كلها مفتوحة اللي مش عاجبه الأوبرا يعمل إيه ..؟ ممكن كليب كده لطيف لنانسي عجرم أو هيفاء وهبي, اللي متأزم قوي بقى يديها العنب العنب.. ومن الأزمة المالية العالمية صحف كتيرة ومن بينها الأهرام أعلنت هنا بقى الموضوع عكس خالص عن انخفاض في أسعار السلع الغذائية في الأسواق المحلية الأهرام قالت كده .
لكن الوفد باعتبارها صحيفة معارضة يبقى لازم تعارض وتقول العكس أتكلمت الوفد عن زيادة في أسعار السكر والرز والزيت والفراخ والجبنة البيضا بالذات اللي وصل سعرها زي ما بتقول الصحيفة إلى 22 جنيه للكيلو ..اشمعنى بقى الجبنة البيضا بالذات دونا عن أي نوع تاني من الجبن طب هنديها جبنة رومي بلاش جبنة بيضا اللي يعرفه المصريين عن أورجواي إن عندها فريق كرة قدم ناشف جدا وعنيف جدا لما بيلعب في كاس العالم بيكسر نص عدد الفرق التانية اللي قدامه فريق بيعتمد خطط دفاعية صارمة بيلعب بالروح بالدم بيخلص يعني عالفريق اللي قدامه اللي يكسبه واحد صفر يبقى كويس منعرفش بقى إن أورجواي فيها مزارع شاسعة وخصوصا مزارع حيوانية للثروة الحيوانية دي معلومة جديدة عرفناها لما نشرت الأهرام إن مصر هتستورد من أورجواي صفقة لحوم حية مقدارها أو قيمتها حوالي 126 مليون جنيه وان الصفقة دي هتكون سبب في انخفاض سعر اللحمة في مصر 50% يعني لو كيلو اللحمة دلوقت في المتوسط في حدود خمسين جنيه بعد الصفقة بتاعة أورجواي لما تيجي ان شاء الله هتلاقوا الكيلو بقى ب25 جنيه طب ما فكرة حكاية أورجواي دي طب مفيش شقق في أورجواي نستوردها ينزل تمن الشقق , طب مفيش شوارع من أورجواي نجيبها فالشوارع عندنا توسع , الحاجة بتاعة أورجواي جاية وكل حاجة هتبقى تمام وبما إننا هنستورد اللحمة من أورجواي بعد ما استوردنا الكحك قبل العيد على طول من الصين فيه كلام إن إحنا كمان هنستورد الخضار والفاكهة من الصين.
رانيا سالم محررة المصور حاولت تعرف الفرق بين الخضار والفاكهة الصيني والخضار والفاكهة المصري فاكتشفت إيه بقى..؟ يا جماعة الكمترى الصيني مفيهاش بذر يعني حدف على طول كده زلط مرة واحدة مفيش بقى تقعد تطلع البذر مفيش الكلام دا مفيش وقت, وبعدين ملمسها من برة ناعمة خالص كده ملمسها ناعم تماما يعني زي ما تكون واخدة وش فلوتو كده.. غير الكمترى البصل الصيني مش زي البصل بتاعنا كده لا بصل حلو جميل يعني ممكن تستخدمه مثلا في الكنافة..الكرنب الصيني بقى مش زي باقي الكرنب اللي موجود في العالم كله الكرنب الصيني ما بيتعملش محشي الورق بتاعه ما بيلفش يدوبك تاخده تقطعه كده سمبوكسات يعني وتستخدمه في السلطة عملته محشي المحشياية تضرب على طول .. التوم الصيني مختلف عن أي توم خالص التوم الصيني بيتقزقز كده زي اللب والسوداني والحاجات اللطيفة دي في مصر في بعض الأجانب بيقبلوا على قزقزة التوم الصيني يبقى لازم يا جماعة نستورد خضار وفاكهة من الصين قزقزة وسلطة وحاجات لطيفة ..ويبدو ان مفيش حد هيقدر يشتكي بعد كده من ارتفاع الأسعار لأنه المصريين زي ما بتقول صحيفة الدستور نقلا عن تقرير رسمي بقى عددهم 38 مليون مشترك في أجهزة الهاتف النقال اللي هو المحمول 38 مليون واحد مصري عندهم موبايلات يعني، كمان فيه زيادة كبيرة في عدد مستخدمي شبكة الانترنت وصل العدد إلى 12 مليون دا طبعا لان إحنا شعب يحب التكنولوجيا جدا نقبل على كل تطور تكنولوجي ونتفوق فيه إحنا بنموت في التكنولوجيا إحنا في التكنولوجيا فظاع ..