شويكار وفؤاد المهندس يحـاوران يوسف إدريس

ماذا يحدث عندما يجتمع الفنان مع الأديب، فأى نوع من الحوار يدور بينهما، شويكار وفؤاد المهندس، مع د. يوسف إدريس.. نموذجًا، فقد جمعت الزميلة فاطمة حسين بينهم على صفحات

ماذا يحدث عندما يجتمع الفنان مع الأديب، فأى نوع من الحوار يدور بينهما، شويكار وفؤاد المهندس، مع د. يوسف إدريس.. نموذجًا، فقد جمعت الزميلة فاطمة حسين بينهم على صفحات مجلتنا قبل أكثر من 52 سنة ليدور حوار جاد وطريف فى آن واحد، بين نجمى الكوميديا، ونجم الأدب، بما يحمل من أسئلة محرجة أحيانًا كهذا السؤال الذى بدأت به شويكار هذا الحوار.

سهرة قصيرة وصريحة، جمعت بين الطبيب والفنان يوسف إدريس، وبين نجمى الكوميديا فؤاد المهندس وشويكار، لقاء ناقش أكثر من مشكلة فى الفن والحب والحياة.

وبدأت شويكار حديثها البسيط بسؤال لفت إعجاب يوسف إدريس.

- يا دكتور يوسف تفتكر أنا وفؤاد مين فينا السيد ومين فينا الفرفور؟

هو ده سؤال محرج، هو الحقيقة إذا اجتمع رجل وامرأة المفروض إن الرجل يبقى هو السيد.. المفروض يعنى؟!

• يعنى ده رأيك انت وبس لاجتماعك مع رجل وامرأة والا هناك رأى تحتفظ به لنفسك.

- الحقيقة أنى لا أستطيع أن أقول غير ذلك، لأن طبيعة مجتمعنا تفرض أن يكون الرجل هو السيد.. ولكن الذى يحدث فى الواقع أن الست هى السيد، لأسباب كثيرة وأقصد هى السيد ليس من ناحية أنها تأمر وتنهى أبدا، ولكن لو نظرنا فى معظم المجتمعات البدائية وفى أفريقية، نجد أن الست هى أساس الحياة، والرجل ليس إلا مساعداً  لها، أما الرجل فى الأيام دى فهو وسيلة فعلا بالنسبة للست، فهى لا تستعين به إلا كما يستعين الواحد بالمسدس أو العسكرى، يعنى تفضل فى قلب المشاكل إلى أن تتعقد وفى الآخر تقول له: اتفضل بقى اتخانق شوف لك حل. اضرب موت.. الله انت مش راجل والا إيه؟

 حرام الظروف

ثم قال فؤاد لشويكار: أسأل أنا يا شوشو..

• يا دكتور يوسف أنت عملت فيلم "الحرام" وكان من أحسن الأفلام فى نظرى فى الموسم الماضى، فما هو "الحرام" فى نظرك؟

وسكت الدكتور يوسف قليلا ثم أسند ظهره إلى الوراء وقال:

والله "الحرام" فى نظرى شىء مختلف شوية فى "حرام" الفيلم، فالسرقة نوع من الحرام.. سرقة سجادة من جامع.. حرام يرتكبه الفرد ضد حق المجتمع.. يرتكبه المجتمع ضد "عزيزة" فى الحرام، وكل الظروف غير الإنسانية التى كان يعيشها "التراحيل".. الحرام، وضع يثمر سلوك "عزيزة" الذى ينعكس عليها كفرد.. بس!

• وتدخلت شويكار قائلة:

وعلشان كده هناك فرق بين الحرام كقصة وكفيلم.

وعلق الدكتور يوسف: لكن أنا شايف إن الأسئلة دى جد شوية ولا إيه؟

وعادت شويكار تسأل:

• أنا عايزة أسأل سؤال محيرنى.. بصفتك مؤلف وروائى.. لما يبقى فيه دور ضعيف بيكون من المسئول عن نجاحه أو فشله؟

وهز الدكتور يوسف رأسه قائلا:

