press_center
تقديم:محمد صلاح
تاريخ الحلقة: 7 / 5 / 2009
المسئول:
الدكتور/ احمد جويلي - الأمين العام لمجلس الوحدة الاقتصادية العربية
محمد صلاح: يا مساء الخير ، السوق العربية المشتركة حلم عربي كبير يمكن بيحلم بيه الناس اكتر من المسئولين لكن سوق عربية مشتركة ماهواش سوق العبور يعني نحط فيه الناس ويبدأ بقى البيع والشرا دا ليه شروط كتيرة ويلزمه إعداد طويل بالفعل كنا بدأنا قبل ما تبدأ أوروبا لكن أوروبا في سباق التقدم وصلت لنهاية التراك عملت السوق والبنك المركزي والعملة الموحدة وانتقال الأفراد بدون حواجز هو دا السوق اللي كل مواطن عربي نفسه يشوفه على ارض الواقع أتعطلنا جامد معملناش الآليات والتشريعات والقرارات اللي ممكن توصلنا ، كمان مارضيش حد يسألنا عن قرار قطري لصالح المجتمعات العربية كلها كمان فكرنا في الوحدة عمرنا ما بطلنا نفكر في الوحدة لكن الوحدة السياسية اللي توحد الناس والأرض والقرار والرياسة ودي سرعان ما بتنضرب عند أول أزمة لان المصالح هي اللي بتبقى وبالتالي لو كانت وحدة اقتصادية وحرية عمل وتنقل واستثمارات كان صعب قوي تنضرب ..محدش بيتعلم ببلاش خدنا وقت كتير يعني 52 سنة منذ إنشاء مجلس الوحدة الاقتصادية العربية على فكرة بيفكروا يغيروا الاسم الحكاية مش حكاية اسم.. مجلس ولا هيئة ولا منظمة إنما عملية سبات شتوي عميق، مفيش شغل تقريبا اعتماد تام على الاستيراد لا بننتج معدات ولا موتورات ولا بنصنع أي حاجة بتشتغل بموتور من التوك توك للغسالة للطيارة ولا بنزرع اللي بناكله ، يادوب شوية البترول طلعنا أخيرا كده في شوية منتجات عصاير يعني لو أقمنا السوق العربية المشتركة دلوقت هيبقى كل المعروض صيني أو تجميع بقى بأسماء الشركات العالمية ويدخل السوق بقى على انه منتج مصري سعودي مغربي دا اللي حصل .. أنا شخصيا مش من هواة البكاء على اللبن المسكوب يمكن الضحك يكون أفيد لكن الأزمة المالية العالمية لازم تخلينا نبطل بقى ضحك وبكاء ,النفط اللي بيشكل 70% من صادرات العرب تراجعت أسعاره بشدة يا دوب بنصرف على تكاليف استخراجه ، البطالة بقت 14% التفنيش زاد التوقعات الرسمية إن فرص التوظيف في الدول العربية هتتراجع بنسبة تصل إلى 19 % والعمالة العربية الوافدة إلى دول الخليج هتتراجع هي كمان بمعدل قد يصل إلى 30% السنادي كمان فيه تراجع على طلب العمالة العربية في أوروبا وأمريكا والدول المتقدمة كل دا هيؤدي طبعا إلى تراجع تحويلات العرب العاملين في الخارج بالنسبة لنا تقلصت السياحة وعوائد قناة السويس والمواد الخام ، العرب عملوا قمة اقتصادية في الكويت صدر عنها توصيات واعتمدت مشاريع طبعا القمة مابقالهاش كتير منقدرش نحكم دلوقت على نتايجها وإحنا النهاردة عندنا منطقة تجارة حرة عربية كبيرة المفروض السنادي نعمل اتحاد جمركي لكن بصراحة مش شايفين حاجة ملموسة مش شايفين حاجة خاصة بالتشربعات اللي تؤمن وتشجع الاستثمارات في الدول العربية ، اندفاع نحو السودان لزراعة سلة الغذاء العربية هناك ..سياسات لمنع الاحتكار، زيادة حجم التجارة البينية ، تفضيل العامل العربي على غيره عند التوظيف يعني سياسات تخلي المواطن العربي يطمن على قدرة حكوماته على تجاوز الأزمة المالية العالمية, الوضع الاقتصادي كله بمشاكله وهمومه وأحلامه ومستقبله وتأثيره علينا حتى الناس هيكون لينا معاه وعنه النهاردة كلام ........... مسئول
فاصل
محمد صلاح: الجماعة بتوع الاقتصاد عندنا عارفين أبعاد الأزمة المالية العالمية كويس وعارفين قد إيه إحنا متأثرين وهنتأثر بيها كلام على علم واطلاع بكل الأسباب اللي أدت لتأخير تعاون اقتصادي عربي يليق بأمة عرفت التجارة الدولية قبل الإسلام وبعد الإسلام كان تسع أعشار الرزق في التجارة لكن على الرغم من المعرفة والخبرة والتراكم معرفناش أزاي نوصل إلى نظام تجاري عربي حديث يقينا شر الأزمات المالية العالمية والمحلية ..الأمين العام لمجلس الوحدة الاقتصادية الدكتور احمد جويلي ....... مسئول....