أما آخر حروب وزير التربية والتعليم الدكتور يسري الجمل فهتكون ان شاء الله نبشركم زي ما بتقول صحافة الأسبوع تحديدا صحيفة الأخبار الحرب هتكون على الدروس الخصوصية الحقيقة أنا مش عارف يعني خلال التلاتين سنة اللي فاتت قرأت الخبر دا كام مرة ..كتيير !! المهم إن الدكتور يسري الجمل هذه المرة قال انه هيوقف تراخيص مراكز التدريب والتعليم اللي هي إحنا بنعرفها باسم إل Centers يعني اللي ولادنا بياخدوا فيها الدروس الخصوصية هيوقفها لمدة ست شهور وأنا مش عارف الحقيقة ليه ست شهور مش لما طلعوا بحكاية الكادر وعملوا الكادر الخاص للمدرسين قالوا إن دا هيلغي الدروس الخصوصية خالص طب ليه الوقف ست شهور بس عموما هنشوف إذا بقى إلCenter اللي جنب بيتي دا فتح تاني هابلغ الوزير على طول..خبر سعيد تاني الحمد لله الوزير أعلن في الأهرام عن توصيل الانترنت إلى 40 ألف مدرسة قريب جدا على فكرة الانترنت زي ما بتقول الأهرام موجود فعلا في حوالي 22 ألف مدرسة ومع ذلك الوزارة بتعترف في صحيفة روز اليوسف ان التلاميذ اللي بيحضروا في بعض فصول المدارس الحكومية بيصل عددهم أو ما يزيدوش عن 4% يعني لو الفصل فيه 100تلميذ بيقعد أربعة بس طبعا مفيش 100, 100 كتير يعني , لو خمسين هتلاقي 2 هما اللي قاعدين طب العيال بتروح فين مش عايزة تروح المدارس ليه مش عارفين ..دكتور يسري الجمل أكد انه بيشجع نشاط الطلاب وانه لن يوقف أبدا زي ما بيقول في نهضة مصر الأنشطة المدرسية يعني الوزارة و الوزير مصممين على استمرار الأنشطة المدرسية لكن في بعض المدارس بيكون موجود 4% بس من عدد الطلبة في كل فصل عشان تقريبا العيال بتروح أل Centers ....
الزميلة بسمة أبو العزم في المصور واضح إنها زعلانة شوية من وزارة التربية والتعليم خصوصا الأسعار الخيالية للكتب الخارجية وتحت عنوان "خدعوك فقالوا إن التعليم مجاني" لاحظت إن الأسر المصرية تنفق حوالي 800 مليون جنيه على الكتب الخارجية سنويا وان هذه الكتب تحتكر إصدارها حوالي 30 دار نشر , 800 مليون جنيه تنفق على الكتب الخارجية الكتب بس أمال إلـCenters بيتصرف عليها قد إيه!! عموما فيه وقف 6 شهور بعد 6 شهور بقى انتو حرين ..
ومن حصاد التعليم إلى الحصاد المر للرز اللي بتقول روز اليوسف انه كان بدأ موسم زراعته بأزمة مياه ثم بعدما زاد الإنتاج تحول إلى أزمة أنتجت وأفرزت وغطتنا بالسحابة السودة أما احدث أسباب السحابة السودة فقد اكتشفتها الأخبار اللي قالت ان الناس اللي بيحرقوا كاوتش العربيات هما السبب بالتحديد في ظهور السحابة السودة خلال الأيام الماضية في منطقة المعادي اشمعنى المعادي بالذات طب ما الكاوتش ما بيتحرقش في كل حتة في مصر يعني الكاوتش عندنا بيعمل سحاب فظيع ..الجمهورية اهتمت بكلام وزير البيئة الدكتور ماجد جورج أمام مؤتمر حماة الحياة خصوصا إعلانه إنشاء فرع لوزارة البيئة في كل محافظة لإحكام الرقابة على التلوث يارب بقى الفروع بتاعة الوزارة اللي المفروض إنها تحكم الرقابة على التلوث وخصوصا السحابة السودة ما تتسببش إنها تفرع السحابة السودة عشان تعرف تراقبها أهي موجودة دلوقت وإحنا متعايشين معاها تتفرع اكتر من كده هنروح فين ..في الأخبار وزير البيئة ومحافظ الشرقية يفتتحان أول مصنع لإنتاج الوقود الحيوي من قش الرز خطوة مهمة جدا بس ربنا يستر وما يبقاش فوق المصنع سحابة سودة جديدة عشان مش ناقصين ..