- قطعا المؤلف نمرة واحد، والمؤلف اللى يجب عليه وهو بيرسم أو يضع شخصيات الرواية ألا يستعرض عضلاته، ولكن يكتب الدور بحيث يساعد الفنان على أن يعطى كل امكانياته كممثل.. فمثلا فى روايات شكسبير، الفنان الذى يكتب الشعر فقط، تجدى أنه يضع الممثل فى موقف معين ويعطيه الكلام الذى هو عبارة عن خطوط موجهة لانفعالاته بالموقف، بحيث التمثيل هنا مش مجرد سرد ولكنه بيضيف للنص، الانفعال البشرى للممثل، فكلما كان الكلام بيدى الانفعال البشرى كانت النتيجة أحسن بالنسبة للمؤلف والممثل، ولذلك تجدى كل المسرحيات الناجحة هى التى تكون كل أدوارها مخدومة من ناحية البناء، فلا يظهر دور على حساب دور آخر.

وتدخل فؤاد قائلا:

تأييدا لكلامك يا دكتور يوسف فى فيلم "طبيبتى الحسناء" هناك شخصية تظهر فى آخر الرواية، شخصية كونستابل لتصبح واحدا من أبطال الفيلم.

 المؤلف يتحمل اللوم

وعادت شويكار تسأل الدكتور يوسف:

• هو السؤال اللى ح أسأله دلوقتى اتقال لى كتير ومعرفتش أرد عليه.. يا ترى نجاح الدور أو فشله من الممثل ولا من المؤلف ولا المخرج.. مش عارفة إيه رأيك انت؟

- هو أحيانا يا شويكار الدور بيبقى كويس ويأتى الممثل أو المخرج خصوصا ويموته، ولكن أرجع وأقول إن المسئول الأول عن بناء الرواية هو المؤلف ولكن يأتى المخرج ويحب يستعرض عضلاته فيشطب مشاهد ويضيف أخرى.. وأنا لا أمانع فى هذا لأن عملية الإخراج عملية خلق جديدة للنص، ولكن يجب على المخرج أن يحدث هذه التغييرات مع المؤلف الذى يحمل الفيلم اسمه - المسكين الذى يقع عليه اللوم فى بعض الحالات.

ويسأل فؤاد فجأة:

• طيب يا دكتور.. تقييمك كمتفرج لشويكار وفؤاد المهندس إيه؟

وأجاب الدكتور يوسف قائلا:

- آه ده سؤال صحفى مليان..

الحقيقة أنى من المعجبين بشخصيتكما الفنية.. وأظن يا فؤاد أنك تذكر لما عرضت عليك تمثل دور الفرفور فى مسرحيتى لأنك من المواهب الكوميدية التى نحرص عليها، ولكن أنا لى انتقادات على بعض رواياتك مش بالنسبة لك كممثل وفنان، ولكن بالنسبة لقبولك تمثيل روايات ضعيفة المستوى من ناحية النص، ونفس الشىء بالنسبة لشويكار لأن كفاءتكما كممثلين ممكن تعطى أكبر من كده، وبالنسبة لشويكار فيما يختص بأدوارها القليلة، لما نيجى ونحطها فى جغرافيا المسرح، نبص نلاقيها بتقوم بالأدوار التى كانت تقوم بها ميمى شكيب فى روايات الريحانى لكن برضه على جديد، ورغم أن هناك بعض الأدوار غير المخدومة من ناحية التأليف.. فمثلا دورها فى "أنا وهو وهى" دور من ناحية واحدة هو دور الست الدلوعة الحلوة التى تعطى هذا التعبير على المسرح، وأنا مش معترض على هذا الدور لأن هذا النموذج موجود فعلا فى مجتمعنا، ولكن كان لابد أن يعالج بطريقة أعمق من كده، ولكن هذا لا يمنع من أننى مازلت معجباً بهذه المسرحية.

 الإسفاف والكوميديا

وسكتت شويكار وظهرت على وجهها علامات التأثر ثم قالت:

• يا دكتور يوسف.. انت تكلمت كلام كويس عن الممثلين عموما والكوميديين خصوصا، يعنى فى رأيك إن الممثل أو الممثلة الكوميدى شخص مش منعزل؟

ورد يوسف بحماس:

لا أبدا الكوميديا أخطر أنواع الفنون، ومش معنى أنى أكتب أو أمثل كوميدى يعنى بهرج، أبدا، والمعروف إن أعظم ممثل أثر فى السينما العالمية وفى أذواق الناس هو "شارلى شابلن" الممثل الكوميدى الخالد، واللا انتم شايفين أن عملية إضحاك الناس دى مهمة سهلة فى هذه الحياة الحديثة التى نعيشها؟

واندفع فؤاد المهندس قائلا:

• يا دكتور يوسف أنا احترت فى كلام النقاد عن كل مسرحياتى.. قالوا على مثلا ده راجل بيمثل بإسفاف واحنا عايزين العمق، وأنا مش موافق على الكلام ده، لأن العمق الذى يطلبه النقاد ده ممكن تنفيذه فى الدراما مش فى الكوميديا..

