press_center
تقديم: محمد صلاح
تاريخ الحلقة: 20/1/2009
الضيوف :
الأستاذ. إبراهيم المعلم - رئيس اتحاد الناشرين المصريين
الدكتورة. أنيسة حسونة – مدير عام منتدى مصر الاقتصادي الدولي
محمد صلاح: كيف يقرأ الناس الصحف و المجلات في مصر ، ماذا ينتظر القراء من أكثر من 600 مطبوعة ما بين يومية وأسبوعية وشهرية وسط زخم الفضائيات والصحافة العابرة للقارات وعصر الانترنت والصحافة الصفراء والحمراء والغامقة والفاتحة هل ينتظر القراء الصحف أو المجلات التي تصدر شهريا أو فصليا ، هل ما ينشر في هذه النوعية من الصحافة يختلف عن ما ينشر في الصحافة اليومية ولاّ كله كلام .. أهو كلام ...... والسلام
فاصل
محمد صلاح: كان لابد للحكم على الإصدارات الشهرية والمجلات الفصلية من جولة داخل صفحاتها علشان نكتشف في النهاية أن هذه الصحافة مازالت لها شنه ورنه في عالم الصحافة الزاخم الكثيف الذي يصدر بشكل متوالي يوميا أو أسبوعيا على كل الألوان.
عينة بسيطة مثلا من مجلة الهلال الشهرية اللي يترأس تحررها زميلنا مجدي الدقاق اللي نقوله حمد لله على السلامة من وعكة صحية منّ الله عليه بعدها بالشفاء حمد لله على السلامة يا مجدي ، ومجدي كاتب ملف مهم جدا عن الشيعة
المجلات الشهرية والإصدارات الفصلية نلاحظ أنها أكثر عمقا وربما أكثر تخصصا على سبيل المثال الملف اللي أُعد في الهلال عن الشيعة كان فيه تركيز شديد على الشيعة في لبنان وتحديدا حزب الله ، نسأل أخونا مجدي هل للملف علاقة بالخلاف الذي ثار بين الدكتور يوسف القرضاوي والشيعة في إيران مثلا ولاّ التركيز كان على الحالة اللبنانية له مدلولات خاصة ... عموما الملف مهم جدا بحسب رؤيتنا له خصوصا كمان اللي كتبه الدكتور محمود إسماعيل عن المذهب الشيعي وبدايات التشيع وأحداث الفتنة الكبرى.
اما الكاتب الفلسطيني عبد القادر ياسين فكتب عن فكرة المرجعية زي ما بنلاحظ كده إن هناك تنوع حتى داخل الملف الواحد دة ما بيكونش متاح قوي للصحافة اليومية وكذلك الأسبوعية عبد القادر ياسين كتب عن المرجعية عند الشيعة وعن نشأة حزب الله وعرفنا لأول مرة إن حزب الله نشأ أصلا بواسطة الفلسطينيين أثناء جودهم في لبنان وليس عن طريق إخوانا اللبنانيين أو عن طريق الإيرانيين.
الدكتور حسن أبو طالب كتب عن إشكالية سلاح حزب الله عارفين طبعا الجدل الذي يثار كل فترة في العالم العربي وخصوصا طبعا داخل القطر اللبناني عن مستقبل حزب الله وخصوصا مصير سلاحه كتب حسن أبو طالب عن تحالفات حزب الله وقال انه موضوع سلاح حزب الله موضوع معقد جدا في لبنان أكيد معقد ...
الدكتور سمير غطاس الباحث المصري المتخصص في الشئون الفلسطينية كتب في نفس الملف دراسة مهمة عن التجربة العسكرية لحزب الله منذ بدايتها وحتى الآن غطاس حاول الإجابة على السؤال المهم "على من نطلق الرصاص" طبعا تفسيرات السؤال مفهوم منها طبيعة الأحداث اللي جرت في لبان خلال السنة اللي إحنا فيها
وبما إن مجلة الهلال مجلة ثقافية بالدرجة الأولى رغم إن الثقافة تضم بين ثناياها بطبيعة الحال السياسة والمجتمع والاقتصاد وغيره من فروع المعرفة فانك لابد حين تتصفح مجلة الهلال أن تنظر عبر النافذة التي يعدها الدكتور ماهر شفيق فريد وهي نافذة على الثقافة العالمية .