مصر منورة بأهلها عبارة شعبية منتشرة جدا حافظينها وبنكررها لكن الجديد إن مصر منورة بـ115 مليار كيلو وات كهربا حسب احدث تقرير للجهاز المركزي للتعبئة والإحصاء الناس عمالة تشتكي من زيادة الأسعار لكن مصر منورة ب115 مليار كيلو وات ساعة إحنا منورين قوي يا جماعة منورين يا جماعة .. الوفد نعت هذا الأسبوع سيبويه وأبو حيان التوحيدي وفي تحقيق فريد عن اللغة اللي بيستخدمها الشباب لاحظت الصحيفة اختفاء عبارات كانت راسخة في أذهان الناس ودايما على السنتهم زي من فضلك , لو سمحت , لو تكرمت , لا شكر على واجب.. الشباب بقى استبدل الكلام دا بكلام تاني خالص زي كبر, نفض , احلق له .. بمناسبة الحلاقة روز اليوسف نشرت حكاية زوج قررت زوجته خلعه لأنه حلق شنبه الراجل لما راح عند الحلاق روق نفسه كده والراجل دخل البيت الست شافته من غير شنب أتسرعت بقى وقعت طبت أغمى عليها يعني فوقوها بصت للراجل قالت لا مش دا اللي أنا اتجوزته أنا عايزة راجل بشنب وراحت خلعته.. أول مرة اعرف إن الشنب مهم قوي كده في الجواز مش مشكلة بقى ..........
ومن الأهرام خبر منقول عن جريدة أل SUNالبريطانية اللي نشرت دراسة نفسية واجتماعية رصدت إن الراجل بعد سن الخمسين بيكون أكثر جاذبية والراجل تحديدا لما يوصل لسن التلاتة وخمسين – أل SUNالبريطانية هي اللي بتقول كده- بعد م الراجل يوصل سن ال53 بيكون أكثر رومانسية الراجل يوصل بقى لل53 يبتدي الرومانسية.. لسه كتييير بقى على م الواحد يبقى رومانسي.. اهو كلام ........ والسلام
محمد صلاح: كل الصحف المصرية اليومين دول بتكتب عن الأزمة المالية العالمية ..صحفيين كتير مش متخصصين في الاقتصاد تحولوا إلى خبراء في المال والبورصة ويكتبوا عن الأزمة وتداعياتها ..الصحف اللي ما كانتش لاقيه حدث مثير وقعت على صيد ثمين وبدأت تحلل وتكتب و تصور للناس طبيعة الأزمة واللي ممكن تؤدي إليه في المستقبل لكن يظل هناك سؤال هل ما كتب في الصحافة المصرية كله صحيح هل التداعيات التي تحدث عنها بعض الصحفيين وبعض الخبراء كلها تؤدي إلى رؤية المستقبل بشكل صحيح..؟ يجاوبني على كده واحد من اكبر الخبراء الاقتصاديين المصريين ورئيس وزراء مصر السابق ورئيس مجلس الشورى السابق يبقى مطلوب منه انه يطمنا ويوضح لنا, وضح لنا يا دكتور ملاحظاتك إيه حول ما نشر حول هذه الأزمة
د.علي لطفي- رئيس وزراء مصر الأسبق: ملاحظاتي الحقيقة انه جزء كبير مما نشر خطأ وقبل ما أقول إيه هو الخطأ هاقول إن اثر هذا الخطأ كان خطير على البورصة والمستثمرين في البورصة
محمد صلاح: أزاي يا دكتور
د.علي لطفي: إيه الخطأ اللي حصل .. اللي حصل إن إحنا عندنا بورصة فيها أجانب والأجانب معاملتهم تمثل من 30 إلى 40% يعني نسبة كبيرة
محمد صلاح: طبعا
د.علي لطفي: لما حصلت الأزمة في أمريكا وأوروبا كان طبيعي أنهم ينسحبوا ..مش بينسحبوا عشان الاقتصاد المصري ضعيف ..لا.. بينسحب عشان عنده أزمة اقتصادية في الخارج وعنده نقص سيولة فيعمل على طول فاكس أو تليفون أو email للسمسار
محمد صلاح: يسحب من هنا عشان يضخ هناك عشان يعالج الموقف هناك
د.علي لطفي: بالظبط كده .. السمسار يبيع ياخد الفلوس بالجنيه يحولها بالدولار يحولها له على برة.. طيب لما يبيع يبقى العرض جرى له إيه ..؟ العرض زاد لما العرض يزيد السعر يجرى له إيه ..؟ السعر يقل لما السعر قل بقى هنا حصلت حاجة بقى خطأ من الصحفيين ييجي يحسبها يقولك النهاردة السعر قل قد كده عندنا أسهم قد إيه يضرب في بعضها يقولك البورصة المصرية خسرت اليوم 15 مليار جنيه ..يا ساتر يارب!! ما خسرتش ولا مليم دي إحنا بنسميها إفرازات خسارة ورقية ..دا لو كل الأسهم اللي في البورصة اتباعت بالسعر الجديد اللي هبط يبقى الخسارة 15 مليار ولكن مادام ما اتباعتش يبقى الخسارة فين ..؟ مفيش خسارة..إيه بقى الخطورة هتحصل ان كثير من المتعاملين في البورصة المصريين تاني يوم الصبح بيجري تقوله شفت مش قلت لك نبيع أمبارح يا أخي نلحق النهاردة قبل بكرة ما تنقص تاني
