press_center
تقديم:عمرو الليثى
تاريخ الحلقة :12/2/2008
الضيوف :
اللواء اركان حرب /جمال حماد مؤرخ الثوره ومن الضباط الاحرار
ياسين سراج الدين/عضو الهيئه العليا لحزب الوفد
ليلى تكلا/ كاتبة بجريدة الاهرام .
لميس جابر/باحثه فى التاريخ المصرى المعاصر..واخرون
عمرو الليثى:اتخذت ثورة 23 يوليو موقف متحيزا مما سبقها من احداث تاريخيه فتعرضت لاحداث كثيره اما للحذف او للتشويه ومن ثم كان لزاما علينا ان نعيد تلك الملفات بشكل موضوعى وبعيد كل البعد عن اى تحيز لكى يستطيع جيل بأكمله ان يقف على الاحداث التاريخيه لبلاده ولازاحة الستار عن الكثير من الغموض الذى اكتنف بعض تلك الشخصيات ان الاوان ان نكشف الستار عن فتره من اهم فترات حكم مصر ألا وهى فترة حكم الملك فاروق الاول شهد عام 1946 تدهورا ملحوظا فى شخصية الملك فاروق بسبب استهتار الملك الشاب بمشاعر المصريين واخذت الصحف تنشر قصص ومغامرات الملك العاطفيه والذى ارتبط اسمه بكثير من الفنانات والراقصات امثال : اسمهان وكامليا وساميه جمال .
وقد سأل الاستاذ انيس منصور الراقصه ساميه جمال عن علاقتها بالملك فاروق فقالت وحلفت على المصحف انها على علاقه به وعرف الاستاذ انيس منصور من قريب له يعمل طبيب امراض نساء كان يعالج الفنانه كامليا انها مريضه مرض نسائى يمنعها من اقامة اى علاقه مع الملك او غيره هذا للامانه المهنيه لازم نقول الاراء الاخرى فى هذه الواقعه.
اللواء /جمال حماد :-اعتبارعام 1946 تغير الملك اولا تغير فى منظره بعد ما كان شاب وسيم بدأ يكون الرجل السمين الشيك اللى ابتدأ يقعد كل ليله فى السيارات يلعب قمار طول الليل
ياسين سراج الدين: بعدين حواليه شله من اردأ الشلل التى عرفها التاريخ يعنى شله بغيضه جدا معظمهم ايطاليين حاشيه ايطاليه وابتدت الناس تعرف الكلام ده ده كان بينزل وسط الناس عادى جدا شوفتى بنفسى يعنى ماكانش حد بيحكي لى انا شفته بنفسى فى ملاهى ليليه وشفته على البحر هو لوحده .كان فى منتزه بيعمل واك اب فابتدى يسمن فكان بيعمل رياضه اظن كان 46او47 حاجه كده وراجع من منتزه هو لما بيعمل رياضه بيعطش قوى فهو رايح لراجل فى كشك عنده حاطت تلج وعليه الحاجات الساقعه فوقف عنه وقاله انا عاوز اشرب حاجه ساقعه بس ممعيش فلوس وكان لابس جلابيه حرير قاله اتفضل فقاله بس انا ما بشربش واحده انا بشرب اربعه او خمسه فقاله اشرب اللى انت عاوزه وقاله هابعتلك الفلوس فشرب خمسه ولما رجع وكان فى راس التين وقتها فقاله يا يوسف عاوز ادى للراجل ده فلوسه بس جنيهات ذهب فراح للراجل ووقف قدامه بالعربيه الراجل جاى ع العربيه فقاله هى الليله بتاعت الاغنيه المفلسين فقالله لا الراجل اللى كان هنا بعتلك ده ففتح الكيس فوجد خمس جنيهات ذهب على كل ازازه جنيه ذهب فقال له ايه ده ذهب قاله ليه يعنى هو الملك فاروق قاله ايوه.
أ.محمد عوده:ابتدى كمان يعمل رحلات فى الخارج وهذه الرحلات كانت بتعمل فضايح فى الخارج لانه كان بيقولك انه استدعى المغنيه الفلانيه وساميه جمال الراقصه بيقولك راقصة مصر الرسميه وكان شيخ الازهر عبدالمجيد سليم كان طلب ميزانيه للازهر فمدلوش الميزانيه فى الوقت اللى كان هو فى كابرى وعمال يرقع ويلعب هناك والعاشقات والقمار والحاجات دى فالراجل عبدالمجيد سليم قال تقطير هنا واسراف هناك فاتفهمت العمليه عالطول هو يقصد ايه فراح تصور نحى الشيخ عبدالمجيد سليم عن منصبه .