ومن الثقافة العالمية تقفز فورا إلى مقال تستمتع بيه جدا كتبه الدكتور نبيل حنفي عن أسمهان لسه الناس بتتكلم في أسمهان بمناسبة المسلسل اللي عرض في شهر رمضان المبارك الماضي ثم أعيد عرضه على عدد من القنوات نعرف من المقال الجميل للدكتور نبيل حنفي إن موسيقار الأجيال محمد عبد الوهاب كان واقف مع فريد الأطرش بياخد عزا المطربة الكبيرة بعد رحيلها و أثناء العزا ألقى الشاعر احمد رامي شاعر الشباب قصيدته الشهيرة اللي بدأها بقوله " يا ضياع المنى" :
يا ضياع المنى على أسمهان
ذهبت في شبابها الريان
ثم ولت ولم تزل في صباها
تتمنى الحياة ملء الزمان
يمكن أول مرة نعرف إن الفنان الراحل عبد الرحمن الخميسي اللي اكتشف طبعا سعد حسني وهو جد الفنانة لقاء الخميسي كتب قصيدة ألقاها أيضا قبل دفن أسمهان قال فيها :
لا تسيروا سراعا إلى القبر
ولكن منكسين بطاء
آه يا أسمهان راحت لياليك
وكانت على الزمان وضاء
كل باق يصير ذكرى ولكن
أنت ..
أنت ذكرى تصير دوما بقاء
شوفوا الكلام دة موجود في المجلات الشهرية في الهلال .
بعد الهلال هذا العمل الصحفي الرفيع المستوى يمكنك أن تقفز إلى إصدار شهري أخر من مؤسسة الأهرام إذا كانت مجلة الهلال بتتباع في السوق ب4 جنيه بهذا الكم الكثيف والعميق من المواد المهمة هناك مجلة البيت الشهرية بتتباع ب20 جنيه وفيها كم من الإعلانات على كل لون بيوت بقى وأزياء وماكياجات وطبعا إعلانات الإكسسوارات بتاعة البيوت والمفروشات والستاير والكنب والانتريهات والمطابخ كله بقى كله موجود يعني هتلاقي الإعلانات ع القد يعني ... دي ب4 جنيه ودي ب20 جنيه .. مجلة البيت اللي بتترأس تحريرها الزميلة سيلفيا النقادي اللي مليانة إعلانات زي ما بنقول فيه بعض الناس بتعتبر إنها موجهة إلى مجتمع مخملي يعني مجتمع بعيد شوية عن الطبقة دون الوسطى لكن والله فيه بعد تصفح المجلة هتلاقي مواد كتيرة جدا تتحدث أيضا عن اهتمامات ربة البيت المصرية العادية نظرة سريعة على مجلة البيت هتكتشف إنها بتقدم لك مثلا في العدد رقم 100 موضوع عن قصر اثري في روما كان عايش فيه نابليون بونابرت هتشوف طبعا نماذج السفرة الفاخرة وهتشوف كمان المواد اللي كانت بتتقدم على هذه السفرة والديكورات الفخمة جدا المحيطة بها كمان المجلة بتقدم لك فكرة غريبة جدا وأنت بتتصفح الموضوع عن هذا القصر عن استخدام أو الاستفادة من ضهر السرير إحنا اللي نعرفه إن الواحد وهو قاعد على السرير كده بيتفرج على التليفزيون يتعدل علشان يعرف يتفرج على التليفزيون فيسند ضهره على ضهر السرير ويقعد يشوف بقى برنامج كلام والسلام لو مش قاعد في السرير وقاعد في الانتريه تقدر برضه تشوف البرنامج من غير ضهر السرير خالص ...