وقاطعه الدكتور يوسف قائلا:

انت يا فؤاد مش بتسف إطلاقا، يعنى أنا شفت إحدى المسرحيات فى التليفزيون ولا داعى لذكر اسمها، وخرج بعض الممثلين عن النص وبصقوا على بعضهم تصور، فكانت النتيجة إن أولادى الصغار بدأوا يقلدونهم، وده غير سليم من الناحية التربوية خصوصا بالنسبة لجمهور التليفزيون.

• طيب يا دكتور يوسف أنا احترت مع النقاد، فأنا عايز أعرف الفرق بين الإسفاف وعدمه؟

قال الدكتور يوسف:

عدم الإسفاف، الحاجة اللى الواحد يضحك عليها من قلبه دون أن يندم بعد ذلك.. فالإسفاف إنك تضحك بطريقة فيها جرح للشعور العام، الإسفاف هو إنك تضحك بطريقة غير شرعية.

ورد فؤاد المهندس وشويكار فى صوت واحد:

- تضحك بطريقة غير شرعية.. تعبير جميل جدا

وعاد فؤاد يسأل:

• طيب يا دكتور انت شفت كل المسرحيات التى قدمناها فإيه الإسفاف اللى فيها؟

- لا مفيش إسفاف، إلا حاجة واحدة بس حقولك عليها، هى حركة مش كلام، كنت بترفع فيها الجاكتة بطريقة محرجة، بعدها لقيت أطفال فى أكثر من بيت قلدوك فى هذه العملية.

ودافع فؤاد المهندس عن نفسه قائلا:

• الحقيقة أنا واخد هذه الحركة والمشية من الواقع مش من عندى.

ومرت علينا فناجين الشاى لتقطع حديثنا، وفى خلال هذه الفترة حكت شويكار للدكتور يوسف قصة حبها لفؤاد المهندس.. وعادت شويكار لتسأل د. يوسف:

• يا دكتور "الحب" تفتكر ازاى الست وجوزها -ومش لازم تكون فنانة- ازاى يحتفظوا بحياتهم لفترة طويلة دون أن يصيبها الملل؟

- ده سؤال مهم الحقيقة فى حياتنا، وأنا هذه الأيام عرضة لسيل من هذه الأسئلة، والظاهر إن حكاية الملل بين الأزواج اصبحت مشكلة قومية وده سببها بسيط جدا.. إننا ناس رومانسيين شوية، يعنى البنت بتحب خطيبها فى ظروف معينة فيتكون عندها معنى الحب على أنه المشاعر التى خلقتها فى الأول، ومن هنا ينشأ الملل، فعلى كل زوجين أن يختارا العلاقة التى تناسب كل وقت، يعنى تلاقى الست متجوزة وعندها عيال على وش جواز وعايزة تعيش فى بحور الغرام والرومانسية كما كانت من عشر سنين مثلا.

وسادت فترة صمت قال بعدها يوسف إدريس: إيه رايكم أسال أنا شوية؟

• يا فؤاد إحنا بنعتبر الريحانى كان بيمثل الموظف أو المواطن السيئ الحظ الغلبان، ويومها كان بتضحك الناس.. تقدر تقول لى إيه الشخصية اللى انت بتمثلها من الشخصيات اللى انت مثلتها فى رواياتك ولكن محصلة هذه القوى.

وأجاب فؤاد قائلا:

الحقيقة أنا إلى هذا اليوم ماخدتش خط محدد لشخصية معينة أمثلها إلى الأبد، يعنى أنا دايما أبحث على الدور الجديد.