محمد صلاح: طيب يا دكتور علي حضرتك بتقول إن كثير هيندفعوا يعني أصلا واضح إن الثقافة الاقتصادية مش موجودة عند الناس حتى اللي بيساهموا في البورصة
د.علي لطفي: فيه حاجتين زي ما حضرتك بتقول يا أخ صلاح إنها مش موجودة عند معظم المتعاملين يعني قول 90% ، 10% بس اللي عارفين بورصة يعني إيه يعني إيه وسند والكلام دا كله . وفيه سبب تاني غير هذا الكلام إن هي أنا باسميها سياسة القطيع أنت عارف يا أستاذ صلاح القطيع بيمشي كله بيمشي ورا بعضه عشان الاولاني ماشي فدا باع دا باع طب ما نبيع إحنا كمان شوف أزاي الحمد لله إحنا بعنا أمبارح أهي النهاردة نزلت تاني طب ما أنت اهه اللي نزلها لان العرض زاد إنما أنت لو احتفظت بالسهم عندك هتطلع تاني البورصة ولذلك أنا في برنامج آخر أتكلمت من كام يوم وقلت الكلام دا ناس فعلا بطلت إن هي تبيع والسعر ارتفع 3% بس برضه بدأت تنخفض تاني
محمد صلاح: لان اللي خسر يا دكتور علي تقريبا يعني حسب فهمي في عالم المال والبورصات هو خسر لأنه باع لو ما باعش هيظل سهمه كما هو ويمكن في مرحلة لاحقة يصعد مرة أخرى
د.علي لطفي: مش بس كده دا أنا قلت للناس إن هذه المرحلة هي أحسن فترة للشرا لان الأسعار منخفضة وهترتفع هترتفع الوحيد اللي مضطر انه يبيع اللي يكون مستلف, السهم مش بفلوسه خد فلوس من ناس أو اقترض من بنك أو إلى أخره أو اللي عايز سيولة عشان عليه شيكات اجلها جه بس دول مش كتير إنما الباقي أنت تبيع ليه أي واحد يسألني أقوله بتبيع ليه دلوقت اصبر حرام أنت كده بتخسر فلوسك ولو صبر زي ما حضرتك قلت الأسعار هتزيد ويبقى ما حققش أي خسائر
محمد صلاح: طب فين الخبراء الاقتصاديين يا دكتور على في مصر اللي يحاولوا يفهموا الناس الكلام اللي حضرتك بتقوله لما بدأت الأزمة عشان مايحصلش هذا الاندفاع نحو بيع الأسهم في البورصة
د.علي لطفي: والله هما موجودين وبرنامج حضرتك الناجح دا وكثير من البرامج فيها بعض الخبراء اللي طبعا فاهمين الكلام دا وبيقولوه بس الناس بتمشي في سياسة القطيع كتير الحقيقة من غير ما يكون عندها ثقافة اقتصادية سليمة
محمد صلاح: طب من بين ما نشر يا دكتور علي كلام واتقال برضه في بعض البرامج ان هذه الازمة سوف تؤدي إلى انهيار النظام الرأسمالي وعودة الأنظمة الاشتراكية وحتى ناس أتكلمت على الوضع في مصر انه الحل في عودة القطاع العام مرة أخرى إيه رأيك
د.علي لطفي: دول كانوا أرانب مستخبية لامؤاخذة يا أستاذ صلاح وبدأت تقب.. فرصة ..إيه الكلام اللي بيقولوه دا !! لا ردة ولا عودة إلى نظم الشيوعية والاشتراكية مرة اخرى إحنا يعني ملكيين اكتر من الملك تعال شوف الاتحاد السوفيتي سابقا أصبح النهاردة الاتحاد الروسي وانطلق وبدا يرجع Super power تاني ينافس الولايات المتحدة بقى شكله إيه.. دا يرجع تاني للشيوعية والاشتراكية والقطاع العام والخراب إلي شفناه منه!! أنا بقول لدول لا يمكن ان يحدث هذا إحنا في مرحلة معينة فيها أزمة أو فيها كساد أو مشكلة , سنوات محدودة قد تكون سنة أو أتنين على الأكثر ويعود النظام الاقتصادي الحر كما كان وهذه هي طبيعة النظام ..