ومن كلام جويلي "علينا الاستفادة من دروس الأزمة المالية العالمية الراهنة وأهمها إن الاستثمار البيني في المنطقة العربية أكثر أمنا واقل مخاطرة من الاستثمار خارج المنطقة العربية وعليها أن توجه جزءا من أموالها إلى الاستثمار داخل المنطقة العربية " وقال كمان الدكتور جويلي " هناك علاقة وثيقة بين السياسة والاقتصاد لان السياسة تلعب دورا هاما وكبيرا في إمكانية تحقيق التكامل الاقتصادي العربي ويجب ألا يتأثر الاقتصاد العربي بالخلافات السياسية وهناك أهمية قصوى للعمل على إقامة مصالح اقتصادية مشتركة ومستدامة بين الدول العربية فقيام أي تكتل اقتصادي عربي لابد وان يقوم على مصالح اقتصادية مشتركة –المنطقة العربية تستورد سنويا ما يصل إلى 75 مليون طن أغذية سنويا إضافة إلى 50 مليون طن من الحبوب نصفها من القمح ويجب تقليل الفجوة في إنتاج الغذاء بالوطن العربي عبر ضخ المزيد من الاستثمارات العربية في القطاع الزراعي – على خبراء الزراعة في الوطن العربي الاهتمام بالصحراء كمصدر للغذاء وعدم إهمالها من اجل سد الفجوة الغذائية الناجمة عن ارتفاع الأسعار عالميا حيث أن زراعة الصحاري العربية ستسهم في تحقيق التنمية المستدامة والأمن الغذائي العربي _ مجلس الوحدة الاقتصادية العربية يسير بخطوات جدية نحو تحقيق الوحدة الاقتصادية العربية الشالة من خلال إستراتيجية للتكامل الاقتصادي العربي خلال الفترة من العام 2000 وحتى عام 2020 والمحاور الأساسية لتلك الإستراتيجية تتضمن استكمال منطقة التجارة الحرة العربية البرى والتي ستكون أهم انجاز يحققه العرب في تاريخهم الحديث – ارتفاع درجات الحرارة المصاحب لظاهرة التغيرات المناخية سيؤدي إلى انخفاض إنتاجية العالم من المحاصيل الزراعية لذلك ستعاني دول عديدة من نقص الغذاء وانتشار المجاعات ".....
أزاي نخرج من الأزمة المالية العالمية على الأقل نتفادى أثرها على الشعوب .. أزاي نعمل نظام اقتصادي مؤسسي في العالم العربي سوق ، اتحاد ، عملة واحدة ، بنك مركزي واحد أزاي الأفراد المواطنين العرب يعني ينتقلوا بحرية مابين دولة وأخرى وكمان أزاي رؤوس الأموال تنتقل من دولة عربية إلى دولة أخرى بدون تعقيدات مميتة ,الأمين العام لمجلس الوحدة الاقتصادية العربية الدكتور احمد جويلي هيكون لينا معاه النهاردة كلام ........ مسئول
محمد صلاح: أرحب بالأمين العام لمجلس الوحدة الاقتصادية العربية الدكتور احمد جويلي منورنا يا دكتور..
