press_center
تقديم :عمرو الليثي
تاريخ الحلقة :5/5/ 2009
الضيوف :
الاستاذ / احمد الهوان
عمرو الليثي :في ملحمة عودة سيناء لمصر بطولات كثيرة جدا وأبطال لهم دور كبير في هذه العملية منهم اللي احنا نعرفه ومنهم اللي احنا ما نعرفوش ومن هؤلاء جمعة الشوان كما عرفة الناس من خلال برامج تليفزيونية التي قدمها الفنان عادل امام في مسلسل دموع في عيون وقحة اسمه الحقيقي احمد الهوان العميل المصري ابن السويس اللي جندته المخابرات المصرية داخل إسرائيل واستطاع على مدار 11 سنة خداع الموساد الإسرائيلي والحصول منهم على احدث التقنيات المستخدمة في عالم الجاسوسية في هذا الوقت الملحمة رائعة نفذتها المخابرات العامة المصرية بكفائة واقتدار معانا اليوم احمد الهوان علشان نسمع منه أسرار تجربته وكواليس مقابلاته مع الرئيس جمال عبد الناصر والرئيس السادات وعلاقاته بزعماء إسرائيل الحاليين بعد الفاصل بالصوت والصورة احمد الهوان يحكي تجربته مع المخابرات المصرية في ملحمة كبيرة جدا
فاصل
عمرو الليثي :أستاذ احمد انا سعيد جدا بوجودي مع حضرتك النهاردة في هذا الحوار لبرنامج اختراق
احمد الهوان :حقيقي انا اسعد بسيادتك وبالنسبة لليوم الجميل يوم تحرير سيناء
عمرو الليثي :أستاذ احمد أنت عنصر متميزقدمت خدمات جليلة لمصر احكي لي كيف تم عملية اختيارك وتجنيدك ؟
احمد الهوان :انا كنت وقتها مدير لشركة أبو سنبل وادميرال العالمية للسياحة والملحة في بور توفيق فكان لي مبالغ عند احد شركات الملاحة في اليونان وطبعا بعدها أمرنا بإخلاء السويس طبعا سيبنا السويس
عمرو الليثي :ده في 67 ؟
احمد الهوان :في 67 فطبعا أخلينا بناء على طلب محافظ السويس في ذلك الوقت أخلينا السويس طبعا مش عارف هنرروح فين يعنب مش عرفين يعني انا كان نصيبي أني انا جاءت القاهرة هنا لأني كان عندي إمكانيات
عمرو الليثي :جئت من السويس أنت ومين ؟
احمد الهوان :جئت القاهرة انا وفاطمة
عمرو الليثي :فاطمة مين ؟
احمد الهوان :فاطمة دي مرآتي يعني انا متذكر كويس جدا سكنه في ميدان التوفيقية خدنا شقة مفروشة بعد كده في ذلك الوقت كله وقف
عمرو الليثي :طبعا أكل عيشك إتقطع ؟
احمد الهوان :وقف خلاص طيب اعمل ايه فكان لي حوالي 2000 جنية إسترليني عند احد شركات الملاحة في اليونان نظير قيام شركتي بإمدادها بالمواد الغذائية انا قطعت تذكرة وسافرت الى اليونان انا رحت للخوجة بناجاكوس اخد منه 2000 جنية إسترليني لقيته خارج اليونان فقالوا لي هيجي كمان أسبوع طبعا من قعدتنا بقي على القهاوي والى آخرة قدرت ان انا ألاقي صديق وهو كان أسمة الرئيس زكريا حسب ما قال لي حين ذالك في ذلك الوقت انه من دمياط وتعرفت كمان بيوناني أسمة ديموس ده يوناني يوناني برضه شغال في أعمال البحر يعني طبعا كان في ذلك الوقت بالظبط كده رحت شركة البحر الأحمر اللي انا عايز من صاحبها 2000 جنية إسترليني فلقيت الخواجة بناجاكوس وصل جه الراجل خدني بالترحاب والحب وشيء غير عادي يعني قال لي أنت ايه عامل ايه