الصحفية / ليلى تكلا:قال انه كان مسرف وهو كان مسرف بلا حساب ابدا هو كان بيطلب مخصصاته من وزير الماليه وقيل انه كان بيحرى وراء الارتيستات فى دهاليز القصر هذا غير صحيح .
أ. لطيفه سالم:انا كتير بتسأل هل فعلا فاروق كان زير نساء هو كان عند فاروق ناحيه نفسيه كان بينبسط جدا لما الناس تعرف عنه كده يعنى كان ممكن يعرف واحده يوم واحد بس ويخدوله صور وكده انه عرفها وبعد كده يسبها كانت له تركيبه معينه فى علاقاته بالنساء يعنى مقدرش اقول انه زير نساء ومقطع السمكه وديلها لا انما كان له نظام معين .
الوزير/مصطفى الطويل:علاقاته النسائيه كانت علاقات لا تليق بيه وعلاقات مبتذله وطبعا الانجليز عرفوا والامريكان كانو بيتسابقوا البنات المجندات الانجليزيات والامريكات واخطر من كده هذا الكلام حتى لانسون فى مذاكراته لانسون راح لحسين سرى باشا وقاله انه الملك بتاكوا بيسهر مع واحده قواده يهوديه من احد الاسر اليهوديه كان فى خمس اسر يهوديه بيسيطروا على الماليه فى مصر ودى كانت واحده منهم فالمندوب السامى البريطانى بيلفت نظر حسين سرى ان الملك فاروق كل سهراته فيها ودى بتشتغل لصالح اسرائيل .
السيد البدوى/التجاوزات اللى اوخذت عليه انه كان مثلا خروجه وسهره والحاجات اللى زى دى دى مسأله بالنسبه لشاب عاديه لما كان بيسمع ان فى مثلا مغنيه اجنبيه كويسه جات من بره فبيروح يسمعها .
عمرو الليثى:فى عام 1947اعلنت بريطانيا عزمها عن انهاء وجودها فى فلسطين فى 14مايو عام 1948وهنا برزت مشكلة فلسطين كأول مشكله تواجه جامعة الدول العربيه التى هدد الامين العام عبدالرحمن باشا عزام باندلاع حرب عربيه صهيونيه فى حالة عدم تسوية مشكلة الفلسطينين واقامة دوله يتعايش فيها الاسلام والمسيحيه واليهوديه فشعر الملك فاروق بعجزه عن التراجع عن السياسه التى بدأها وراء انه من العار التخلى عن التزام مصر تجاه مشكلة فلسطين فكانت حرب فلسطين .
الباحثه/ لميس جابر:قبل 15 مايوقبل اعلان قيام الدوله اليهوديه قرر فاروق دون الرجوع الى النقراشى انه يرسل كتيبه واحده وهو القائد الاعلى للقوات المسلحه واحنا مدخلين كتيبه واحده علشان تحمى العريش من اى حد يخش .
السيده /هدى اباظه:اعتقد ان الدافع كان خوف من الاقتراب على الحدود مع وجود عصابات يهوديه وتدفق اللاجئين الى الحدود .
عمرو الليثى:رحل البريطانيون عن فلسطين وسارع بنجوريون باعلان دولة اسرائيل المستقله بمصر رغم تصاعد الازمه كان بعض المسؤلين غير مقتنعين بفكرة الدخول فى حرب مع اسرائيل وفاتحو الملك فاروق فى ذلك .
المؤلفه/ سهير حلمى:النقراشى باشا كان رافض تماما فى البدايه دخول مصر الحرب رسميا وكان بيقول انه راح مجلس الامن وعرض قضية مصر وكان سنده وقوته وحجته الجيش المصرى الجيش المصرى كان قادر على حماية قناة السويس امام ادعاءات بريطانيا فميقدرش يعرض الجيش لأى مخاطر بمعنى انه كان يعتقد انه من الصعب ارسال جيوش خارج مصر وفى القوات البريطانيه رابطه فى القنال فهو كان وظل عمره مقتنع بالقضيه المصريه وانها كان لها الاولويه فى اجندة النقراشى .