• أنا أقصد يا فؤاد أسألك ليه الناس بتتعاطف معاك؟ يعنى الناس تعاطفت مع الريحانى لأنه كان بيمثل شخصية الراجل الغلبان.. وأنت ليه؟

- مش عارف ليه، يمكن هذا التعاطف كان بيختلف من مسرحية لأخرى لاختلاف الدور نفسه

وتدخلت شويكار قائلة:

- أنا بقول إن الناس تعاطفت مع فؤاد لأنه بيمثل دور المصرى الصبور الشريف.

• حقيقى.. طيب يا شويكار وانت على المسرح بتمثلى ألم تأت لك لحظة شعرت فيها إن فؤاد جوزك، وإيه موقفك فى اللحظة دى بين الدور والحقيقة؟

وضحكت شويكار وظهرت على وجهها علامات الخجل..

- طبعا ما اقدرش أقول إنى بنسى إن فؤاد جوزى على المسرح.. ففى مواقف الحب أو الغزل بحس إنى بمثل طبيعى، أما المواقف اللى المفروض فيها شد وجذب حقيقى بضعف فيها حوالى 50% ..طيب والسؤال الثانى المقابل لكده.

• فى الحياة الجادة فى البيت ألم تأت لك لحظة شعرت فيها إن فؤاد المهندس اللى أمامك الممثل مش جوزك، وخصوصا فى مواقف الحب؟

وبسرعة ردت شويكار قائلة:

- يا خبر ده ما حصلش أبدا.. واسرع فؤاد قائلا: أبدا والله.

ولكن يا دكتور مفيش مانع إن فؤاد مرة يكون داخل البيت وحالته كده، أقوله الله انت بتمثل على والا إيه.. يعنى كده ولكن مواقف الحب فى البيت بتكون حقيقة 100% والا تبقى حكاية.

• وعاد يوسف يسأل:

طيب يا شويكار وانت بتمثلى على المسرح فى مشهد أمام فؤاد وجدت منه انفعالاً جعل الجمهور يصفق ويضحك.. هل تشعرين نحوه كفنانة بغيرة بعيدا عن العلاقة الزوجية؟

وقبل أن تجيب شويكار قال فؤاد:

أجاوب أنا السؤال ده..

اللى بيربطنى بشويكار أكثر وأكثر أنها بتحوطنى وأنا على المسرح بحالة من الرعاية بحس إنها بتدفعنى إلى أن أزيد وأزيد من تصفيق وضحك الجماهير، وأنا عارف إنها كفنانة بتشعر بنوع من الغيرة، إنما شويكار طبيعتها كده حتى فى الحياة، ولكن المهم والأهم إنى إذا غلطت غلطة فى حقها أو فى حق أحد الزملاء فهى أول من ينبهنى.

أذكر أنى مرة قبل مسرحية "السكرتير الفنى" جمعت الممثلين وقلت لهم أنا مش عايز حد على المسرح يعمل أى حركة تلفت إليه نظر الجمهور، أثناء زميله فى الركن الآخر من المسرح بيقول كلام مهم، لدعم المسرحية، فردت شويكار على:

انت يا فؤاد بتقول الكلام ده وانت أول واحد بتعمل كده، انت فاكر أنا ونظيم شعراوى واحنا بنتكلم فى أحد اركان المسرح وانت فى الناحية الثانية عمال تربط فى كرفتتك وتعمل حركات حولت أنظار الجمهور لك!!

طيب يا شويكار السؤال لك:

• الحقيقة أنا سعيد بقصة حبك لفؤاد اللى حكيتها لى، وهى قصة تؤكد قيمة الحب فى الحياة.. فانت قلت انك اقتنعت بفؤاد كفنان أولا وتطور هذا الاقتناع إلى حبك له كإنسان، فهل ضرورى إن الزوجة تكون مؤمنة بزوجها كفنان وهل لها دور فى حياته؟

وأجابت شويكار قائلة:

- طبعا لا شك إن إيمان الزوجة بزوجها سواء فنان أو غيره يدفعه إلى الأمام وخصوصا إذا كان هذا الحب صادقاً ومفيش مانع انها تنقده ولكن بطريقة لا يفقد فيها ثقته بنفسه.

وختم الدكتور يوسف حديثه قائلا:

والحقيقة أن الحب أحسن نهاية ممكن تكون لأى شىء فى الحياة، وأقولكم كل سنة وانتم طيبين وربنا يزيد من حبكم