وبتاع المهم طبعا لان كان لي علاقة به كويسة في السويس فالراجل قال لي ايه رأيك بدل ما ترجع مصر انا أديك الفلوس ال 2000 جنية أنما ايه رأيك ما تيجي تشتغل عندي على الباخرة ارطة دي يعني بتنقل كربوا قلت له قوي قال لي أنت هتخدم القبطان علشان لغاتك والى آخرة المهم برضه الراجل أداني الجواب التعيين على المركب وفوجئت وإحنا راكبين القطار انا والبحارة اللي معايا اللي رايحين نأخذ المركب من كين القنال في ألمانيا فركبنا القطار حسب الشركة ما قطعت لنا فلقيت ديموس معايا ديموس صاحبي اللي هو البحار اليوناني يعني استغربت ايه انبسط قوي لان طبعا كل البحارة بتوع المركب أو كل طاقم الباخرة يونانيين وأنا الوحيد اللي مصري فلما ألاقي برضه واحد صاحب يعني تبقي حاجة كويسة سافرنا لغايه ما وصلنا الى ألمانيا في كين القنال طبعا طلعنا صعدنا على الباخرة انا والطاقم المعين معايا وطبعا كان معايا الجواب الخاص للقبطان من صاحب المركب يعني خلي بالك من فلان ده وفلان ده بيجيد لغات وبتاع وحاجة زي كده يعني في اليوم التالي المركب سافرت الى بروستن لانك شير في انجلترا علشان نفرغ ونشحن اوكي دخلنا بروستن لانك شير فوجئت لقيت ديموس اللي هو صاحبي من اليونان وشغال معايا على المركب ما تيجي ننزل قلت له يالا نزلت انا وديموس منفردا فقعدنا على البار ده كان اسمه بلو ستار بار هو اللي اختاره قعدنا ديموس بيشرب اللي هو بيشربه وأنا بشرب حاجة ساقعة وفي ذلك الوقت عدا شاب اسمر بس أنيق قوي هي هاي وبتاع المهم قعد جنبي ماقعدش جنب ديموس قعد جنبي أنت منين قلت له من السويس من مصر والى اخرة عادي انا بتكلم على سرية بتشتغل فين قلت له انا بشتغل على الباخرة ارطة وبتاع المهم عرف ان انا بعرف ست أو سبع لغات في ذلك الوقت يعني انبهر يعني ازاي يعني هو ده تامينية شكلها كده فقال لي بتعرف اللغات دي كلها قلت له اه قال لي أنت انا من جاميكا ومقيم في انجلترا ومعايا الجنسية الانجليزي قلت له أهلا وسهلا قال انا في واحد صديق لي قال لي ان ممكن لو لقيت واحد بيعرف ثلاث لغات مش ستة قلت له اه قال لي تشتغل في اوتيل انترناشونال قلت له فين الاوتيل ده قال لي هنا طيب المرتب بتاعه ايه قال لي مش اقل من 1000 إسترليني الكلام ده في سنة 67 ألف إسترليني يعني رقم خرافي يعني انا قلت كذاب طبعا يعني قلت له يا ريت قال ممكن قلت له اه هيعملوا لك تست قلت له يا أخي انا قلت لك انا بتكلم سبع لغات مش ستة كمان المهم طبعا ادانا ميعاد الساعة الرابعة يعني تاني يوم نتقابل في نفس المكان علشان يخدني يوديني الاوتيل ونعمل العقد ونعمل الكلام ده من الساعة 3 تاني يوم انا كنت موجود انا وديموس طبعا ديموس مش سايبني قعدنا بقت الساعة 4 والأخ الأسمر ما جاش يمكن انا جوايا ايه ألف جنية إسترليني يعني الساعة 4,5 ما جاش فوجئت لقيت الجرسون جاي وجايب كاسين وسكي وراح حطتهم لي وديموس قلت له مين طلب وسكي احنا مطلبناش قال لي لأ ده البنتين اللي هناك دول ايه يعني بعتينهم بنتين مين يا