د/احمد جويلي: أهلا وسهلا يا أستاذ محمد
محمد صلاح: دكتور جويلي عندنا مجلس اقتصادي واجتماعي تابع للجامعة العربية وعندنا مجلس الوحدة الاقتصادية العربية اللي حضرتك بترأسه ومع ذلك الناس مش حاسة بأي وحدة خالص اقتصادية عربية ليه..؟
د/احمد جويلي: يعني دا موضوع مشاكله كتيرة
محمد صلاح: ليه الناس مش حاسة بقى ؟
د/احمد جويلي: الناس مش حاسة محصلش وحدة أساسا
محمد صلاح: ليه محصلش وحدة عندنا لسه عناوين ليه ؟
د/احمد جويلي: عناوين بتحطها على أساس إن انت أمل يعني طموح ، طموح انك انت تعمل جهد كافي انك انت تحول هذا الطموح إلى واقع فدا اللي حاصل يعني
محمد صلاح: ايه اللي مخلاش الامل يبقى واقع ؟
د/احمد جويلي: موضوعات كتيرة يعني اول حاجة طبعا إن قواعد الإنتاج بتاعتك ضعيفة بنتكلم على الوحدة وقرار السوق العربية المشتركة اللي طلع سنة 64 طالعة في وقت كانت فيه الدول العربية كلها تقريبا طالعة لسه من الاستعمار فبالتالي والله لما تقول انا هعمل سوق عربية مشتركة ويحصل تبادل بين الدول وبعضيها ومعندكش سلع مش هيتم ذلك فدا أول مشكلة من المشاكل وفي ذلك الوقت كان فيه نظم اقتصادية مختلفة فيه دول مخططة مركزيا وماشية بالأسلوب الاشتراكي ودول تانية ماشية بالسوق الحر ففيه اختلاف في النظم .... أنا اعرف إن الجلسة قصيرة والكل وافق على شيء مقدم
محمد صلاح: عاجباني شجاعتك يا دكتور أمّال ليه بيفكروا في تغيير اسم المجلس يعني يبقى المنظمة المشكلة في الاسم ؟
د/احمد جويلي: آه المشكلة في الاسم لأنه أنت زي ما حضرتك بتقول دلوقت الوحدة يقولك إحنا بنتكلم عن المضمون فإحنا عايزين اسم المجلس يعكس مضمون العمل بتاعنا بالظبط ، مضمون العمل بتاعنا هو تنمية التجارة وتنمية الاستثمار والتنمية البشرية دي إل 3 حاجات فإحنا بنعملهم وعلى هذا الأساس يعني فيه شغل كتير معمول فيهم فإحنا المجلس الاقتصادي المجلس العربي للتجارة والاستثمار هنا المجلس بيعكس على طول الحل
محمد صلاح: العرب بيهربوا من أي حاجة فيها وحدة يعني ؟
د/احمد جويلي: طبعا
محمد صلاح: ليه؟
د/احمد جويلي: الوحدة بترتبط في مخهم بحاجات قديمة شوية يعني الاتجاهات القومية يعني الوحدة اسم دمه تقيل شوية
محمد صلاح: الاتحاد الأوربي اسمه الاتحاد الأوربي بس عشان هما أوربيين مثلا ؟
د/احمد جويلي: لا أبدا الاتحاد هو اقرب النظم للتحقيق والاتحاد
محمد صلاح: إنما العرب في الاتحاد عندهم مشاكل؟
د.احمد جويلي: الوحدة تشمل الوحدة الاقتصادية والوحدة السياسية والوحدة الاجتماعية كل أنواع الحياة يبقى فيها وحدة إنما نتكلم عن الاتحاد اتحاد الاقتصادي يعني ممكن تسميه كده بالظبط زي اتحاد بنتكلم عن انه هو اتحاد للتجارة والصناعة اتحاد اقتصادي
محمد صلاح: مجلس الوحدة الاقتصادية بعد انسحاب الكويت والسعودية .