إنما الاقتصاد الحر يا أستاذ صلاح مش معناه إن الدولة لا تتدخل ومش فاهمين الأمور طب ما النهاردة أمريكا تدخلت بضخ 700 مليار دولار , الاتحاد الأوروبي تدخل بضخ تريليون دولار يعني ألف مليار دولار واشتروا بعض البنوك يقولك آه رجعوا للتأميم , دا مش تأميم دا حل لإنقاذ مشكلة لحل مشكلة دا موقف معين لفترة معينة كل شيء هيرجع زي ما كان تاني ، فهذه ليست ردة ولن تكون ردة وسوف يستمر الاقتصاد الحر لأنه ثبت انه أحسن نظام ..النهاردة العالم اللي فيه حوالي 200 دولة لا يوجد غير دولتين أتنين على وجه التحديد اللي بيتبعوا النظام الاشتراكي اللي فاضلين وعشان المشاهد ما ينساهمش الاتنين بيبداوا بحرف الكاف كوبا وكوريا الشمالية
محمد صلاح: دكتور علي فيه ناس برضه كتبت من بين ما كتب وما قيل ان المرشح الديمقراطي باراك اوباما ربما يعتمد أيضا بعض السياسات الاشتراكية هل الأزمة زي ما كتب ونشر عنها بتعبر عن أسباب سياسية وللا أسباب بالفعل مالية اقتصادية تجارية
د.علي لطفي: لا أنا اعتقد أنها مالية اقتصادية تجارية اكتر منها سياسية يعني بعض الناس يقولك مثلا سياسة أمريكا في أفغانستان وفي العراق وكلفتها كام مليون بس مش هي دي السبب دي أدت إلى مشاكل في الاقتصاد الأمريكي في الديون اللي على أمريكا النهاردة أمريكا بقت اكتر دولة مدينة في العالم عجز في الموازنة العامة في الدولة عندها إنما دي حاجة واللي بيحصل النهاردة في البنوك والبورصة حاجة تانية , اللي بيحصل انه نشأ من خطأ في البنوك في التمويل العقاري ودا من 2007 بدا طب تفاقم لغاية يوم الاتنين اللي بنسميه الاتنين الأسود 15 سبتمبر اللي أعلن فيه إفلاس البنك الكبير الرابع في أمريكا ..القضية باختصار شديد عشان برضه السادة المشاهدين يبقوا معانا إن البنوك في أمريكا من سنتين تلاتة بدأت تتوسع في الإقراض العقاري أنت عايز شقة تعالى خد تملك شقتك يقوله ما معاييش المقدمة يقوله مش مهم هاديك 100% من قيمة الشقة بعض البنوك لقوها دلوقت لما بيفتشوا بقى ويراقبوا مديه 105% يعني شقة ب100 ألف دولار يديله 105 ألف وخمس تلاف يقوله روح اعمل بيهم فرح أتجوز أو روح هات بيهم ديكور بتاع الشقة كمان طبعا ما يحصلش الكلام دا خالص وسعر الفايدة منخفض وسداد زي ما أنت عايز
محمد صلاح: ليه البنوك بتعمل كده يا دكتور
د.علي لطفي: عايز يكسب..بيكسب
محمد صلاح: عايز يطلع قروض
د.علي لطفي: عايز يطلع السيولة اللي عنده كانت موجدة ويكسب ويشتغل وبعدين عمل إيه تاني بقى خد الشقة اللي سلف عليها دي وراح رهنها لما رهنها راح عامل عملية توريق ..توريق يعني ايه برضه للسادة المشاهدين ببساطة يعني حول المسالة إلى ورق اللي هو سندات ويدفع رشوة لشركة من الشركات اللي بنسميها "راتينجاجنسيس"شركات تقييم تيجي الشركة دي تختم وشركة التامين تامن إن السند دا مضمون وكويس وهو مش مضمون ولا حاجة ، يروح بنك تاني وياخد منه قرض وياخد القرض ويشغله تاني عشان كده بنك لما وقع ، وقع بنوك جنبه التداخل الموجود دا.. لما حصل بقى بعد كده في 2008 جه البنك المركزي الأمريكي اللي هو بنسميه إل"فيدرال ريزرف" زود سعر الفايدة فالمستفيدين وأصحاب الشقق ما قدروش يدفعوا الأقساط لما ما قدروش يدفعوا الأقساط عندهم نظام بعد قسطين ياخد الشقة منهم لما ياخد الشقة عشان يبيعها فالمعروض زاد فهبطت الأسعار الشقق وانكشفت البنوك ونقصت السيولة دا أساس المشكلة