عم احنا ما نعرفش حد هنا فطبعا لما قال بنتين بصيت قلت له لأ جايز في غلط يمكن الترابيزة اللي ورآنا الترابيزة اللي جنبنا يعني الراجل خد الصينية وراح ورجع يعني قال لأ ليكم انتم فانا بصيت لديموس قلت له ايه ده يعني قال لي جايز بنات ليل قلت له ايه قال نشرب قلت له بس انا معييش فلوس يعني معييش الا عشرة جنية قال لي انا هدفع شوية وجابوا كاسين تاني وعاهم رسالة بتقول يعني ممكن تيجوا نقعد معانا وإلا احنا نيجي نقعد معاكم يعني يمكن الجرسون مكملش الرسالة دي قمت انا وديموس جري
عمرو الليثي :ما صدقوا
احمد الهوان :اه ما صدقوا بصراحة يعني لان ايه بعتين جمال غير عادي المهم طبعا رحنا فلقيت ماريا سلمت عليه تسليم جامد
عمرو الليثي :اسمها ماري ؟
احمد الهوان :ماري دي الأولي جوجو حسب ما قالوا قعده عبارة عن قطة يعني برنسيسه بمعني اصح سلمت وهي قاعده وبتاع مش عارف ايه جوجو ديفيذ دي ماري بتقدمها جوجو ديفيذ دي ابوها اكبر مليونير عنده شركة اليكترونيات هنا في مانشيستر أهلا وسهلا ماري دي كمان مليونيرة أهلا وسهلا قعدنا انا طبعا يا جماعة السويس وكمصر انا علي سرية يعني انا بقول لولادي اللي بيسمعونا علي سرية كونوا حرصاء
عمرو الليثي :مش واخد خوانه
احمد الهوان :مش واخد خوانه إطلاقا إطلاقا طبعا طلبات طلبات بيطلبوا طلبات وأنا ما بشربش بكل صراحة بكل أمانة يعني مع الجمال الرهيب ده شربت المهم خرجنا طبعا كل ده الأخ الأسمر اللي مواعدني الساعة 4 مجاش فخرجنا طبعا ندور على تاكسي قالت لأ السيارة كديلك حاجة خاصة ركبنا الأربعة ودونا نيتكلب تعرف ترقص يا احمد قلت لها آه طبعا وإحنا بنرقص بتقول لي دي جوجو تشرب حشيش قلت لها اشرب خلاص بقي
عمرو الليثي :آه ما هي باظت باظت خلاص يعني
احمد الهوان :يعني باظت قلت لها ايوه فقالت تعالي وراي فنزلت ورآها الدور الأول الى الدور الأرضي فلقيت تحت الراجل الأسمر اللي المفروض يقابلني الساعة 4 واقف تحت قال لها هاي جوجو قالت له هاي نلسون بهذا الفظ يعني ده ما قليش انا حتي فسلموا على بعض فقالت له معاك مخدرات قال لها اه فتحت علبه صاج كده وراح مديها اللي هي عوزاه وماشي قلت له يا عم ماشي فين أنت مش مواعدني الساعة 4 قال لي آه انا نسيت اصل مش عارف ايه أشوفك بعدين خد بعضة ومشي المهم انا بحكيها بالظبط كده فجوجو قعدت تلف سجائر أسرع امرأة في تاريخ عمري أشوفها تلف سجائر مخدرات بهذا الوضع ونشرب انا وهي طبعا انا مش واخد على هذا الكلام آنذاك هب يعني اتمرمغت يعني احنا في عز التعب ده انا اللي تعبان مش جوجو ايه مالك تعبان جدا جت ماري بعربية فكرها اعرف كل ما فيها أنها عربية سمراء جت مركباني انا وجوجو وقالت للشوفير بلاك بون انا معرفش بيقولوا ايه بلاك بون دي اتريها بلد صغيرة صيفية في انجلترا مفيش وقت كثير جدا معرفش ما فيش نصف ساعة وصلنا هناك وطلعوني شقة شياكة جدا
عمرو الليثي :ديموس كان معاكم ؟
احمد الهوان :لأ ديموس انا بسال على ديموس وأنا في العربية كصديق قال لي البوليس ...