د/احمد جويلي: السعودية ماكنتش عضوه
محمد صلاح: مكانتش عضوه أصلا طيب ..مجلس الوحدة الاقتصادية اللي هي الدول الغلابة مصر والسودان ومصر وفلسطين وسوريا والعراق واليمن وليبيا ..وليبيا كمان قررت تنسحب ..الدول دي تقدر تعمل وحدة اقتصادية
د.احمد جويلي: يعني أنا اختلف مع حضرتك شوية يعني أقولك إن مفيش حاجة اسمها غني وفقير يعني كل دولة عليها ميزة نسبية ويمكن مقولة الفقر والغنى دي الدول الغنية خايفة من الدول الفقيرة هبقى اعمل وحدة مع مصر ولا اعمل وحدة مع السودان يعني محتاجين فلوس خلي الفلوس معايا أحسن فصح انك أنت تاخد ميزات الدول اللي عندك دي بدل ما تبقى ميزة واحدة تبقى 20 ميزة فدا اللي بيحدد الدول وتكاملها مع بعضها
محمد صلاح: طيب حتى الإجراءات البسيطة زي إلغاء الجمارك بين الدول العربية دا مشوار بدا من 10 سنين تقريبا وصل لفين دلوقت
د/احمد جويلي: وصل إن أنت لغيت الجمارك تماما بين 18 دولة عربية وصل في يناير 2005 ، يناير 2005 الجمارك لجميع أنواع السلع زراعية وصناعية ألغيت
محمد صلاح: عمليا الناس مش حاسة بالحكاية دي
د/احمد جويلي: لا
محمد صلاح: وإحنا رايحين مع بعض بالطيارة في قمة الدوحة اللي فاتت وانا نازل بصوا للجمارك ولا حد قالي دا جاي من مصر اعدي وأنا راجع نفس القصة
د/احمد جويلي: مادام أنت عربي والسلع اللي معاك ذات منشأ عربي تبقى معفية
محمد صلاح: يعني حققنا طموحنا في حكاية إلغاء الجمارك دي
د/احمد جويلي: آه طبعا
محمد صلاح: هو دا الطموح ....
د/ احمد جويلي: بلا شك لسه اللي إحنا بنسميه المشاكل الفنية للتجارة زي شهادة المنشأ زي المواصفات زي نقط العبور دي كلها طبعا بتعطل التجارة النقل بين الدول العربية وبعضها مش بالكفاءة الكافية إنما الجمارك اتشالت
محمد صلاح: دكتور جويلي إيه اللي معطل السوق العربية المشتركة طبعا المشاكل اللي حضرتك أتكلمت عنها يمكن الدول الغنية خايفه من الدول الغلابة شوية لكن تلت رابع دول زي الاتحاد الأوربي أو السوق الأوربية المشتركة بدأت سوق ثم تحول إلى اتحاد سوق يضع قواعد الانضمام إليه عشان مفيش دولة تدخل توقع السوق دا اللي هو حاصل زي ما أنت عارف لما تيجي بقى الاتحاد الأوربي قبل كده سوق الأوربية المشتركة بيحصل جدل يستمر ربما سنين تركيا لحد النهاردة بتحاول فين تجربة السوق العربية ؟
د/احمد جويلي: شوف حضرتك احنا كمجلس بدينا هذه التجربة ب 4 دول سنة 2003 ولكن جت الظروف العامة للمنطقة يعني ماتمتش
محمد صلاح: دايما يبقى عندنا ظروف عامة في المنطقة
د/احمد جويلي: يعني الأمريكان دخلوا العراق فخلاص أتلغى هذا الموضوع أساسا
محمد صلاح: ننساه يعني ولاّ إيه ؟
د/احمد جويلي: لا ماننساهوش وقتها كان ممكن يتحقق سنة 2003 يعني تعاود تاني ممكن تعمل سوق مشتركة بدولتين بتلاتة باربعة بس لابد الواحد يوضح ان السوق المشتركة ماهياش بالبساطة اللي أي واحد يتصور
محمد صلاح: مش سوق العبور ؟
د/احمد جويلي: اه مش سوق العبور شوية خضار على شوية طماطم