محمد صلاح: برضه الناس مما نشر ما فهمتش ليه الأزمة بقت زي المتوالية العددية ليه انتقلت إلى أوروبا وربما طبعا إلى دول الخليج والبورصات الأخرى والأسواق أيضا والمصارف والبنوك
د.علي لطفي: لان النهاردة في ظل العولمة والاندماج وبطبيعة النظام المصرفي هناك تداخل بين البنوك وبعضها البعض بنك في أوروبا ليه مراسل في أمريكا شايل عنده فلوس عند البنك الفلاني فاتح اعتماد هنا دي كلها حاجات متداخلة مع بعضها البعض فلما بيحصل نقص سيولة في بنك بيحصل ما يقدرش يدفع للبنك الأوروبي البنك الأوروبي يحصل عنده نقص سيولة ما يقدرش يدفع للبنك التاني أنت عارف حضرتك بنسميها إيه ..؟ دومينو ثيوري أو نظرية الدومينو, الدومينو دي عبارة عن إيه عارف لما نحط الخمسة جنب الخمسة والستة جنب الستة لو واحدة وقعت كله بيقع أو زي السبحة لو اتفكت واحدة فيها هتكر لان البنوك كل أعمالها متداخل مع بعضها البعض فكان لابد أن يحدث هذا
محمد صلاح: دكتور على متخيل أزاي الصحافة ووسائل الإعلام تتعامل مع الأزمة في الوقت الراهن بعد ما الناس إلى حد ما فهمت إن فيه أزمة صدرت بالفعل إلى باقي دول العالم خارج الولايات المتحدة على الناس إنها تعمل إيه على الصحافة إنها تفهم الناس في فترة مقبلة يتعاملوا اقتصاديا وماليا أزاي ؟
د.علي لطفي: شوف يا أستاذ صلاح أنا من المؤمنين بدور الصحافة ..الصحافة دي حاجة خطيرة جدا يعني أي صحفي خصوصا المبتدئين لازم يعرفوا كلهم بيلعبوا دور خطير جدا في أي مجتمع مش بس عندنا أنا الحقيقة في يوم من الأيام كنت باتمنى إني أكون صحفي
محمد صلاح: والله
د.علي لطفي: آه والله دي مهنة محترمة جدا بأحبها قوي
محمد صلاح: إحنا خسرناك فعلا في الصحافة المصرية بس كسبناك كخبير اقتصادي وخبير في الجامعة ورئيس وزراء لمصر وفي نفس الوقت رئيس لمجلس الشورى وهكذا
د.علي لطفي: الحمد لله الصحافة دي عبارة عن صلة الهمز بين الحكومة والشعب الصحافة هي البوتقة التي تنصهر فيها مختلف الآراء الصحافة هي النافذة التي نفتحها تدخل منها أشعة الشمس فتنقي المجتمع من الجراثيم الفيروسات الصحافة مهمة قوي
محمد صلاح: كان كلام حلو بقى .. اللي حاصل بقى
د.علي لطفي: آه إيه بقى المطلوب من الصحافة دلوقت أولا إنها تنقل وبأمانة للمواطن ما يجري في العالم وفي مصر يوميا فيه تطور يومي في هذه الأزمة المالية دون مبالغة دون تهويل دي نمرة واحد...نمرة أتنين إنها تستعين بالخبراء تقولهم تعالوا قولوا لي زي ما حضرتك بتكلمني دلوقت قولوا لي ايه اللي ينكتب وإيه اللي يتقال مش كل واحد معاه قلم يكتب أي حاجة ما يخوفش الناس لما تنزل البورصة 2 أو 3% و 5 وللا أقصى يوم نزل 10 أو 15 % مفيش كارثة حصلت , المهم الاقتصاد الحقيقي الاقتصاد العيني الاقتصاد المادي هل الأرض الزراعية النهاردة ما بتنتجش اللي كانت بتنتجه هل مصانعنا ما بتتجش اللي كانت بتنتجه هل فنادقنا حصل فيها أي حاجة في السياحة طب ما كل شيء موجود دي حاجة ورقية تشرح هذا الكلام للمواطن وتديله نوع من الطمأنينة دا مش نفاق من الحكومة ولا الحزب الوطني ..