عمرو الليثي :بما فيهم ديموس
احمد الهوان :بما فيهم ديموس دي هي قالت لي كده وفعلا قعدنا طبعا في المركب الشقة وطبعا ليلة صاخبة سميها
عمرو الليثي :ليلة حمراء
احمد الهوان :ليلة حمراء وطبعا انا
عمرو الليثي :ومن غير ما نخش في تفاصيلها
احمد الهوان :هي حمراء كفايه الصبح ودوني بدري جدا على المركب في نفس اليوم جم لي حوالي الساعة 4 العصر وجت جوجو بعربية كافرلية وطبعا ماري روز وديفينك وسليا ملية العربية كوكتيل وجابوا لي شنطتين دي جوجو اللي جابت شنطه كبيرة يعني كل شنطه واحدة للسمر تيم وواحدة للوندر تيم يعني عايز أقول صيف وشتاء ملابس يعني مش ممكن طلعوهم لي المهم ياله بينا فضلنا على هذا المنوال يعني نقدر تقول مش اقل من أسبوع قالت لي بقولك ايه قولت لها ايه قالت لي احنا نجوز قولت لها نتجوز خدتني وراحت لأبوها طبعا قابلني كويس جدا قالت له مستر رحمان فسلم الراجل وقعدنا بتاع مش عارف وضعك ايه والله انا شيف ستور وبتكلم سبع لغات والى آخرة قال لي طيب لو أنت أتجوزت جوجو هتقعد معانا هنا والبيت بتاعك موجود قال لي وأنت هتاخد ألف جنية بوكت مني وهتقعد معايا هنا في المصنع لمؤاخذة يعني جوز الست ماشي قال لي بس حاول تحاول تخرج من المركب باسي شكل دلوقتي قولت له صعب في كونتراتوا مكتوب ان انا إذا سبت المركب بمحض إرادتي يبقي لازم بتاع الضابط اللي هيجي مكاني انا ادفع له اوكي كام قولت له معرفش مش فاكر قال لي معاك 5000 دولار أهم شوف القبطان عاوز ايه المهم القبطان طلب 320 دولار وقتها دفعت 320 دولار قال لي هستني لما يجي الضابط اللي هيمسك مكانك اوكي طبعا في الأثناء دي أو يعني مباشرة كل الكلام ده في انجلترا الى ان الراجل مجاش الضابط قال لك هيجيلك في الدنمارك لان المركب رايح كوبنهاجن وصلنا كوبنهاجن لقيت جوجو مستنياني على الرصيف في كوبنهاجن المهم فضلت معايا اليومين الثلاثة الراجل اليوناني برضه مجاش اللي هو الضابط
عمرو الليثي :اللي هيستلم منك ؟
احمد الهوان :اللي هيستلم مني يعني نقلننا على المركب راحت بلجيكا.. و تعد من ضمن المواني الكبيرة جدا طبعا الميناء الوحيد اللي مجتليش فيها فنزلت و اتصلت بالبيت بتاع جوجو حسب ما كانت مديها لي جوجو فين فردت على واحدة قالت لي انا ممتها مين أنت قولت لها رحمان قالت لي جوجو سافرت يونادي ستيب واتجوزت وهتقعد هناك
عمرو الليثي :اتصدمت صدمة كبيرة ؟
احمد الهوان :اتصدمت حقيقي اتصدمت صدمة كبيرة فالاخوة اليونانيين عايزين يرفهوا عني ففي يوم بالليل قالوا لي يالا نخرج قلت لهم انا عيان قالوا لي لأ يعني عايزين يلطفوا لان كانوا عارفين جوجو لما تيجي يعني عارفين القصة يعني فقعدنا في احد البارات فانا قاعد في البار فلقيت الكرسي اللي انا قاعد عليه شبة حد ماشي حك مش ضربة حك فشيء طبيعي ببص فلقيت شاب في حوالي 25 لو 26 سنة وشاب ثاني يعدي الثلاثين احنا اسفين جدا يعني للاسف معلش يعني انا مشفتوش قبل كده في مصر محصلش حاجة الراجل حك ايه يا عم يعني كانت بالنسبة لي حاجة جديدة مجراش حاجة يعني في ايه حصل خير مش خير واحد يعني فجم جايبين كرسيين وراحوا قعدين ورانا الترابيزة اللي جنبا قال أحب أعرفك ده مستر جاك أهلا وسهلا قال لي وأنا المدير العام الإقليمي للشركة في أوروبا واسمي ابرهام أهلا يا ابرهام أزيك يا ابرهام احنا بصراحة ومش عارف ايه كنا مترهنين عليك ان وجاك قالت ليه قال أصل جاك بيقول أنت من جاميكا وانا بقول أنت من باكستان مين فينا اللي يكسب قولت له هو الرهان اصلا على ايه قال على اللي يسهر التاني سهرة حمراء قلت له خلاص انا اللي اكسب لان انا لا من جاميكا ولا من باكستان قال ام ال منين انا من مصر السويس ليه فرحة مش عارف ايه طيب استأذن من زملائك علشان نبدأ السهرة الحمراء اوكي