محمد صلاح: محتاجين إيه يا دكتور جويلي ؟
د/احمد جويلي: دا سوق دولتين بندخلهم جوه بعض يعني معناه بيحصل نوع من التجانس القوانين بتاعتهم في كافة الاتجاهات بتبقى واحدة موحدة دا السوق غير كده مايبقاش فيه سوق شركة يعني
محمد صلاح: فيه أمل ؟
د/احمد جويلي: فيه أمل طبعا
محمد صلاح: جاي منين الأمل دا ؟
د/احمد جويلي: محتاج لشغل اكتر يعني فيه أمل كبير دلوقت إن أنت تعمل السودان ومصر أو السودان ومصر وليبيا مع بعض أجزاء أجزاء
محمد صلاح: يعني هنتكلم في بعض التفاصيل لكن عادة تجارب التكامل ما بتنجحش وبتبقى قدام العدسات والكاميرات اكتر من
د/احمد جويلي: يعني أقول لحضرتك حاجة الكلام بتاعك صح وسليم 100% إنما التفكير الرومانسي في هذه المواضيع مايجديش لابد إن يكون العرب عمليين وواقعيين في التفكير حضرتك قلت مثلا أوربا .. أوربا لغات مختلفة الناس مختلفة حروبهم ولكن في النهاية التفكير تفكير واقعي بيقعد يحط النظام بالكامل اللي هو بيتم عليه السوق احنا بنتكلم كلام الوحدة بين دولتين ونمشي ما نحطش سيستم كامل اللي هو بيسموه إيه رغبات أو طموح أحيانا ماهوش معزز بقوة
محمد صلاح: يعني بنخلط بين اللي بنتمناه وبين اللي نقدر نحققه بالفعل طموحاتنا اكبر بكتير من امكانياتنا
د/احمد جويلي: لا طموحاتك مش اكبر كتير من امكانياتك طموحاتك ما بتحاولش تحققها الطموحات محتاجه لتفاصيل وسيستم وتركب سيستم زي واحد يبني بيت واحد يقول عايز بيت 20 دور ويقعد قدامه كده ويتفرج عليه من غير ما يعمل حاجة إنما واحد بيحط طوبة على طوبة ويطلع دور وتاني دور وتالت دور وهكذا
محمد صلاح: الأزمة المالية العالمية كان العرب اتاخروا بشدة ودا شيء معروف ومنشور هو إحنا كعرب مستنيين الأزمة تتحل بره برضه عشان تنفرج عندنا يعني ملناش أي تأثير في أي حاجه
د/احمد جويلي: انت ممكن تاخد من الأزمة ما يفيدك وما يفيد المنطقة نرجع نقول لو فيه تجمع عربي كان من الممكن انك تستفيد من هذه الأزمة فايدة كبيرة جدا وحل هذه الأزمة ليس حلا قطريا حل إقليمي متقدرش تحل الأزمة العالمية أو تخفف من أثرها إلا إذا كان عندك حدود إقليمية حل إقليمي يعني معناها تزايد التجارة البينية بين الدول فبالتالي حجم الصادرات اللي حيقل بين الدول الأوربية وخلافه ممكن تعوضه عربيا ممكن السياحة نفس الشيء ممكن الاستثمارات نفس الشيء وهكذا يعني ، فأنت محتاج لحل إقليمي الحل الإقليمي هو النجاة
محمد صلاح: يعني فيه مجلس الوحدة الاقتصادية العربية وفيه جامعة الدول العربية مش دي منظمة إقليمية ولاّ إيه ؟
د/احمد جويلي: بلا شك طبعا
محمد صلاح: فين الحلول بقى ؟
د/احمد جويلي: ما إحنا فعلا متقدمين بحلول مؤتمر الكويت تنمية التجارة العربية البينية تنمية الاستثمارات البينية بين الدول العربية تطوير منظومة النقل بين الدول العربية كل دي حلول متقدمة هناك وجزء كبير منها أتوافق عليها يعني
محمد صلاح: بتتقدم يا دكتور جويلي وبعدين بيتوافق عليها وبعدين ما بتتنفذش .