لا.. دي الحقيقة إنها خسائر ورقية يا مواطن اللي معاك أسهم وسندات أوعى تروح تبيع بكرة استنى دي بداية فلوسك هتضيع دي نصيحة بانقل له صورة حقيقية للتطورات اليومية وبعدين نمرة أتنين طمأنة المواطن دلوقت اخر حاجة بقى انها تساعد الحكومة بمعنى إيه عشان نكون صرحاء بقى هل الاقتصاد المصري برئ 100% من الأزمة ..لا..قطعا هيحصل بعض التأثيرات الحكومة نفسها اجتمعت والرئيس مبارك اجتمع معاهم وقيل بعدها تاني يوم على طول انه توقع هيحصل نقص في الصادرات نقص في السياحة نقص في دخل قناة السويس يعني تحويلات المصريين أربع خمس" ايتمز" او نقط دول هيتاثروا أقوم من النهاردة استعد طب إيه اللي هاعمله عشان العجز دا ما يحصلش عندي آه تعالوا يابتوع الصادرات اجتمع مع رجال الأعمال مع المصدرين انتو عايزين إيه عشان نشجعكوا نديكوا مبلغ زيادة في الدعم نديكوا إعفاء ضريبي نساعدكوا في الشحن والتفريغ نبسط لكوا الإجراءات دا دور الصحافة إنها عن طريق المتخصصين عندها وكتاب الأعمدة المحترمين عندنا ناس محترمين جدا في الصحافة يكتبوا في هذه الكلام ..السياحة طيب النهاردة السياحة بتاعة أوروبا وأمريكا السائح النهاردة عنده الأزمة اللي هو عايش فيها هيقول لشركة السياحة احجز لي أروح اتفرج ع الهرم ، هرم إيه دلوقت مش وقته دا اللي هيحصل طبعا الأغلبية هيعملوا كده ما قعدش ساكت بقى اقوم اطلع على طول مجموعات تطلع على بلاد بديلة يروحو جنوب أفريقيا على جنوب شرق أسيا على أمريكا اللاتينية المكسيك والبرازيل بالذات الدول الكبيرة دي ويبتدي يعرض فيها السياحة في مصر وهكذا دور الصحاف برضه التالت هنا انهم يبتدوا يساعدوا الحكومة ويلقوا الضوء على كيف يمكن أن نواجه الأزمة وان نتجنب آثارها
محمد صلاح: حضرتك شايف ان القناعات السياسية والمواقف السياسية يعني تسببت في انه بعض الصحف تتعامل مع الأزمة بأنتهازية عشان تضغط على الحكومة مثلا والحزب الوطني فبقت تستخدم الأزمة في إثارة الناس أو يعني توصيل معلومات خاطئة للناس
د.علي لطفي: عدد قليل من الصحف المعارضة أو المستقلة عدد قليل الحقيقة ومعلش برضه يمكن بقول عدم معرفة مش مقصود بيها استفزاز الحكومة أو مزايدة على الحكومة أو حاجة زي كده إنما بعضها بكل تاكيد كان بينتهز فرصة لتأليب الشعب على الحكومة دا مش مطلوب الحقيقة يعني أنا نفسي نعرف كلنا إننا في مركب واحدة حزب وطني ومعارضة حكومة وشعب كلنا في قارب واحد زي ما بيقولوا لا قدر الله مش عاوز أقول الكلمة غرقنا ما كلنا هنغرق فيه ولو هنقب ما كلنا هنقب معاه فعدد قليل منهم وأرجو إنهم يتوقفوا عن هذا
محمد صلاح: طب إحنا عايزين نستخدم موهبتك الصحفية القديمة لو بنختم الفقرة بمقال قصير جدا بعدة عبارات عن الأزمة وتداعياتها و أزاي الناس هتتعامل معاها في المستقبل ..الصحفي الدكتور علي لطفي يقول إيه
د.علي لطفي: يعني انا باتصور إني باكتب عامود وبقول صباح الخير لكل السادة القراء وبقولهم خليكوا دايما متفائلين وانظروا معي إلى النصف الممتلئ من الكوب والنصف الممتلئ بيقول اقتصادنا بخير وبلادنا بخير بنوكنا لن تتأثر ، شركات التامين لن تتأثر الوحيد اللي تأثر هو البورصة آه .. البورصة اتاثرت إنما دا هبوط مؤقت نتيجة خروج الأجانب ونتيجة إن المصريين للأسف كثيرين اندفعوا للبيع والأمور دي كلها هتنصلح إن شاء الله بس خلينا كلنا نعمل معا زي ربنا ما بيقولنا " وقل اعملوا فسيرى الله عملكم ورسوله والمؤمنون " تعالوا مع بعضنا البعض زي ما ربنا سبحانه وتعالى ما بيقول لنا " وتعاونوا عل البر والتقوى ولا تعاونوا على الإثم والعدوان " علي لطفي