استأذنت من يني وخرستوا وبتاع ومش عارف ايه خرجت عندهم عربية شيك ودوني يعني اللي انا كل اللي فاكرة فى عمارة جنب " الروي واستيشن بتاع انتو وارم " طلعنا طبعا سهرنا سهرة ومش عارف أقول ايه يعني حوالي الساعة 2 ونصف ثلاثة قولت لهم لازم امشي علشان عندي شغل على المركب نزلت معهم علشان يوصلوني على المركب فطول السكة بيكلموني أنت اتبسط اه طيب ايه رأيك يعني ما نقدر نشغلك معانا تشتغل معانا فين قال مع ابرهام وجاك في الحديد والصلب قولت طيب انا مبفهمش في الحديد والصلب قال احنا نعلمك قال احنا بصراحة حبناك وبتاع البوليتيكا دي قلت له بس يعني هل هيبقي المرتب جازي قال لي يعني اعتقد مش اقل من 5000 دولار انا بتكلم برضه على سنة 67
عمرو الليثي : 5000 دولار في الشهر ؟
احمد الهوان :في الشهر قلت له طيب ما انا معنديش بيت هنا قال لأ أنت معانا يعني إبهار يعني إبهار وأنا برضه عاوز ارجع وأقول ده انا مراهق في هذا السن 24 سنة ولا 25 سنة ده انا راجل يعني دي مهمة جدا يعني قولت له والله لو 5000 دولار اشتغل ودوني جنب المركب ودي غلطة ضابط الموساد الإسرائيلي يعني انا فوجئت أحاسب نفسي الله الناس دي أش عرفهم
عمرو الليثي :ايه عرفهم ؟
احمد الهوان :يعني ده اللي لفت نظري مطلبش مني عنوان وبعدين ميناء مش ميناء السويس ده ميناء انتورب يعني دي حاجة بلد بحالها
قال لي ابرهام هيجيلك بكرة واحنا عازمينك وجاك هيكلم باباه على انه يتوسط ويجيب لك موافقة بالوظيفة ماشي تاني يوم جاني ابرهام بعد الظهر انا بسالة بقولة جاك فين قال لي جاك مستني في الاوتيل مستني تليفون من باباه يعني جاي قال لي اه هيجي لنا فوجئت طبعا ودوني روستوران ماكين روستوران احد فروع ماكين فالظاهر كان في حجز موجود للتربيزة اربع افراد طبعا اتقابلنا قعدنا وابرهام مستنيين جاك والمسائلة سرفس يعني شوية جاك جه احمد ايه الف مبروك بابا وافق هتاخد يا عم 5000دولار قال لي طيب انا اسمع عايز هل انت معاك ورق هنا قلت له ورق ايه قال كنا عايزين يعني حاجة نقول ايه اثبات شخصية قلت له معنديش هنا الا جواز السفر وجواز السفر مع القبطان والقبطان مش ممكن يدهولوي الا لما اعمل سين اوف
عمرو الليثي :تسيب المركب ؟
احمد الهوان :اه طبعا قال لي طيب بعد اذنك قولت له اجيب لك ايه اجيب لك فيش وتشبية ده طبعا ما ينفعش الكلام ده هنا يعني انما انا حاليا من الجواز قال طيب هنحل الموضوع ده فطلب مني مبدئيا اكتب اهم ناس اعرفها في مصر وعناوينهم وتليفوناتهم واخواتي واهلي وقال لي هنحط دول مكان الاوراق الرسمية لما تيجي نقطع دول انا معرفش ربنا الهمني اني اكتب اخويا عميد في القوات المسلحة وديتوه الورق قال لازم تعمل مشكلة على المركب
عمرو الليثي :علشان يمشوك ؟
احمد الهوان :علشان يمشوني عملت مشكلة وسبت المركب لقيت ابرهام مستنيين بره اركب ركبت وداني فرانك فورت المانيا وقال لي انا هسيبك ثلاث ايام في اوتيل هانز وانا هجيلك بعد ثلاثة ايام تكون استجميت وكده وخدت راحتك علشان نقعد افهمك نعمل ايه في اليوم التالي جاء لي ابرهام قال لي خبر جميل ليك قلت ايه قال منفسكش تشوف فاطمة واهلك قلت له يا ريت قال لي تم تعينك مدير لشركتنا في القاهرة وهو انتوا عندكم شركة في القاهرة قال لا انت ههتفتحها المهم جاء وخدني وطلعين الغرفة بتاعتي وهو كان اصلا جايب شنطة كبيرة قال لي الشنطة فيها 185 الف دولار امريكي افتح لنا في اهم شوارع القاهرة شركة قلت شركة ايه قال واكتب عليها سوس بارت برتيشن ماشي طيب وهتشتغل ايه قال لي اسس واشتري لك عربية تكون نصف عمر ماشي ومن الفلوس اللي عندك فيها ستة شهور مرتب ليك مقدم يعني ولما تيجي نتحاسب قلت له ماشي قال لي وعاوزين في 13 مركب واقفين ما بين السويس والاسماعيلية في منطقة البحيرات