الباحثه/ لميس جابر:الرأى العربى كان محتقن جدا وعاوز يحارب وهتافات فى الشارع وناس بدأت تتطوع الاخوان بدأوا فى عمل فرق تدريب وارسلوا بالفعل فرق متطوعين ودخلوا اراضى فلسطين وقعدوا يحاربو وطلب احمد عبدالعزيز قائم مقام ايامها انه يعمل فرقه من المتتطوعين كان معاه متطوعين عرب اظن سعوديين ومشى فى موكب فى وسط الناس والناس كانت بتهلهل ليه وسافر كفرقه متطوعه وكان القرار اللى اتخذ ما بين النقراشى والملك اننا لن ندخل حرب نظاميه دول شوية عصابات فاحنا ندخل حرب عصابات .
المؤلفة/ سهير حلمى:وتم الاتفاق على تدعيم الجبهه الفلسطينيه والمتطوعين الفلسطينين اللى هم ادرى الناس بشعوبها لان الجيوش النظاميه العربيه كانت ستجد صعوبه شديده جدا فى جغرافية فلسطين فتم الاتفاق على دعمهم ب10الاف بندقيه و500متطوع من السبع دول عربيه اللى هى : مصر والعراق والاردن وسوريا ولبنان و اليمن والسعوديه وقوات فلسطين وكان بنجوريون بيطلق عليهم الوحوش السبع .
المؤرخ/ جمال بدوى :الملك فاروق بحكم انه القائد الاعلى للقوات المسلحه وانه المهيمن على شؤؤن البلاد وبحكم ان وزارة محمود فهمى النقراشى 48كانت بالنسبه له مسأله ثانويه وانه هو المتحكم بأمره زى ماقولنا سلطات القصر القصر يريد ان يحكم ويملك من منطلق هذه الفكره اتخذ فاروق قراره .
السيده/ هدى اباظه:النقراشى لم يرفض النقراشى كان متحفظ فى قراراعلان الحرب ؟
الباحثه /لميس جابر:بالنسبه للنقراشى كانت شخصيته مطيعه مكانش معارض كان لازم يسمع الكلام .
اللواء /جمال حماد:كان فعلا كتب استقالته و كانت فى جيبه وعندما صدر له الامر الصريح بتحرك الجيوش المصريه ذهب الى الملك لتقديم استقالته فقال له الملك انت بتضرب الجيش من الخلف وفعلا كان قرار الاستقاله الى جانب انه كان بيضرب الجيش من الخلف كان فيه تصريح بعدم اعتراف واهلية وقدرة الجيش ولذلك سحب النقراشى استقالته رغم ماكانت بهذه الاستقاله من مجد شخصى له .
د /.شوقى يوسف رشاد :قال احنا منقدرش نحارب فين السلاح والاستعدادات فقاله لازم يوافق البرلمان قاله انا اتحطيت فى موقف لازم احارب الدول العربيه كلها قررت الحرب دى حاجه وتانى حاجه فى بعض الظباط راحوا لقيادتهم وبعتوا للملك وقالوا احنا هنحارب حتى من غير اوامر .
المؤلفة/ سهير حلمى:كيف يدفع بهذا الجيش الى حرب والشعب العربى كله كان عاوز يساعد الفلسطينيين وقيل له اكتفى انك تبعث متطوعين بلاش الحرب الرسميه لانها خطر على الجيش لان الجيش معندوش امكانيات فهو رفض وبعدين هو امر عالطول كده راح متصل بحيدر باشا فى التليفون وقاله بكره ادخل فلسطين فطبعا كان ديكتاتور .
اللواء /جمال حماد:مش الملك اللى كان عاوز يخش الحرب الجيش قاله احنا ها نخش سواء انت قلت اه او لأ يبقى النقراشى يعمل ايه قال لهم الملك انا شايف ان دى حرب خسرانه انتوا هاتحاربوا انجلترا وامريكا واحنا معندناش الامكانيات والاستعداد لدخول حرب هما قالوا احنا جهزين انت لو ما امرتش احنا ها نخش يبقى النقراشى يعمل ايه ما هو الناس ما بتاخدش الحقائق بتاخد قالوا وقال النقراشى باشا قال بس ايه اللى حصل بالضبط مين الى ارغم الحرب على مصر الجيش المصرى كان متحمس جدا وكان عاوز يدخل قاله هانخش يا بأمرك يا من غير امرك فأصبح قدام الامر الواقع .
