فى مركز "نقادة" بمحافظة قنا، يعرف الناس "محمد تكرونى" جيدا، أينما ذهب يطارده نداء "اتفضل يا دكتور"، مع أنه لم يحصل على الدكتوراة، ولم يعمل فى التدريس بالجامعة بالرغم
فى مركز "نقادة" بمحافظة قنا، يعرف الناس "محمد تكرونى" جيدا، أينما ذهب يطارده نداء "اتفضل يا دكتور"، مع أنه لم يحصل على الدكتوراة، ولم يعمل فى التدريس بالجامعة بالرغم من كونه أول دفعته، لكن الناس منحته اللقب الذى حرم منه، عن حب.
أعرف تكرونى من قبل أن أراه، قرأت عن مدرسة التحطيب التى أنشأها فى نقادة لتعليم الأطفال، وشاهدت تقريرا تليفزيونيا عن "توك توك السعادة" الذى صممه وراح يجوب به القرى بحثا عن المواهب، وفى اليوم الذى التقيته، عرفت أنه عازف عود ماهر ومهتم بالمسرح، ووجدت فى وجهه شغف كبير، طاقة مضيئة تجعله يتحدث عن أفكاره لنشر الهوكى فى الصعيد، رغم ما بدا على وجوه بعض أصدقائه، من نظرات تتأرجح ما بين الإعجاب والشفقة، هناك من صرخ فى وجهه: "أيوه، وآخرة اللى بتعمله دا إيه؟، أنت شخصيا استفدت إيه؟"، أما هو فاستقبل كل ذلك بابتسامة متسامحة، ورد: "الريادة إنك تقدم شىء مش موجود، فى مجتمع محتاجه".
سألته: ليه الناس بتقولك يا دكتور، مع إنك مش دكتور؟
فضحك، ثم قال: أنا خريج تربية رياضية قنا 2014، وكنت أول دفعتى، وحضرت الماجستير، وعملت برامج وخدت ميداليات على مستوى الجمهورية، بقت الطلبة زمايلى والمعيدين ينادوا إنى أتعين، لكن فيه 2 دكاترة قالوا على جثتنا، فأقصونى، تانى سنة رفعت عليهم قضايا، القاضى كان بيقول لى: "أنا عارف ان أنت لك حق، بس مش عارف أعملك إيه؟"، ومن هنا الناس بدأت تقولى يا دكتور محمد، تقدر تقول بيعوضونى.
وشغال فين يا محمد؟
حاليا أنا ماسك مدير نشاط رياضى فى نادى نقادة، موظف بعقد مجلس إدارة.
واشتغلت فى النادى ازاى؟
عملوا إعلان عن مدير نشاط رياضى، واتقدم ناس كتير، معظمهم كان سنهم ما بين 40 لـ 50 سنة، 5 من الـ 8 لجنة التقييم، صوتوا ليا، بقيت أصغر مدير نشاط، يمكن فى مصر.
ولاقى نفسك فى شغلك؟
الحمد لله، والحمد لله لما باحط إيدى فى أى حاجة صغيرة بتكبر وبتسمّع، عايز أقولك على حاجة، إيراد الموسم اللى فات وده بيبقى 6 شهور، احنا عملناه فى شهر واحد، الموسم اللى فات اختتموه بـ 160 سباحا، احنا بدأنا الموسم الرياضى بـ 170 سباحا، وفيه 300 سباح تانى.
وبتلاقى وقت تعمل مبادرات وأفكار وتدور على مواهب منين؟
الوقت موجود، طول ما أنت عايز تعمل حاجة.
إيه حكاية توك توك السعادة؟
ببساطة، جبت توك توك وقفلته، ولفيت بيه فى النجوع والقرى، لاكتشاف المواهب الثقافية والفنية والرياضية، بغرض إنى أكون همزة وصل بينهم وبين الأندية ومراكز الشباب والمراكز الثقافية.
وإيه اللى خلاك تفكر فى فكرة زى دى؟
لما لاحظت ان فيه مواهب كتير فى القرى، محتاجة حد ياخدها من إيديها يوصلها للطريق.
ازاى بتتجاوب الناس معاك هنا فى الصعيد؟
الناس لما تصدقك بتتجاوب معاك، فيه ناس كانت متعنتة ان بناتها تشارك معانا، لكن بالتواصل معاهم، ولما بيلاقى اننا بنوفر سبل الأمان ودا اللى بيهم أى أسرة، بيوافقوا، وفيه ناس بتشارك بس مبتحبش تطلع فى فيديو، واحنا بنحترم ده، والمجمل الناس بتتعاون معانا وبتدعمنا بقوة، واحنا فى الآخر بنشتغل على دوافع الأطفال ونطورها، وبنحاول تشغل أوقات فراغهم بنشاطات مفيدة.
وبتصرف منين يا محمد؟
جهود ذاتية كلها.
مبتخدش رسوم؟
ولا أى حاجة، بس حاليا بندرس اننا ناخد رسوم، عشان نزرع الجدية والالتزام فى الأطفال والأهالى، بس الفكرة حتى الآن قائمة على الجهود الذاتية، وبنحاول نرعى المواهب المتميزة أيا كانت ظروفهم.