المرة مراكب اجنبية قلت له عارفهم وعملت عليهم شغل قبل القنال ما يتقفل قال لي عاوزين اخبار عنهم بالظبط اطوالهم اعراضهم مش عارف ايه الى اخرة لية قال لية علشان هيجي وقت المراكب دي القنال يتفتح ويخرجوا يتعمل عليهم مزاد عالمي يتباعوا خردة يعني قلت له بسيطة ده انا اجيب لك المعلومات دي من هنا حتي قال لي روح واتاكد قلت له حاضر في ايه تاني قال اداني اسم واحد اسمة محمد سليم اداني عنوان له في النمسا واداني عنوان له في المانيا واداني عنوان له في انجلترا قال لي لما تجيب المعلومات دي كلها تبعت لمحمد سليم في اي حته من دول اكتب بس محمد سليم هنعرف انك مجرد جواب عادي هنعرف انك فتحت واشتغلت والطلبات اللي هما طلبوها طبعا كلام غريب يعني وطبعا بعد بكرة انت هتسافر من فرانك فورت الى القاهرة الحجز طبعا حجزين ليه وعملين لي الكلام ده كله طبعا يعني انا لما ركبت الطائرة دماغي تودي وتجيب تودي وتجيب ايه دول دول اعداء لمصر اضافة لما بقي طبعا راشل وجوجو وابرهام
عمرو الليثي :اسماء كلها يهودية ؟
احمد الهوان :اسماء كلها يهودية فقلت دول اعداء وانا طبعا محروق بكل امانة منهم من تدمير بلدي واهلي والى اخرة قلت انزل ابلغ الرئيس الراحل جمال عبد الناصر روحت بلغت فين المباحث العامة كان لهم مكتب في ميدان التحرير دخلت باختصار للعميد احمد صالح وطبعا دخلت له بعد اربع ساعات انا معايا جواز السفر اللي ثبت له اني انا كنت بره وجيت قال لي عايز ايه قلت له عاوز اقابل الرئيس جمال عبد الناصر لية قلت له والله انا جاي من بره وفي حاجة تهم الوطن قال لي وانا منفعش يا ويا ويا قلت له للاسف انا مش هقول هذا الكلام ده الا للرئيس جمال عبد الناصر وارجوك تاني مرة متشتمنيش المهم باختصار يعني استضافني يومين ليلتين اقصد استضافة جيدة جدا فيى المباحث العامة وبعد ليلتين طبعا مرضتش اقول حاجة وفي اليوم الثالث الصبح ايه ايه يالا العربية ودوني في منشية البكري دخلت على عبد الناصر الراجل طبعا قابلي مقابلة طيبة انت من السويس قلت له ايوة قال لي تعرف مدرسة حمدالله قلت له ايوة قال لي انا كنت فيها قال لي تعرف بوسطة السويس قلت له ايوة قال لي ابويا كان وكيل البوسطة اهلا وسهلا يعني ايه الحكايه حكيت له الحكايه قال لي وانت جاي دلوقتي الشنطة اللي انت بتقول عليها فيها 185 الف دولار معاك قلت له ايوة قال لي وانت متاكد ان الفلوس اللي انت بتقول عليها موجودة قلت له ايوة يا ريس قال لي ازاي قلت له ابرهام علمني اعرف وجود الفلوس وعدمها بالحاسة الخارجية قال لي يعني الشنطة قعدت 48 ساعة في المباحث العامة و المباحث العامة معرفتش جواها في فلوس ولا في لغم ولا في ايه قلت له لا قال لي النكسة اللي احنا فيها يعني كويس اللي جت على كده ودوني المخابرات وهناك دخل علي احد الضباط وطبعا
عمرو الليثي :مش غريب عليك ؟
احمد الهوان :مش غريب علي اللي قرب المسافة انه جاب الساعة اللي انا باعتها اصلا للريس زكريا اللي هو اتضح ان هو الرئيس زكريا
عمرو الليثي :ضابط المخابرات العامة واكتشفت ان ضابط المخابرات بتاع اليونان هو سيادة اللواء محمد عبد السلام المحجوب ضابط المخابرات المصرية صح ؟
احمد الهوان :ايوة اهلا حبيبي بتاع وخدنا بعض بالاحضان وقال لي انا كنت متاكد يا احمد ان انت هتيجي شكرا الحكايه كيت وكيت حكيت الحكايه وطلع لي البومات صور كثير جدا قدرت اطلع منهم جاك وابرهام ومن ها عرفنا ان دول رجال الموساد الاسرائيلي قعدنا يمكن حوالي 3 او 4 ايام وفوجئت ان المخابرات العامة قالوا لي روح اجر مكتب زي ما قالوا لك وفعلا اجرت مكتب في 26 شارع شريف باشا في عمارة الايموبيليا وعملت سوس برانت برتيشن والى اخرة واشتريت عربية
عمرو الليثي :يعني عملت كل اللي هما طلبوه منك .