مجلة شهرية أخرى هي مجلة وجهات نظر سوف تجد انك أمام عمل صحفي مختلف تماما عميق وفي نفس الوقت إيقاعه سريع يخدم القارئ منذ الغلاف اللي بيعمله الفنان المبدع حلمي التوني هتلاقي كمان موضوعات عميقة ومهمة جدا مثل العنوان اللي ظهر على الغلاف عن التعليم في مصر "إنفاق هائل وعائد هزيل" قضية التعليم طبعا كل الناس بتتكلم فيها حتى الصحف القومية اليومية وكذلك الإصدارات الأسبوعية ولكن في هذا الملف هتجد دراسة أكثر عمقا تكتشف من خلال الملف اللي شارك فيه شيخ التربويين المصريين الدكتور حامد عمار انه حجم الإنفاق الأسري اللي بيتم على التعليم يتراوح ما بين 63 إلى 80 مليار جنيه .. رقم مذهل جدا شوفوا انتوا بقى العائد شكله عائد أزاي .
نعود إلى الإصدارات الشهرية اللي تميزت بها دار الهلال ولا يمكن أن تمر على هذه الإصدارات دون أن تتوقف أمام طبيبك الخاص إصدار شهري له تاريخ عميق استطاع أن يثقف الناس طبيا ..في الإصدار الأخير أو في العدد الأخير هناك دراسة مهمة عن إدمان المقويات لكن نكتشف انه المجلة اتوصت شوية بالجماعة الأمريكان وقالت انه فيه 30 مليون مريض أمريكي بيعانوا من العجز الحمد لله إن المجلة ماجابتش سيرة المصريين خالص وركزت على الجماعة الأمريكان ، الأمريكان طبعا عندهم مشاكل كتيرة جدا بعد الأزمة العالمية الأخيرة دي أكيد بقى دمرت لها كده في السكة كام حد إحنا بقى الحمد لله آخر تمام ....
في كل الأحوال تبقى الإصدارات الشهرية أكثر عمقا تحوي دائما دراسات عميقة مكثفة يكتب فيها نخبة من كبار الخبراء في مختلف المجالات دة الفرق بينها وبين الصحافة اللي ممكن نقول عليها صحافة أل Take away الصحافة السريعة اللي محدش بيقف دايما قدامها طويلا هات المجلة الشهرية لكن المشكلة إن لو واحد من الزملاء الصحفيين اللي بيشتغلوا فيها وهم دائما من المظلومين لما يسألك قريت موضوعي؟ تقدر ترد عليه وتقوله قريته أنت؟ هتلاقيه أصلا مش فاكر كتب الموضوع امتى .. واهو كلام ..........والسلام
محمد صلاح: سؤال دايما يطرحه الأستاذ الكبير أنيس منصور "هو فيه حد بيقرا اللي بنكتبه؟" والناس عايزة تقرا إيه و لمين وليه حجم سوق النشر في العالم العربي مازال محل تساؤلات كثيرة هل يقرأ العرب كما الأمم الأخرى وهل توزع كتب الأدباء والخبراء والمحللين السياسيين الكبار كما توزع كتب السحر والجن والبخت ..إيه رأيك .. جاوبني .. أنت صريح
أ.إبراهيم المعلم :شوف أولا نعرف الناس حجم حركة النشر في العالم قد إيه أخر إحصاء أعلنه اتحاد الناشرين الدولي سنة 2006 عن 2005 إن حجم مبيعات الكتب في العالم حوالي 90 بليون دولار ، 90 ألف مليون دولار يعني حوالي مثلا 500 ألف مليون جنيه مصري ودة رقم مهول وهذا الرقم اكبر 4 مرات من الفيديوجيم اللي الناس بتبقى مكتسحة اكبر 4 مرات من رقم مبيعات الأفلام إلDVD أو CDاكبر 4 مرات من رقم الموسيقى اللي بتتباع DVD أو CD أو خلافه واكبر من دول على بعض فرقم كبير جدا وفي التقرير دة قالوا إن للأسف في العالم العربي وأفريقيا وأمريكا اللاتينية على بعض اقل من 5%
