press_center
مفيد فوزى : الناس وصراخ الافواه والدولة والعلم والفاكهة والحرارة والعنب العنب فى حديث المدينة
فاصل
مواطنة : محدش بيطبخ دلوقتى علشان اللحمة وعلشان القوطة .. عندنا مشاكل فى الانتاج وعندنا حجم الطلب زاد قوى
مواطنة : كل المسئولين الكبار مش حاسيين بينا كل حاجة بتيجى لغاية عندهم
مواطن : الزرع ده المية لما عليت الميع هى اللى عملت ارتفاع الاسعار ده كله كان فى تغيرات فى المناخ كبيرة جدا وبيتأثر
مواطن : ما بتجبهاش ليه قولى ما بتجبهاش ادينى فرصة فى الكلام
مفيد فوزى : حضرتك بتشترى بامية بتشتريها بكام
مواطنة : والله بخمسة جنيه
مفيد فوزى : قبل كدة كانت بكام ؟
مواطنة : كانت رخيصة كانت ب 4 وب4 وبكده
مفيد فوزى : وايه اللى غلاها؟
مواطنة : غلا الدنيا القوطة بقت بـ 10 جنية وبـ 12 جنيه
مفيد فوزى : ايه اللى غلى البامية؟
مواطنة : علشان خفيفة وشحيحة
مفيد فوزى : عشان شحيحة
مواطنة : اه بتيجى بقى اخر السنة وتخس اول السنة بتبقى كثيرة لكن اخر السنة بقى بتبقى خفيفة
مفيد فوزى : هى دلوقتى بكام ؟
مواطنة : دلوقتى بـ 5
مفيد فوزى : بخمسة جنية واول السنة بتبقى بكام؟
مواطنة : بتبقى ب 3 و 2 ونص وكده
مفيد فوزى : الدنيا بقت غلا؟
مواطن : اظن واضحة جدا
مفيد فوزى : واضحة هه
مواطن : واضحة
مفيد فوزى : انا اسف للسؤال سؤال غريب شوية مش كده
مواطن : مش غريب ولا حاجة
مفيد فوزى : تفتكر ايه سبب الغلا؟ هل المرتبات ؟ثباته والا ايه بالضبط؟
مواطن : الجشع
مفيد فوزى : الجشع !! معنديش غير السؤال ثانى انا جيت المحل علشان اقابل الراجل واشوف العملية ايه الراجل طبعا هرب مش عاوز يخش فى المناقشة علشان ال 65 جنية وال70 جنية واهو كاتب اهو هنا لحمه كندوز ب 28 كبده كندوز كلاوى كلام بفتيك كلام ماهو الراجل مش عاوز يقابلنى مش عاوز يتكلم معايا وهسيب له المحل
مواطنة : مفيش رقابة عليهم
مفيد فوزى : وهو الرقابة ايه يعنى مفتش الاسعار؟
مواطنة : يبقى فى حد يتابع يشوف الاسعار ايه لان هما بيزودوا من عندهم
مفيد فوزى : د. ابوشادى حضرتك الان تمثل الدولة فيما يتعلق بموضوع الاسعار الناس اللى قابتلهم وصل الامر فى كلامهم الى الفيضان العاطفى زى ما انا باسميه فين الحكومة فين ضبط الاسعار فين فين فين ؟ اى انها عملية استغاثة بالدولة لانهم حاسين ان هما فى مهب الريح واما فك تمساح ضخم اسمه الوسطاء التجار خلينا ناخذ المسائل خطوة خطوة الاسعار فى مصر مرتبطة بايه ؟
د. محمد ابوشادى : مرتبطة بحركة الانتاج
مفيد فوزى : الاسعار؟
د. محمد ابوشادى : ايوا ودى قاعدة اقتصادية من المسلمات الاقتصادية زاد العرض قلت الاسعار اللى حاصل كمان مرتبط ايضا بالاسعار فى الاسواق العالمية احنا عارفين الاسعار فى التسعيرة العالمية بترتفع نتيجة عوامل كثيرة ظروف مناخية مواتية على العالم كله واحنا جزء منه لها ايضا الطاقة الحيوية الجديدة اللى بينتجوها على حساب غذاء الانسان زى النهاردة قصب السكر زى الذرة زى الارز زى محاصيل كثيرة جدا بدأوا يستخدموها فى توليد طاقة آمنة جديدة علشان يتغلبوا على نقص الطاقة الطبيعية زى النترون وخلافه