احمد الهوان :المهم اللي هما طلبوه بموافقة المخابرات العامة المصرية الى ان قالوا لي اكتب جواب تحت اشراف المخابرات جواب عادي لمحمد سليم
عمرو الليثي :اللي قال لك عليه ضابط الموساد .
احمد الهوان :قال عليه ضابط الموساد بعت كتبت الجواب ورميت الجواب ومن ضمن الكتابة اللي فيه يعني ابعت لي تذكرة وشوف لي شغلة على ان محمد سليم ده ابن خالتي ده سيم بس فعلا جم باعتين لي تذكرة على الباخرة سيبريا من الاسكندرية الى جنوة وانا قاعد مع البحارة تحت كده بصيت لقيت يعني انا قاعد افكر في اللي ضربتني عليه المخابرات العامة اعملة معهم في اوروبا قاعد طبعا براجع بصراحة يعني فلقيت من حط ايدوة عليه بس ايد جميلة جدا يعني على عنيك من الخلف وبتقول حس جميل وبتقول انا مين انا مين
عمرو الليثي :طلعت مين ؟
احمد الهوان :انا فكرت انها جوجو قلت لها جوجو قالت لي لا انا خريستولا لقيت حاجة جديدة بقي فرس بعتينة جديد خالص بقي
عمرو الليثي :ده انت ربنا يكون في عونك .
احمد الهوان :يعني خريستولا انتي تعرفيني قال لي اه انت مشفتنيش قبل كده قلت لها والله مشفتش قبل كده طيب انت قاعد كده لوحدك قلت لها ما انا بشم هواء يعني قالت انا عزماك على قلت لها بصي انا رايح اوروبا علشان اعمل عقود زي ما علمتني المخابرات المصرية علشان اعمل عقود مع شركات سياحة فاللي هنا معايا هما 11 دولار وفلوسي كلها متحوله الى ايطاليا فمقدرش اجي معاكي تعزميني انا عيب عليَ ان انتي تعزميني وانا معزمكيش قالت لي لا لا انا عزماك وانا صاحبة اوتيل في جينوة يعني باعتين صاحبة اوتيل في جينوة ولما نوصل جينوة يا سيدي وتصرف يعني ابقي اصرف علي
عمرو الليثي :يعني الشخص المناسب في المكان المناسب .