محمد صلاح: يعني العرب وأفريقيا
أ.إبراهيم المعلم: وأمريكا اللاتينية اقل من 5%
محمد صلاح: يعني العرب كام بقى ؟
أ.إبراهيم المعلم: العرب أنا أظن إن إحنا اقل من 1 % كعرب لدرجة إن اتحاد الناشرين الدولي بيدق ناقوس الخطر لازم نتعاون مع هذه البلاد والناشرين في البلاد دي ونشجع القراءة لأن دة شيء بالغ الأهمية للعالم كله ما يصحش العالم يبقى فيه فجوة سموها الفجوة وفيه ناس سموها الثقب الأسود وقالوا إن الكتب مش كفاية القراية مش كفاية حركة الترجمة من والى مش كفاية وأظن إن فيه اهتمام إنما مصر بالذات واخدة الريادة في محاولة تصحيح هذا الخطأ فمصر بالذات فيه حملات فيه حملات القراءة للجميع فيه مكتبة الأسرة فيه معرض القاهرة الدولي للكتاب فيه أتعمل البرنامج القومي للكتاب اللي مد 39 ألف مدرسة في مصر لأول مرة كل مدرسة بمجموعة من الكتب المختارة بعناية واللي اتحطت شروط على أعلى مستوى دولي للتأليف وفي الرسم وفي الإخراج وعملتها جمعية الرعاية المتكاملة مع وزارة التربية والتعليم مع المعونة الأمريكية ماخدتش حقها من الإعلام ماخدتش حقها من التقييم لكن الكتب دي وصلت ووصلت لكل المدارس وبقى لأول مرة جميع أطفال مصر والمدارس الابتدائية والإعدادية والثانوية عندهم فرصة إنهم يشوفوا كتب جميلة بالفعل يستعيروها ويطلعوا عليها ويستمتعوا بيها ولأول مرة للمدرسين لان الحكاية مش طلبة بس دة المدرسين نفسهم عمرهم ماشافوا كتب جميلة أو كتب تستحق أن ترى غير الكتاب المدرسي
محمد صلاح: مش جميل قوي يعني
أ.إبراهيم المعلم: لا أنا أرى إن الكتاب المدرسي هو المشكلة الحقيقية يعني إحنا لا يمكن هنوصل بالقراءة بالدرجة اللي إحنا نرجوها دلوقت القراءة هي الوسيلة الرئيسية وإحنا في عصر المعرفة هي القوة والعلم هو المستقبل ولا يكفي التعليم كل العالم بيقولك انت في مرحلة تعليم مستمر بابك القراءة وهما تخطوا اللي احنا بنقعد نتخانق عليه يقولك ايه كتاب ورقي ولاّ كتاب إلكتروني فيه محتوى . المحتوى دة علم ومعارف وابداعات واختراعات وابتكارات الورق وسيلة والكتاب الالكتروني وسيلة وبكرة هيبقى فيه وسيلة تالتة وبعده وسيلة رابعة كل الوسائل دي نستخدمها إن العلوم والمعارف والإبداعات تصل إلى القراء
محمد صلاح: طب الجهد المصري دة كان ورا اختيارك كنائب لرئيس اتحاد الدولي للناشرين ولاّ جهد شخصي
أ.إبراهيم المعلم :كله يجتمع مع بعضه في الأخر هم بيختاروا شخص إنما الشخص دة لابد انه يكون على درجة من الكفاءة ومن الدراية أو من الخبرة في حركة النشر في العالم ومن القدرة لكن الناشر لما الناس بتبص هو الناشر مش فرد الناشر هو دار نشر، دار نشر مثلا فيها 240 فيها ناشرين اللي بشتغلوا في نشر كتب الأطفال وفي نشر كتب الأطفال كل واحد منهم عنده قدرة وعنده خبرة وعنده مستوى وعنده قدر ومجموعة كبيرة من المؤلفين ومن المبدعين ومن الباحثين بتمثل الناشر والناشر بيمثلهم كلهم لابد ان هو يكون على قدر هذا الكيان وعلى قدر هذه المسئولية والقدرة على العلاقات طبعا في الأخر لابد إنها تكون بلد بتحترم حقوق الملكية الفكرية بتحترم حرية النشر ولا مش هييجي واحد يمثل عكس ذلك ويختاروه