مفيد فوزى : هل ارضنا الزراعية لا تلبى احتياجات الناس والافواه؟
د. محمد ابوشادى : انا هقول لسيادتك انا كنت فى مامورية وظيفية من 10 ايام فى الاسكندرية وانا راجع بصيت من القطار من اول طنطا الى بنها الى القاهرة الى المنوفية هالنى ما رايته من نافذة القطار وهى ان الارض الزراعية اتبنى عليها كم رهيب من المبانى مش بس مبانى سكنية انما مبانى ايضا صناعية مخازن مصانع وفى الوقت اللى احنا التعداد السكانى بيزيد جدا فاحنا رايحين نعمر الصحراء وارضنا الزراعية بيبنى عليها كان من حوالى شهرين كنا مع المهندس رشيد فى طنطا علشان ننفذ مشروع تنمية التجارة الداخلية وتطوير الاسواق السيد المحافظ بيشتكى ان متر الارض وصل فى مدينة طنطا 40 الف جنيه لان طنطا ملهاش ظهير صحراوى الناس بنت على الارض الزراعية وصبح اغلى شئ هناك هو الارض
مفيد فوزى : افهم من كدة ان الرقعة الزراعية فى مصر بتقل
د. محمد ابوشادى : بتقل طبعا
د. محمد ابوشادى : فى الوقت اللى فيه احنا عندنا اعلى معدل لزيادة السكان ولذلك اتجهنا الى الصحراء ولذلك بقى الطريق مصر- اسكندرية الصحراوى كله مزارع ومش مكفى
مفيد فوزى : هل الناس فهمة كدة؟
د. محمد ابوشادى : ماهوالمفروض الناس تهم كده دى قضية مجتمعية بتاعتنا كلنا مش قضية حد بعينه مش قضية الحكومة لوحدها دى قضيتنا كلنا لان هى مين الحكومة ماهى مجموعة اشخاص بيديروا بلادهم اللى هما احنا انا وسياتك وغيرنا المفروض كنا نكون معنيين بالشان العام ومدركين للشان العام
مفيد فوزى : هل الفول المدمس فى مصر انتاجنا كله
د. محمد ابوشادى : لأ احنا بنستورد حوالى 80% من احتياجاتنا
مفيد فوزى : قول يا افندم تانى الرقم
د. محمد ابوشادى : 80% من احتياجاتنا
مفيد فوزى : من الفول المدمس ؟
د. محمد ابوشادى : ايوا
مفيد فوزى : اللى هو الغذاء الرئيسى؟
د. محمد ابوشادى : الغذاء الرئيسى للمواطن
مفيد فوزى : ايه تانى يا افندم بنستورده؟
د. محمد ابوشادى : بنستورد الزيوت انتاجنا فى الزيوت ما بيكفيش بنستورد القمح انتاجنا من القمح ما بيكفيش بنستورد حاجات كثير الحقيقة
مفيد فوزى : هى مش دى دولة الفول المدمس؟
د. محمد ابوشادى : بنستورد العدس
مفيد فوزى : بنستورد العدس بنستورد الزيت كل ده استيراد؟
د. محمد ابوشادى : بنستورد مسلى صناعى وزبدة طبيعية
مفيد فوزى : كل ده استيراد
د. محمد ابوشادى : استيراد
مفيد فوزى : امال احنا بنعمل ايه ؟
د. محمد ابوشادى : لأ هو فى سلع اخرى احنا بننتجها ده بالاضافة زى ما قلت لسيادتك احنا جورنا على الارض الزراعية احنا كمان زدنا كثير
مفيد فوزى : ايوا يعنى هو حدث فى مصر الاتى عشان الناس تبقى فاهمة ماهوالناس احيانا تصرخ بلا فهم
د. محمد ابوشادى : بالضبط