اللى أعرفه ان أنت بتتعامل مع أعداد كبيرة من الأطفال، ودا فى النهاية بيحتاج فلوس، كبيرة صغيرة، فى الآخر فيه فلوس، بتجيبها منين؟
يضحك: أنا كنت باعمل حوالى 15 ألف جنيه فى الشهر من شغلى الخاص فى التدريبات الرياضية قبل كورونا، وأصرفهم على المبادرات دى، يعنى عملت مهرجان حضره أجانب صرفت فيه 30 ألف جنيه، من غير أى حد، يوم ما جانى سبونسر، نصب عليا فى 4 الآف جنيه.
إيه حكاية أول فريق هوكى للبنات؟
أول فريق دا كان طفرة، أنا كنت بادرس هوكى فى الكلية، وفى 2015، عملت خطة لعمل مشروع فريق الهوكى، خطة كاملة، حاولت أنفذها فى مراكز الشباب معرفتش، وفى 2016 قررت أن لازم تبقى فيه كوادر تعلم اللعبة وتنشرها، رحت لطلبة كلية التربية الرياضية وعلمتهم اللعبة، عشان يساعدونى فى تعليم الأطفال.
وازاى أقنعتوا الناس باللعبة؟
مسكنا المضارب ولعبنا، بدل ما نقولهم عايزين نعلمكم هوكى، بندخل نلعب على طول، أدى الهوكى. لعبنا فى الحدائق والكورنيش والأماكن العامة والأندية والشوارع، عشان نعرف الناس باللعبة.
اشمعنى الهوكى؟
لأنها لعبة صعيدية النشأة، مصرية فرعونية، وهتلاقى موجودة فى مقبرة الأميرة خيتى فى بنى حسن فى المنيا، هتلاقى شخصين واقفين على صخرة، ماسكين المضرب، طريقة التفاف الصوابع هى نفس طريقة التفاف الصوابع دلوقتى، زاوية العصاية، هى نفس زاوية العصاية الموجودة دلوقتى، فهى مصرية صعيدية الأصل، بس عشان هى بتحتاج إمكانيات عالية، انقرضت من الصعيد واستوطنت بحرى. وبعدين اختفت من مصر كلها، لحد ما رجعت مصر تانى عن طريق مدرس انجليزى فى الزقازيق، جه علمها فى الشرقية، وعشان كده فريق الشرقية فى الهوكى، هو أقوى فريق فى اللعبة فى مصر والشرق الأوسط، ودخل موسوعة جينيس فى 2014 كأكتر فريق حصل على بطولات أفريقية، فالشرقية كانت أول مكان نزلت فيه اللعبة بعد ما اختفت من أيام الفراعنة، فاحنا عايزين نحيى الهوية المصرية الرياضية، وعايزين نرجع اللعبة للصعيد موطنها الأصلى، ودلوقتى جيبنا حد بيعرف انجليزى كويس وحد بيعرف فرنساوى كويس، بيعلموا الأطفال مصطلحات اللعبة الأجنبية، عشان بعد كده نعرف نخاطب الاتحاد الدولى للعبة.
كام واحد معاك؟
المدربون كانوا فى الأول حوالى 16 ولدا و16 بنتا، بقوا 8 و4، دول 12 فريق العمل، واستقطبت 1000 ناشئ، صفيتهم بعد كده على 300، لأن 1000 كتير وإحنا معندناش القدرة المادية ندرب العدد ده كله، وخاصة أن العمل كله مجانى. بس الحقيقى لما الناس شافت اللعبة بدأت تصرف عليها.
بمعنى؟
يعنى إحنا رايحين مثلا نلعب فى نادى، بقت الناس تلم أجرة المواصلات من بعض، ويلموا أجرة النادى، رحنا القاهرة فى انتخابات الهوكى، لمينا مع بعض وروحنا، وبقت اللعبة ماشية كده.
طب أنت بتعمل كده فى الصعيد ليه، ليه مفكرتش تسافر مثلا، أو تركز إنك تعمل فلوس؟
فيه واحد كان ماسك ألعاب القوى هنا فى قنا، فى سنة 2015، سنة المفاضلة، كنت شغال معاه، لقيته بيحارب فى الاتحاد لحد ما جاب لى منحة فى المدرسة الفنية فى ماينز فى ألمانيا، وجه فرحان وهو بيقولى ياللا عشان تسافر، قلت له مش هاروح.
وبعدها جاتنى فرصة أشتغل فى نادٍ فى إسكندرية، بمرتب كبير، بس أنا مش عايز أروح، لأنى مقتنع أن هنا أرض خصبة، تقدر تعمل فيها اللى أنت عايزه، مشكلتنا الوحيدة أن إمكانياتنا ضعيفة، لكن أنا مؤمن أن اللى هيشتغل ويقدر يثبت نفسه، عاجلا أم آجلا هيلاقى.
محرر بالموقع الموحد للهيئة الوطنية للإعلام
أعلنت وزارة الصحة المصرية مؤخرًا عن بدء تشغيل أول روبوت جراحى فى مستشفيات الوزارة بمعهد ناصر،
من دفتر أحوال الشرطة وفقاً لتقارير الداخلية حوادث العقر منتشرة فى فى أكثر من محافظة
عبير عاطف: يجب تبنى استراتيجية شاملة لتعزيز مهارات التفاهم والهدوء النفسى قبل الزواج إبراهيم عطية: الظروف الاقتصادية تؤدى إلى شجار...
حصلت على المركز الأول فى الغناء على مستوى الجمهورية