محمد صلاح: حركة النشر في مصر إحنا في مصر هنستفيد ايه من منصبك الجديد؟
أ.إبراهيم المعلم: هنستفيد عدة أمور أول حاجة أنت في عالم بيتغير وبيقفز يوم بعد يوم اتحاد الناشرين الدولي دة بيضم جميع ناشرين العالم ..ناشرين العالم دول اللي بيعملوا كل الكتب من كتاب ما قبل المدرسة لكتاب الحضانة لكتاب المدرسة الابتدائي الإعدادي الجامعة كتب الفن كتب الأدب كتب المراجع القواميس الكتاب الالكتروني المكتبات العامة انك تكون عضو فعال متفاعل عن طريق بلدك تقدر توصل لك بطريقة أسهل وفكر بلدك وإبداع بلدك يبقى جزء من المنظومة العالمية بحيث يترجم عنك صوتك ورسالتك وأدبك يصل للعالم أظن إن دي خطوة في هذا الاتجاه اتحاد الناشرين الدولي بيعمل مع عدد من الهيئات والمنظمات في تعاون وثيق وتكامل يعني أول حاجة اتحاد الصحفيين الدولي لأن دول وجهين لعملة واحدة ففي تكامل وتعاون وتناسق بين اتحاد الناشرين الدولي واتحاد الصحافة العالمي في نفس الوقت هو فيه تعاون كامل مع اليونسكو في سبيل تشجيع القراءة وتشجيع الترجمة وفي سبيل اختيار عاصمة الثقافة فيه تعاون كامل مع المنظمة العالمية لحقوق الملكية الفكرية والحقيقة حقوق الملكية الفكرية معنى كبير قوي عنوان صغير لكن معنى كبير لان الملكية الفكرية هي ما يضيفه البشر تأليفاً وإبداع واختراعا وابتكارا في الأدب وفي الكتب وفي التعليم وفي الطب وفي الهندسة وفي الزراعة وفي الصناعة لتقدم البشرية ف ازاي إن أنت الصناعات القادرة على صناعة التقدم انك توفر لها الحقوق المعنوية أولا والأدبية اللي تخليها تبدع اكتر وتساهم أكثر في الارتقاء بالبشرية ازاي عن طريق حقوق الملكية الفكرية الآن أصبح الكتاب الجيد الموسوعة المتميزة الكتاب المدرسي العبقري بدل ما كان بيصدر عن دار نشر واحدة لبلد واحدة عن طريق حقوق الملكية الفكرية بيصدر في 30 بلد 20 بلد 40 بلد بحيث إن العلم والبحث والعبقرية يتقاسم تكلفتها العالم فيبقى قدرتها على التميز والاستفادة لا تصل إلى بلد واحد لكن لكل البلاد في نفس الوقت .
محمد صلاح: أنت شغلتك الكلام مش باعرف أوقفك.
أ.إبراهيم المعلم: دي احد مشاكل الكتاب المدرسي أقولك إيه تعالى مثلا في حاجة زي الرياضيات والعلوم ، الرياضيات والعلوم حاجة عالمية طيب إذاً فيه بلاد متقدمة جدا في الرياضيات والعلوم وعملت مناهج وطرق تدريس كتب جذابة وجميلة وفعالة في تعليم التلاميذ وفي تفوقهم بحيث إن في المقايس العالمية فيه ترتيب عالمي بيطلعوا دول متفوقة هل إحنا نظل نقعد 200 سنة لما نوصل ليهم ..؟ ولاّ تقول يا ناشرين يا مصريين هاتوا لنا خلاصة ما يحدث في النشر العالمي وهاتوا لنا المناهج دي طوروها ومصروها وعربوها وخليها تناسبنا بحيث إن إحنا نعمل النقلة دي مرة واحدة .