الباحثه/لميس جابر:دخلنا كان ضاعت الضفه الغربيه كانت كل فلسطين ضاعت فماكانش فى كلام عن المقاومه القاده العرب كانوا تحت ضغط جماهيرهم فكانت الجماهير بتطلع فى مظاهرات عزام يا عزام فين حيفا يا عزام وعزام ده كان امين عام الجامعه العربيه الجماهير كانت عاوزه .
اللواء/ محمد الطناجى .امام الضغط الشعبى والالحاح ومطالب وجميع الشعوب العربيه قامت مظاهرات فى بلاد عديده تم عقد جلسه سريه لمجلس الشيوخ طلبها النقراشى وعرض قرار مصر بدخول حرب فلسطين رسميا .هو لما هاجم فى مجلس الشيوخ واثار هذه المسأله اسماعيل صدقى وكان فؤاد سراج الدين زعيم المعارضه الوفديه فى ذلك الوقت وعزيز صدقى القى خطبه عصماء فى مسألة توازن القوى بين العرب وبين اليهود وقال وحذر لكن محدش سمع كلامه .
المؤلفة/ سهير حلمى:فى جلسة مجلس النواب التى فوجئ الساسه المصريون بتحول موقف النقراشى قال انه فى ظروف استجدت ودعت الى دخول حرب فلسطين من هذه الاسباب الاساسيه هو الملك عبدالله ملك الاردن اعلن عزمه لدخول الحرب سواء دخلت الجيوش العربيه الاخرى ام لا من ناحيه تانيه انه كان فى تخوف من البلاد العربيه ان يحتل الملك عبدالله الجزء العربى الفلسطينى .
أ .لطيفه سالم .النقراشى باشا لما عرض مطالب مصر بدخول الحرب فى الجلسه السريه فى مجلس الشيوخ قال انه تعرض لتهديد من السفير الامريكى بقطع المساعدات الاقتصاديه لمصر وده كان كلام جديد وبيمثل برده ضغط على القياده السياسيه .
المؤرخ/ جمال بدوى :قوبل اعلان النقراشى باشا بدخول الحرب بالتصفيق الحاد فى مجلس النواب ثم مجلس الشيوخ وبالتالى لم تكن هناك معارضه نذكر ان وزير الحربيه اعلن ان مصر مستعده لدخول الحرب بعد ان ايد النقراشى وزير الحربيه السابق الذى اعلن ان مصر على استعداد لدخول الحرب .
أ .السيد البدوى:اقروا ايه فى جلسة البرلمان انهم يكونوا لجنه اسمها لجنة الاحتياجات تشوف الجيش عاوز ايه بالضبط ونبتدى نتصرف ونجهزه بسرعه ولمت خبراء من الجيش تعاين الاسلحه وتشوف.
السيده/ هدى اباظه:وطلب اعتماد مبلغ 4مليون جنيه وبالفعل دخلت القوات يوم 15 مايو قبل ما يصدر القرار رسميا يعنى مصر دخلت الحرب اولا ثم استكملت الاجراءات الدستوريه وده طبعا شئ مش سليم نهائيا ويحسب برده على فاروق لكن كانت الحجه ان اسرائيل اعلنت دولتها واعلنها بنجوريون فى14مايو وانجلترا قالت بعد 15مايو مفيش حد هيدخل فلسطين .
عمرو الليثى:فى اليوم الثانى من اعلان بنجوريون عن قيام دولة اسرائيل هاجمت جيوش مصر والاردن وسوريا ولبنان وزحف الجيش المصرى من الجنوب فى اتجاه تل ابيب وقوات اصغر اردنيه وعراقيه فدخلت الضفه الغربيه للقدس القوات السوريه واللبنانيه هاجمت الى الشمال لأول وهله كان الانطباع بأن هذه القوات المجتمعه سوف تجتاح الدوله الجديده بسهوله وبدت دولة بنجوريون وكأنها لم تصمد اكثر من بضعة ايام .
الباحثه/ لميس جابر:مصر كانت الدوله الوحيده السباقه للدخول الى فلسطين وعبرنا رفح الساعه 6صباحا يوم 15مايو سنة1948متدقدمين بذلك الجيش المصرى عباره عن المشاه المدفعيه المدرعات متقدمين من رفح الى غزه تقابلنا مع بعض المقاومات من رفح الى غزه ودير البلح ودخلنا غزه مساء 23ديسمبر سنة 1948.