محمد صلاح: دا صحفي قديم ..نورت يا دكتور
محمد صلاح: فيه صحفيين كتير في مصر لو كتبوا أي شيء الناس بتحب تصدقه ..صحفيين تانين لو كتبوا في أي شيء الناس واخدة موقف منهم
فيه صحفي متخصص وفيه الصحفي الكشكول اللي بيكتب في كل حاجة لكن دايما المتخصصين في الشئون العربية في مصر نادرين مش موجودين كتير واصلا اللي بيكتب منهم في الشئون العربية يتنقل من بلد إلى آخر ربما أعداد منهم غير متخصصة في دراسة بلد بعينه ..لبنان حالة من الحالات العربية من كام سنة
قليلين ليه اللي بيفهموا في السياسة اللبنانية يا جيلان ليه قليلين
جيلان جبر- كاتبة صحفية: أولا مساء الخير.. قليلين لان الملف اللبناني صعب الملف اللبناني متداخل الملف اللبناني فيه 18 طائفة فيه عدة أحزاب فيه عدة مناطق فيه حرب أهلية دامت اكتر من 30 عام عشان يفهمه لازم يبقى بيحبه وفاهمه
محمد صلاح: من الخبرة من كتر المتابعة يبتدي الصحفي أو الصحفية يعني يكون متابع للأحداث وبالتالي في مرحلة لاحقة يقدر يحللها وللا زي ما بتقولي لازم يحب الملف
جيلان جبر: لازم يحب أولا أو يكون راح لبنان يكون شاف الشغل دا ع الأرض يعني لو ما شفتهوش ع الأرض وسالت الناس وقربت منهم وشفت المناطق وتقسيمها والجبال مش ح تقدر تفهمه من بعيد وهتلخبط بين الاسامي لأنه الأحزاب كتير والاسامي كتير زي ما بنقول ف صعب والتاريخ طويل كل واحد يحمل تاريخ من الحروب وتاريخ من المعارك ف متبقاش عارف دا تبع مين ودا تبع مين وبعدين هما بيتحولوا كتير يعني التحالفات في لبنان كل مرة بتتغير فلو محدش راح ع الأرض أو حب الموضوع مش هيبقاله صبر كتير في الآخر هيزهق
محمد صلاح: على الأرض مش الوضع هناك في احيان كتيرة بيكون صعب وبيكون خطر دا ممكن يخلي الصحفيين على إنها ماتقبلش إنها تروح كتير هناك
جيلان جبر: فيه جاذبية معينة لبنان حتى من الناحية السياحية ومن الناحية الصحفية يعني اللعب السياسي في لبنان للصحفي أو للسياسي بتحس بمتعة معينة بتحس بديمقراطية يمكن ديمقراطية بتولع الدنيا أنا ما بقولكش إنها دايما صائبة يعني
محمد صلاح: الديمقراطية هناك عاملة مشاكل
جيلان جبر: بس ممتعة يعني بتحس بأنه الجراءة الديمقراطية الأحزاب تحرك الأحزاب الحزب التعبان بيبان فهناك أحزاب قوية كلها الأحزاب التعبانة ما بتقعدش كتير على الساحة اللبنانية
محمد صلاح: طب قيمي لي الصحافة
محرر بالموقع الموحد للهيئة الوطنية للإعلام
حذر الدكتور أحمد صفي الدين، أخصائي جراحات العيون، من مخاطر التهابات ملتحمة العين المتكررة، خاصة بين الأطفال، مشيراً إلى أن...
يوضح الشيخ سلامة، عضو مركز الأزهر العالمي للفتوى الإلكترونية، اليوم الجمعة عبر برنامج "أنوار ذي الحجة"، أعمال يوم التروية (8...
يقدم لكم الشسخ عبد الله سلامة عضو مركز الأزهر العالمي للفتوى الإلكترونية نصائح هامة للحجاج لتجنب التدافع والحفاظ على الحالة...
قبل السفر الحج.. هناك خطوات ضرورية لابد من اتباعها حتى تكون رحلتك مقبولة وميسرة.