د/احمد جويلي: لا بتنفذ ليه ماتتنفذش
محمد صلاح: كنا نفذنا بقى من 20 سنة من 30 سنة
د/احمد جويلي: الظروف بتختلف
محمد صلاح: يعني دايما هاقولك بصراحة قمة الكويت الاقتصادية التنموية الاجتماعية بالفعل خدت قرارات شجاعة واتفقوا بالفعل على مشروعات عملاقة تفيد العرب وتفيد الناس يعني لكن فيه انطباع برضه عند الناس انه قمم تعقد وتنفض بدون ما حاجة تتحقق بدليل انه قمة القاهرة عشان تتنفذ قرارات قمة الكويت الناس عندا انطباع إن القمم السياسية قمة الدوحة وقمة دمشق وقبلها قمة الرياض والخرطوم وتونس والجزائر وهكذا انه عادة بقى بند المصالحة العربية على رأس البنود اللي تناقش سياسيا وطبعا لما يكون هناك مخاصمة عربية يبقى صعب التعامل الاقتصادي في أوربا والدول المتقدمة بقى مفيش حاجة اسمها مصالحة فيه حاجة اسمها مصالح حتى لو دول بينها مشاكل بتتعاون أو بتتفق على ما يحقق اقتصاديا واجتماعيا مصالح شعوبها القمة العربية إيه مصيرها إيه ؟
د/.احمد جويلي: يعني القمة الاقتصادية اللي اتعملت في الكويت هذا مطلب لنا من فترة طويلة جدا القمم السياسية ما تعطيش الاهتمام الكافي الاقتصادي على هذا الأساس القمة الاقتصادية بتاعة الكويت عن الهدف بتاعها الأساسي إقامة مصالح مشتركة بين الدول العربية وبعضيها وتنمية ودعم المواطن العربي في كل مكان على هذا الأساس إحنا بنعتبر إن عقد قمة اقتصادية دا تطور ايجابي في حد ذاته المهم بعد كده تتابع تنفيذ هذه القرارات للقمة اللي بعديها وتخلي هذه الآلية تعمل ، القمم السياسية احنا عارفين طبعا مشاكلها بتبقى كتيره ومابيبقاش عندها وقت حتى لمناقشة الموضوعات الاقتصادية فاحنا القمة الاقتصادية بتبقى هدف لتنمية المنطقة
محمد صلاح: بس إذا كانت قمة الكويت وهي أول قمة اقتصادية تنموية فحضرتك شفت كويس قوي إن موضوع المصالحة العربية والخلافات العربية وتأثير العدوان الإسرائيلي على قطاع غزة والشقاق بين الدول العربية بعضها البعض ومحور الممانعة والتهدئة يمكن خد الصورة إعلاميا من الجزء الاقتصادي والتنموي في قمة الكويت وعالميا بالفعل كان الاهتمام اكبر بالموضوع السياسي
د/احمد جويلي: متقدرش تمنع أي أحداث تحدث إن هي ماتاثرش على مؤتمر قمة يعني غزة حدثت متقدرش إن أنت تتجاهلها
محمد صلاح: نتحاسب بس مانتخانقش حواليها
د/.احمد جويلي: الأزمة الاقتصادية حصلت جت في ظروف القمة الاقتصادية فلا بد ان تناقش مثل هذه الموضوعات يعني الأمور فرضت نفسها على القمة الاقتصادية انما القمة الاقتصادية بطبيعتها ىبتناقش موضوعات اقتصادية يعني كان فيها منتدى الاعمال بعديها بيومين او تلت ايام يعني والحاجات الحكومية اللي حدثت والورق اللي اتقدم
محمد صلاح: وبين القمم يادكتور جويلي من قمة الكويت حتى الان حصل مشروعات وناس قعدوا ورجال اعمال اتفقوا على مشروعات وحصل استثمارات عربية من رجال اعمال في دول عربية معينة حصل ولا محصلش ؟
د/احمد جويلي: يعني هو القمة اتلاقتصادية عقدت في 16 يناير
محمد صلاح: حصل حاجة ؟