مفيد فوزى : وربما يكون حاجة الافواه ضاغطة
د. محمد ابوشادى : ضاغطة بالضبط
مفيد فوزى : صحيح انت معايا فى كدة يعنى
د. محمد ابوشادى : ده واحنا مدركين هذا
مفيد فوزى : مدركين هذا يعنى اللى عايز يرجع بيته لعياله عاوز يعمل طبق سلطة يعنى كان زمان د. احمد شفيق الله يرحمه كان يقول ان طبق السلطة يغنى عن بلاوى كثيرة قد تحصل فى حياة الشعب المصرى من الامراض الناس فى مصر يا افندم معندهاش فكرة السلطة الخضراء لان النهاردة لما تدور على الخيار والقوطة وما يلقهاش يتجنن فيمسك رقبة الحكومة
د. محمد ابوشادى : اكيد لكن الناس لازم تفهم حقيقة ان احنا بنزداد وبننقص فى الرقعة الزراعية وبنبنى على الرقعة الزراعية
د. محمد ابوشادى : ده بالضبط ده بالضبط
مفيد فوزى : وكمان بنستورد
د. محمد ابوشادى : ماهو لازم نستورد
مفيد فوزى : ولو ما استوردناش نموت من الجوع انت ليه بتقولها بشكل مهذب نجوع بتقول نجوع انا قلت نموت من الجوع انت قلت نجوع
د. محمد ابوشادى : مش هنجوع لان عندنا جزء من انتاجنا وعندنا بدائل
مفيد فوزى : الله يعنى الجزء ده 80%؟
د. محمد ابوشادى : 80% استيراد
مفيد فوزى : و20% انتاجنا
د. محمد ابوشادى : اه
مفيد فوزى : سيبك من التليفزيون اللى ادمنا ده ما يخليش امين اباظة يعمل قلبة فى الحياه هو نغير الهيكل بتاع الزراعة فى مصر والا احنا متفرجين صامتين مستريحين ساكتين
د. محمد ابوشادى : ما انا عايز اقول لسياتك ما احنا بردوا كدولة الدولة بتعتنى تماما بالمواطن محدود الدخل ومتوسط الدخل وقائمة بدور كبير جدا فى انها تشبع احتياجاته باسعار تتناسب مع دخله
مفيد فوزى : منين؟
د. محمد ابوشادى : هقول لسيادتك .. احنا عندنا آليات كحكومة وحضرتك سألتنى بردوا بنحاول نحقق بيها التوازن اللى هو فى النهاية المستهلك البسيط
مفيد فوزى : خليك عملى الاوطة للشخص العادى بكام ؟
د. محمد ابوشادى : النهاردة
مفيد فوزى : ايوا
د. محمد ابوشادى : النهاردة فى قوطة مثل من 3 جنيه الى 7 جنيه
مفيد فوزى : ايه رأيك انى أنا جاى من السوق دلوقتى واكتشفت انها 10 وبيقولوا الى انها قد تصل الى 12 خلال يومين
د. محمد ابوشادى : مش فى كل الاسواق فى اسواق راقية فى اسواق شعبية فى احياء متوسطة انما انا شايفها فى بعض الاسواق انهاردة من 3 الى 7 جنيه
مفيد فوزى : انا شفت قوطة يا افندم قالوا لى دى ب 4 جنيه كانت مفعصة لا تؤكل ولا يمكن تخش بيت ولا حضرتك ممكن تختارها؟
د. محمد ابوشادى : احنا على فكرة فى مصر فى موسم العروات الفاصل الزمنى ما بين زرعة وزرعة وده الطماطم دائما تعملها لنا مشكلة كنا دايما قبلها بشهرين بنعمل stock فى شركتين الشركات المنتجة للعصائر علشان نخزن مجموعة من الصلصة صلصة الطماطم و معجون الطماطم عشان نسد الفجوة بتاعت الطماطم
مفيد فوزى : سيادتك محترم اوى حكاية الصلصة ديه النهاردة ستات البيوت قالوا لى الصلصة لا احنا ما ناكولش صلصة