اللواء/محمد الطناجى :أنا كشخص حاربت سنة 1948ورحت العريش من اول مايو1948حتى 15مايو 1948بقول احنا لم يكن لدينا فكره عن الناس اللى احنا رايحين نحاربهم ولم يكن لدينا التسلح ولا الروح المعنويه وبس متنفعش فى الحرب فى مصر كانت بتوقف اللى فى الشوارع علشان تبعت العربيات للجبهه فى العريش علشان تنقل عليها القوات المصريه جيش داخل يحارب قاعد يصادر العربيات علشان ينقلوا عساكر ويحاربوا طبعا غير منطقى وغير مقبول .
عمرو الليثى:الاسرائيليون كانوا مستعدين وكان لديهم 60الف مسلح اى ما يعادل ثلاث اضعاف القوات العربيه وفى هذه السنه جمعوا 148مليون دولار اى ما يعادل المليار دولار بأسعار اليوم لشراء الاسلحه .
المؤرخ/ جمال بدوى:فى الشهر الاول صرخت اسرائيل وطلبت الهدنه اسرائيل لم يكن عندها فى هذه الحرب لا طيران ولا بحريه وطلبوا الهدنه ووافق فاروق والبرلمان والنقراشى لانهم عاوزين سلاح ان ما كان الجيش المصرى ساعة الهدنه الاولى عند المندل كانت تبعد عن تل ابيب 32كيلووابتدت نستغل نجاحنا فى دخول فلسطين واتجهنا شرقا نحو الفالوجا وانتشرت القوات فى فلسطين واستمر الحال لفتره .الملك فاروق زار الجبهه قبل نهاية الهدنه فى 6 يوليو وطبعا تفقد حال الجيش وما كانش يعرف الصوره النهائيه ليه .
أ .لطيفه سالم:فاروق كان فى تصوره ان الجيش المصرى فى 48 يستطيع فعلا ان يوقف الصهيونيه عند حدهم وفعلا الجيش المصرى حقق انتصارات لولا الخيانه العربيه وانسحاب الجيوش الاردنيه كان الجيش المصرى وصل وحقق الانتصار .
مفيش برده وثائق بعينها اللى اتكتب كله مذكرات انه كانت هناك علاقات بين الملك عبدالله ملك الاردن وبين الاسرائيلين والاتصالات السريه مع اليهود فى فلسطين والاتصالات الخارجيه .
الباحثه/لميس جابر:الوضع العراقى ما كانش حلو والوضع الاردنى كان عاوز يخش علشان ياخد ارض بغية ان الحتت دى تبقى تبع الاردن اولا التيار الدينى كان قوى جدا تيار الاخوان المسلمين فى الدعوه لمواجهة اليهود وانقاذ المسجد الاقصى كان متصور ان الجيش المصرى حايدخل وحاينتصر وحايصلى الجمعه فى القدس اماما لكل الملوك العرب يعنى احلامه كانت احلام هوس كل البلاد العربيه كانت فى وضع يتدخلوا يا تضيع فلسطين كلها الملك فاروق كانت وجهة نظره ان مصر مش ممكن تتخلى عن دورها العربى والاقليمى لو مصر قالت لأ مش داخله الحرب نظرة العرب لينا ونظرة فلسطين لينا كانوا هايقولوا انتو ضيعتونا لانكم رفضتوا تحاربوا فى 48 لكن احنا عملنا اللى علينا دخلنا حاربنا حدث هدنا حدث خيانه الجيش المصرى ادى ما عليه وفقا لامكانياته
الاخوان المسلمين لجؤا الى العنف فى فترات كثيره بدات ذروة الامر سنة 48و49 كان منها محاولة اغتيال النحاس مرتين مره بتفجير بيته ومره بالمدافع الرشاشه وقتل الخازندار رئيس محكمة النقض
السيده/هدى اباظه:النقراشى افصح عن ذلك فى احد خطاباته ابن زوجته الدكتور عزيز سعد الدين يعنى هذا لجواب وصل للدكتور عزيز سعد الدين بعد اغتيال النقراشى لان الدكتور عزيز سعد الدين كان فى امريكا وقتها وكان النقراشى يطلعه على ما يجرى فى مصر وقال له انه اصدر قرارا لحل جماعة الاخوان المسلمين والسبب الاساسى هو اغتيال الخازندار لما لذلك من تهديد للشرعيه ده السسب الرئيسى سنة48اصدر محمود فهمى النقراشى قرار بمصادرة جريدة الاخوان المسلمين وحل جمعية الاخوان المسلمين بجميع