د/احمد جويلي: معلش انت بتتكلم على تنمية ومشروعات وهتعمل سكة حديد وهتعمل ايه وهتعمل ايه فقرات كتيرة موجودة
محمد صلاح: صعب ان هو يحصل انا بتكلم
د/احمد جويلي: فيه طبعا اتجاه بيتم دلوقت فيه عمل انشلاء الاتحاد الجمركي بين الدول العربية وبعضيها احد قرارات القمة بتاعة الكويت يعني وغيرها من الموضوعات
محمد صلاح: دكتور جويلي حجمنا كعرب في الناتج الاجمالي العالمي 5% يعني غالبية اقتصادنا في بورصة الاقتصاد العالمي يدور حوالين النفط معنى كده ان العرب اقتصاديا خارج اطار النفط صفر كبير يعني امتى ننقدر نحقق قاعدة زراعية قاعدة صناعية يبقى ليها جزء من الاقتصاد العالمي بشكل حقيقي
د/احمد جويلي: اذا انت خدت كل الموارد بتاعتك دي كلها وخلطتها مع بعضيها واستخدمتها مع بعضيها ممكن تعمل حاجات كتير ناخد مثل السودان ، السودان فيه ثروة زراعية هايلة انما اللي يعوزها الاستثمارات والاستثمارات موجودة في منطقة الخليج الثروة البترولية يعني فدي لو انت خدت فلوس العرب زائد موارد العرب زائد كذا زائد كذا زائد كذا ممن تعمل اشياء كتيرة يعني مش معقول ان العالم العربي يظل معتمدا اعتماد كامل على الخارج في غذائه انما لو استخدم الثروات الطبيعية سولاء في مصر او في السودان او في المغرب العربي او في أي دولة تانية ممكن في هذه الحالة يبقى لك في التجارة العالمية
محمد صلاح: الاتجاه نحو السودان في موضوع الزراعة كسلة الغذاء العربية يعني العرب بيروحوا دايما من سكة التكامل مع السودان مش من سكة الشراكة الاستراتيجية ، الشراكة الاستراتيجية فيها نوع من الندية التكامل فيه نوع من التعالي ؟
د/احمد جويلي: لا هو مشروعات اساسا يعني مشروعات واستثمار تجاري يعني نستثمر في ارض زراعية او مصانع على اساس اللي بيستثمر فلوسه بياخد العائد بتاعها يعني غير زمان مفيش حاجة اسمها هبات
محمد صلاح: الأوضاع السياسية في السودان مأثرة ؟
د/احمد جويلي: طبعا السياسية لاشك طبعا الامن والاستقرار في أي بلد بياثر على الاستثمار انما هو منلاخ الاستثمار في الدول العربية تغير تغير كبير جدا يعني حصل تحسن كبير جدا في مناخ الاستثمار يعني حصل تحسن كبير في الاردن في مصر في تونس في السودان تحسن مناخ الاستثمار منها التسهيلات منها الحوافز منها ضمانات كل دي اتحسنت بشكل كبير جدا
محمد صلاح: ايه معوقات التجارة البينية بين الدول بلاش زراعة بلاش صناعة طب حتى خلينا نتكم في التجارة ، التجارة البينية ماوصلتش تقريبا 12% المفروض انها تصل الى 20% ايه المشكلة ان العرب يتاجروا مع بعض حتى لو تاجروا في المنتجات الصيني ؟
د/احمد جويلي: لا خد وحلل ما انا بتاجر في الصيني خلاص أتحلت المشكلة يعني إنما خد تركيبة التجارة العربية الكلية يعني اول بند في التجارة العربية هو السلع الرأسمالية اللي هي تدخل في عملية الاستثمار اذا كنت هتعمل مصنع بتجيبه من برة عاوز كمبيوتر تجيبه من بره دا اول بند بيكون 30، 40% من الواردات بتاعتك العربية تاني بند اللي هو وسائل النقل اللي هي العربيات والمقطورات والحاجات دي كلها بتجيبها كلها من برة بتجمع اه انما المكونات الاساسية