احمد الهوان :يعني ترتيب نزلنا في جينوة وبعدين ودتني اوتيل اللي هو بتاعهم مكان متوضب فيه الاقامة جه جاك وابرهام طبعا بالاحضان كله تمام كله تمام والى اخرة في ذلك اليوم اعلنوا انهم رجال الموساد
عمرو الليثي :صرحوا لك ؟
احمد الهوان :ايوة صرحوا لي طيب ما قلتش انا طبعا على حسب ما علمتني المخابرات المصرية مقولتش ليه كده من الاول ده انا كنت جيبت لكم الجيش المصري كله حي كمان ليه اصل ابويا عبد الناصر اممه فلما اممه عجز فلما عجز مات فانا عايز انتقم لابويا حسب الحدوته اللي قالوها لي هنا طبعا ده محصلش انا طبعا قدرت بفضل الله يعني اكلتهم طيب لما احنا كده اتفقنا والى اخرة موافق تشتغل معانا قلت لهم اجيب لكم الدنيا كلها فاتفقوا معايا على اني تاني يوم اسافر الى ليل في فرنسا وهناك في ليل قبلت وتم تدريبي في مدينة ليل على الحبر السري وعلى طريقة جمع المعلومات والاتصال وادوني راديو بموجة معينة اللي بها كل يوم هيبعتوا لي رسالة الساعة 4 العصر ياني هوتيل فكوسترات
عمرو الليثي :بالشفرة ؟
احمد الهوان :بالشفرة وعلموني الشفرة طبعا في نفس الوقت طلبوا مني ان افتح عدة محلات سوبر ماركت او بقاله مكنش فيه سوبر ماركت وقتها في بقاله طيب انا يا جماعة مش بقال يعني مش هعرف قالوا لي افتح واخسر انت زعلان لية هنديك فلوس
عمرو الليثي :اذن هما عاوزين يعرفوا النقص في السلع الغذائية وايه اللي موجود وايه اللي مش موجود والى اخرة فعن طريق المحلات تقدر تعرف الحاجة بالظبط ففتحت فعلا محل في شارع رشيد وفتخت في شارع الهرم وفتحت يعني حسب ما قالوا لي كل المحلات طبعا كل ما اروح اسرائيل حسب خطة من هنا انت سافرت اسرائيل ؟
احمد الهوان :ايوة انا جاي لحضرتك انا رحت اسرائيل 38 مرة يعني بعد ليل بعد كده بقينا تلتقي في دول اوروبية مختلفة ومن هذه الدول الاوروبية هما بيخدوا جواز السفر بتاعي المصري ويدوني جواز سفر اسرائيل دبلوماسي باسم يعقوب منصور ومن هنا بانتقل به الى تل ابيب فمن هنا يعني على سبيل المثال يعني كانت جولد مائير في الكنيست بعد ما انا تقدر تقول جولدا مائير وموشية ديان الناس ...
عمرو الليثي :قابلوك ؟
احمد الهوان: ايوة طبعا تقابلنا وعلى الاخص اللي كان الريس بتاعي في ذلك الوقت في الموساد شيمون بيريز اللي هو رئيس الجمهورية دلوقتي وعيزرا فيتسمان وايلى كوهين وايلي عيزرا انا بتكلم على البيت بتاعهم ونزلوني في شارع اسمة ديزنجوف في تل ابيب
عمرو الليثي :هل المخابرات المصرية على علم بكل زياراتك الى اسرائيل يعني كل مرة كنت بتروح اسرائيل في 38 مرة دول كنت بتبلغ المخابرات المصرية ؟
احمد الهوان :المخابرات المصرية هي اللي كانت بتسفرني يعني وبرضه عايز اقول في طوال هذه الرحلة 11 سنة يعني ما كان في يعني ضباط مصريين متابعني في اوروبا ومتابعني في تل ابيب نفسها
عمرو الليثي :في اسرائيل كان في ضباط مخابرات مصريين كثير ؟
احمد الهوان :طبعا فيعني الحقيقة كان معمول على كنترول جامد من قبل المخابرات العامة المصرية
عمرو الليثي: يعني ده يمكن بيخليني اسالك المعلومات اللي كانت اسرائيل بتطلبها منك كانت بتؤثر على امن مصر لانها معلومات صحيحة كنت بتعالج هذه المشكلة ازاي ؟
احمد الهوان :الحقيقة المخابرات المصرية يعني مدتش اي معلومات لاسرائيل عن طريقي مغلوطة ابدا ليه لان زي ما سيادتك قولت هما ليهم ناس هنا كثير فبيقارنوا معلوماتي بمعلومات الناس دي
محرر بالموقع الموحد للهيئة الوطنية للإعلام
تناول الشيخ إبراهيم جاد الكريم عضو مركز الأزهر العالمي للفتوى الالكترونية خلق التواضع، مؤكداً أنه من الأخلاق الإسلامية الرفيعة التي...
وجه الشيخ محمود عويس محمود عضو مركز الأزهر العالمي للفتوى الإلكترونية رسالة هامة للمسلمين حول الاستمرارية في العبادة بعد انقضاء...
وصف الشيخ السيد عرفة عضو مركز الأزهر العالمي للفتوى الإلكترونية ليلة العيد بأنها "ليلة الجائزة" وواحدة من أجمل الليالي التي...
تحدث الشيخ عبد الله سلامة عضو مركز الأزهر العالمي للفتوى الإلكترونية، عبر فيديو ببرنامج "زاد الصائم" على موقع أخبار مصر،...