محمد صلاح: مين اللي هيقول طب أنت مقدم دلوقت على تجربة صحفية فين الكتاب في الصحافة يعني الكتاب ثقافة والثقافة كتاب في الخمسينات والستينات ولحد السبعينات الكتب كان فيه عروض للكتب في الصحف كان فيه كتب بتنشر على حلقات ثم بعد كده تطبع كان فيه يعني كبار الكتاب وفي الأعمدة" كتاب أعجبني" "هذا الكتاب قرأته" ليه اختفى ليه الصحافة ماعادتش مهتمة ؟
أ.إبراهيم المعلم: ما هو أنت دلوقت تقول الأسرار اللي إحنا ناويين نعملها دة لابد أن يعود مش هتحصل نهضة ثقافية حقيقية إلا أن يبقى فيه عرض كافي مستمر وعميق وجذاب لكل ما يصدر
محمد صلاح: طب ليه ما عدش بيحصل ما بيأكلش عيش ما بيبيعش جرايد يعني ؟
أ.إبراهيم المعلم: لا أنا رأيي انه هو موجود بس مش بالدرجة الكافية ولا يكتب بالطريقة الجذابة بدرجة كافية للقارئ وما بقاش الكتّاب الكبار زمان عندهم الشجاعة انه يقول الكتاب دة عجبني الكتاب دة عظيم الكتاب دة ......
محمد صلاح: حاجة تخوف يعني فيه إيه ؟
أ.إبراهيم المعلم: حتى انتوا في التليفزيون ساعات تحرجوا دار نشر تكسب جايزة مش عايز تقول اسمها ما لازم
محمد صلاح: لا دة عشان بيدخل في باب الإعلانات لكن أنا بتكلم على ......
أ.إبراهيم المعلم: لازم كل حاجة تسمى بأسمائها ولازم المجتمع يعرف زي ما بيعرف السلبيات نعرف الايجابيات ونعرف كل حاجة بقدرها الحقيقي لا نضخم ولا نقلل
محمد صلاح: يعني أنت صاحب مشروع ثقافي وهتكون ورا تجربة صحفية زي ما أنت قلت دلوقت يمكن بنكشف بعض اللي مكوجود في الجريدة إن شاء الله فيه اهتمام عندك بمسألة الثقافة مسألة الكتاب عن طريق الصحافة
أ.إبراهيم المعلم: اه ..أنا رأيي إن دة شيء مهم جدا ولابد أن ياخذ حقه في التغطية المعمقة الجذابة اللي تفيد القارئ وتمتعه وتخليه يعرف العالم فيه كله إيه العالم كله أفكار إحنا بنفاجأ بسياسات نعتبرها كأنها هبطت كبراشوت لكن بينما كل ما يجرى في السياسة كان في كتاب من 10 سنين إذاً إحنا اطّلعنا على فكر العالم وسياساته وأفكاره ونظرياته أول بأول أفكار العالم بأقلام عربية في صحافة مصرية وفي صحافة عربية هتبقى جزء من العالم وهتعرف وهتروح وهتشتري إنما قولي الكتاب ازاي يزداد الإقبال عليه وقراءته إذاً لا احد يعرف إذاً إنه صدر لا احد لم يقرا عنه النقد أو التعريف الكافي أنا أظن إن ابتدأ دلوقت اهتمام في السنتين اللي فاتت وابتدأت العروض والنقد للكتب ومناقشتها تزيد في مصر
محمد صلاح: طب خليني أنقدك واصطاد من كلامك كده واسألك لما صدرت مجلة "وجهات نظر" كان العنوان الرئيسي ليها "الكتب وجهات نظر" بقت بتتقال دلوقت وجهات نظر بس واختفت كلمة الكتب
أ.إبراهيم المعلم: هي ما اختفتش ع المجلة هي اختفت على لسان الناس
محمد صلاح: اه بس تفتكر ليه ؟
أ.إبراهيم المعلم: لسهولة النطق ولأنه وجهات نظر جذابة اكتر بدليل انه انتوا في التليفزيون المصري عملتوا برنامج اسمه "وجهة نظر" لان فيها معنى الحرية ومعنى الديمقراطية لكن لازالت مجلة وجهات نظر مدخلها لكل الأمور هو الكتاب وساعات تتسع لان الكتاب ممكن يكون كتاب وممكن يكون بحث وممكن يكون مؤتمر وممكن يكون فيلم