بتجيبها كلها من بره ادي البند التاني البند التالت هو الغذاء انك بتستورد الغذاء من بره طب اذا كان اهم وارداتك هي السلع الراسمالية ثم النقل ثم الغذاء يبقى هتتاجر في ايه حتى لو فتحنا الجمارك وانا معنديش سلع رأسمالية هتاجر في إيه النقطة الأساسية ان الدول العربية دول مستوردة للتكنولوجيا ومستوردة للعلم فبالتالي اهم حاجة انك انت تدعم القواعد العلمية بتاعتك وتدعم التكنولوجيا في المنطقة
محمد صلاح: دكتور احمد الكلام كتير دكتور جويلي خليك معانا بقى لسه الكلام مخلصش
محمد صلاح: فضفض لنا الدكتور جويلي سمعنا شوية فضفضه في ناس تانيه من الخبرا عندهم بعض الفضفضة تيجي نسمعهم
د/احمد جويلي: نسمعهم
جمال زايدة- نائب رئيس تحرير الأهرام : مسيرة مجلس الوحدة العربية تقريبا هي مسيرة السوق الأوربية المشتركة اللي تحولت الإتحاد الأوربي النهارده اللي يبص على الاسواق العربية مقارنة بالاسواق الاوربية شتان احنا بنتكلم عنم عالمين مختلفين عالم انتقل نقلة ضخمة جدا وحطوا مخطط واضح وانتهوا دلوقت إحنا شايفين واحد من اكبر الاسواق في العالم هو سوق الاتحاد الاوروبي العالم العربي اصبح النهاردة منقسم مابين سوقين سوق الدول العربية المصدرة للنفط والمنتجة للنفط وسوق اخر هي الدول العربية الموردة للعمالة
خليفة ادهم – رئيس القسم الاقتصادي المناوب بالأهرام : مازال هناك معوقات في في حرية أنتقال العمل عنصر العمل بالذات اعتقد برضه انه اذا كانت الدول العربية قطعت شوط كبير جدا في تسهيل انتقال رؤوس الأموال والاستثمارات العربية البينية الا انه مازال ايضا هناك معوقات اخرى اعتقد ان اتفاقيات التبادل التجاري والاتفاقيات الثنائية على مستوى الدول العربية عادة ما يكون فيها هناك معوقات كل دولة تسعى الى تحقيق مكاسب اكبر مضاعفة على حساب الدولة الاخرى بعد تنفيذ هذه الاتفاقيات تدخل حيز التنفيذ تجد احدى الدول انها خاسرة بتحقق خسائر لان يكون هناك توازن في المصالح مابين هذه الدول في اطار هذه الاتفاقيات نضمن نجاح واستمرارية ونمو حجم التعاون الاقتصادي وحجم التبادل التجاري
د/.إبراهيم محمد حجازي- أستاذ الاقتصاد بجامعة القاهرة: الدول العربية النهاردة من لا اكون الى اكون الكيفية بتوافر الارادة السياسية لازم تكون الارادة السياسية قوية جدا لازم نحافظ كويس جدا على علماءنا مانفرطش فيهم هما صفوة المجتمع الل
محرر بالموقع الموحد للهيئة الوطنية للإعلام
تناول الشيخ إبراهيم جاد الكريم عضو مركز الأزهر العالمي للفتوى الالكترونية خلق التواضع، مؤكداً أنه من الأخلاق الإسلامية الرفيعة التي...
وجه الشيخ محمود عويس محمود عضو مركز الأزهر العالمي للفتوى الإلكترونية رسالة هامة للمسلمين حول الاستمرارية في العبادة بعد انقضاء...
وصف الشيخ السيد عرفة عضو مركز الأزهر العالمي للفتوى الإلكترونية ليلة العيد بأنها "ليلة الجائزة" وواحدة من أجمل الليالي التي...
تحدث الشيخ عبد الله سلامة عضو مركز الأزهر العالمي للفتوى الإلكترونية، عبر فيديو ببرنامج "زاد الصائم" على موقع أخبار مصر،...