فروعها ومصادره اموالهم وممتلكاتهم وعقب هذا القرار القبض على كل قيادات الاخوان المسلمين فيما عدا حسن البنا وايزاء هذا التصرف حدث وقعت اغتيال محمود فهمى النقراشى رئيس الوزاره اللى عرفته من حقيبة الاوراق الخاص باوراق النقراشى بالمنزل وجدنا خطابين بينهم فتره زمنيه قصيره جدا لحسن البنا موجه للملك وفى هذا الخطاب حسن البنا يستعدى الملك عن النقراشى يقر فى هذا الخطاب بنزاهة النقراشى لكنه يقول ان النزاهه لا تكفى فى هذه الاوقات العصيبه وان النقراشى لا يستطيع ان يحكم مصر وليست الشخصيه التى تستطيع ان تحكم مصر فى تلك الظروف العصيبه ففى استعداء صريح لشخص النقراشى وخطاب اخر لحسن البنا موجه للنقراشى مباشرة وفيه يستجديه كان علم بقرار بقرارحل جماعة الاخوان المسلمين ويطلب منه وقف هذا القرار
الباحثة/ لميس جابر:الوضع الطبيعى ان لما يبقى بعد شهر او اقل يغتال البنى يبقى السعديين هما اللى خدوا بتار النقراشى ببساطه مسأله ثأريه
المؤرخ/ جمال بدوى: اه طبعا الملك فاروق هو اللى قتله باعاز وتتدبير من الملك فاروق والعمليه كلها مدبره منه لا من ابراهيم عبدالهادى وتلقى التهنئه من محمود عبدالمجيد اللى نفذ ومعاه اتنين مخبرين هم الذين اطلقوا الرصاص على حسن البنا اثناء خروجه من دار الشبان المسلمين فى شارع رمسيس نفذوها فى عربيه سوداء جريدة المصرى نشرت ارقام العربيه الصحيحه وفى نفس اليوم صودرت جريدة المصرى لكن كانت بعض الاعداد تسربت للناس والناس عرفوا ارقام السياره وهى سياره من سيارات وزارة الداخليه يعنى الحكومه هى الضالعه فى اغتيال حسن البنا
اللواء /جمال حماد: ووصلت فى التحقيق فى هذا الحادث الى انه الملك فاروق لانه باعتبار قتل رئيس الوزراء اللى هو النقراشى دى طعنه فيه هو شخصيا فلا بد ان ينتقم من اكبر راس وهو المرشد العام سهير حلمى انا مش عاوزه اقول ان فاروق هو اللى قتل او باعاز منه انما هو كان تخطيط
الباحثه/ لميس جابر: لما قتل النقراشى عمل البنا تصريح فى منتهى الخطوره فى جرائد الاخوان قال تعقيبا على اغتيال النقراشى لا اخوان ولا مسلمين يعنى ادان اللى اغتالوا النقراشى فى ناس ممكن تعتبرها مزايده يعنى هو بيقول كده علشان يدارى وانه مش مسؤل وفى ناس قالت فى دراسه اتكتبت انه هذا التصريح خلا الناس اتقلبت على البنا من داخل الاخوان بالذات بتوع الجناح العسكرى منهم راجل اسمه السندى فاحتمال يكون البنا اغتيل من داخل الجماعه ودى يؤدها حاجه تانيه انه مفيش حد من الاخوان اخذ بتار البنا وهم ما يسيبوش تارهم
عمرو الليثى:اعلن وقف اطلاق النار وانسحبت الجيوش العربيه اسرائيل احتفات بانتصار بنجوريون المقاومه العربيه فشلت والقتال قل تدريجيا وتم اخلاء الجرحى .
وللحديث بقيه فى الحلقه القادمه
محرر بالموقع الموحد للهيئة الوطنية للإعلام
حذر الدكتور أحمد صفي الدين، أخصائي جراحات العيون، من مخاطر التهابات ملتحمة العين المتكررة، خاصة بين الأطفال، مشيراً إلى أن...
يوضح الشيخ سلامة، عضو مركز الأزهر العالمي للفتوى الإلكترونية، اليوم الجمعة عبر برنامج "أنوار ذي الحجة"، أعمال يوم التروية (8...
يقدم لكم الشسخ عبد الله سلامة عضو مركز الأزهر العالمي للفتوى الإلكترونية نصائح هامة للحجاج لتجنب التدافع والحفاظ على الحالة...
قبل السفر الحج.. هناك خطوات ضرورية لابد من اتباعها حتى تكون رحلتك مقبولة وميسرة.