د. محمد ابوشادى : ديه عادات و تقاليد
مفيد فوزى : نقدر نغيرها ؟
د. محمد ابوشادى : نغيرها انما يعنى السيدات الصغيرين شوية فى السن بيستخدموها
مفيد فوزى : كلمنى عن الشتلات الرخيصة اللى جبناها على فكرة انا عايز الحقيقة
د. محمد ابوشادى : هو تردد لدى اسواق الجملة الاسباب انا لا اعرف فى الزراعة
مفيد فوزى : انا عاجبنى كلمة تردد ديه
د. محمد ابوشادى : احد اسباب نقص محصول الطماطم سببين الظروف المناخية اللى أثرت على الطماطم الظروف المناخية الغير معتادة فى مصر و ده سبب العالم كله يأن منه فى المحاصيل كلها حتى اثرت على محاصيل استراتيجية كبيرة
مفيد فوزى : هل روسيا القمح فيها حصله كده؟
د. محمد ابوشادى : اه حصله كده لانهم اصدروا قرار من رئيس الوزراء هناك بمنع تصدير القمح وإلغاء جميع الاتفاقيات اللى كانت بينهم و بين الدول الاخرى حصل ايضا
مفيد فوزى : اقدر اقولك حاجة
د. محمد ابوشادى : اتفضل
مفيد فوزى : افهم يعنى اللى حضرتك قلته ده ان رئيس الوزراء اصدر قرار بوقف تصدير القمح
د. محمد ابوشادى : مؤكد طبعا
مفيد فوزى : اذا احنا محتاجين لبعض المواقف و لا انا غلطان
د. محمد ابوشادى : اكيد
مفيد فوزى : طيب بيشتروه بكام السنة ديه الشتلات الرخيصة
د. محمد ابوشادى : بيقولوا اشتروا شتلات من دول مجاورة يمكن بـ7 جنيه الشتلة والشتلات الامريكية اللى كانوا بيقولوا بتوصل لـ 17
مفيد فوزى : ليه اشتروا بـ7 جنيه استرخاص؟
د. محمد ابوشادى : استرخاص اه
مفيد فوزى : هل فيه سيطرة على هذا الكلام هل فيه حد بيسيطر هل حد بيراقب حد بيشوف ؟
د. محمد ابوشادى : لا هو فيه حجر زراعى فى الموانىء السلع وهى جاية سواء شتلات او منتجات نهائية الحاصلات الزراعية بيتم مراقبتها وفحصها والتأكد من سلامتها قبل الدخول
مفيد فوزى : تقدر تعرف ازاى اذا كانت ديه بـ 7 جني ولا 17
د. محمد ابوشادى : لا مش الهدف السعر الهدف هو الجودة و الصلاحية
مفيد فوزى : ما هى ما دام بـ 7 تبقى اقل فى الجودة و الصلاحية
د. محمد ابوشادى : الفكرة فى الصلاحية هى شتلات صالحة خالية من الحشرات خالية من العيوب
مفيد فوزى : ده شغلة الحجر الزراعى صحيح ان الليمون ب 5 جنيه؟
مواطنة : معنديش فكرة
مفيد فوزى : ليه مبتشتريش ليمون خالص؟
محرر بالموقع الموحد للهيئة الوطنية للإعلام
تناول الشيخ إبراهيم جاد الكريم عضو مركز الأزهر العالمي للفتوى الالكترونية خلق التواضع، مؤكداً أنه من الأخلاق الإسلامية الرفيعة التي...
وجه الشيخ محمود عويس محمود عضو مركز الأزهر العالمي للفتوى الإلكترونية رسالة هامة للمسلمين حول الاستمرارية في العبادة بعد انقضاء...
وصف الشيخ السيد عرفة عضو مركز الأزهر العالمي للفتوى الإلكترونية ليلة العيد بأنها "ليلة الجائزة" وواحدة من أجمل الليالي التي...
تحدث الشيخ عبد الله سلامة عضو مركز الأزهر العالمي للفتوى الإلكترونية، عبر فيديو ببرنامج "زاد الصائم" على موقع أخبار مصر،...