محمد صلاح: أضافت إيه للسوق أضافت إيه للثقافة ؟
أ.إبراهيم المعلم: والله أضافت أو بتحاول إنها تعرف القارئ المهتم في مصر وفي العالم العربي بكل ما يصدر في الكتب على اختلاف أنواعها سواء سياسة ثقافة أدب تاريخ في العالم وفي العالم العربي وفي مصر وبقى لها أكتر من عشر سنين وليها تقدير كبير طبعا هي مش مجلة شعبية هي مجلة حتى الآن للنخبة المثقفة القارئة وأرجو إنها تستمر وإنها تحاول أنها تجدد نفسها وتوسع قرائها خصوصا إن للأسف فيه نوع إحنا لازال التنافس عندنا قصير النظر فتلاقي فيه حتت كتير وكان هناك نوع من التجاهل الإعلامي وعدم التعاون والتفاعل والتعريف بما يصدر لكن أظن عملت رسالة وقد تكون المطبوعة أو المجلة أو الإصدار المصري الوحيد اللي بيصدر حوالي 50% مما يطبعه
محمد صلاح: ناس كتير برضه بيحبوا الكورة وموضوع الكورة وموضوع البث الفضائي لمباريات النادي الأهلي يعني أنت أتكلمت فيه وناس كتير أتكلمت فيه والجرايد عمالة تكتب فيه حتى الآن قول لنا أخر كلمة في الموضوع إيه ؟
أ.إبراهيم المعلم: أنا ما بقولش حق أصل الحق دة دي حقوق أساسية لازم في الدستور ما اظنش إن من حق المواطن يشاهد مباريات الكورة مجانا وإلا يفتح إستاد القاهرة وممنوع تاخد فلوس من الناس أنت بتقول فيه تذاكر المقصورة بكذا والدرجة الأولى بكذا مظبوط ولاّ لا ، حق المواطن انه يتعلم أحسن تعليم انه يعرف الحقيقة عن طريق الإعلام بحرية كاملة حقه أن يجد العلاج الصحي على أعلى مستوى وتتيح للمواطن انه يستمتع بمباريات كرة القدم دون أن تظلم حق من يقدمها ليقدمها أحسن ما يكون لكن الحرص على إيه إن فيه القناة المصرية الرئيسية الأرضية والقناة الثانية المصرية وقناة النيل الرياضية والقناة الفضائية المصرية كلها مفتوحة ومجانية تتيح لكل المواطنين أن يشاهدوها مجانا في نفس الوقت حتى قناة الأهلي والمستقبل هيبقى فيه قناة للزمالك أو لغيره هي قناة مفتوحة مجانية فمفيش احتكار مفيش أبدا أنك تحرم حد من حقه في أن يشاهد لكن الشيء الأساسي انك تحترم حق الأندية حق الاتحاد وحق الجميع
محمد صلاح: قولي هو مين اللي غير موقفه الأهلي اللي غير موقفه ولاّ اتحاد الكورة اللي غيّر موقفه ولاّ أصحاب الفضائيات ليه حصلت القضية فجأة كده وحصل اللي حصل بعدها ؟
أ.إبراهيم المعلم: الأهلي غير موقفه أنا كنت نائب رئيس النادي الأهلي لغاية سنة 2004 وكنت رئيس اللجنة المكلفة بإنشاء قناة للنادي الأهلي من سنة 2002 فإحنا موقفنا ثابت من وقتها وعملنا أول اجتماع مع وزير الإعلام السيد صفوت الشريف في أخر سنة 2003 ومع وزير الشباب وقتها من وقتها إحنا فيه موقف ثابت بنقول زي الأندية العالمية الكبرى عايزين يبقى فيه قناة تتيح معلومات تتيح رياضة وفي نفس الوقت تحترم حقوق النادي وتوفر له ما يمكنه أنا الآن بره لكن النادي الأهلي مستمر في هذا ومستمر في الدفاع عن حقوقه ومستمر في التنسيق مع وزارة الإعلام ومع اتحاد الكورة هو حصل خلط في المفاهيم ، النادي الأهلي أظن إن هو موقفة واضح جدا إن مباريات المنتخبات أو البطولات الدولية اللي بينظمها اتحاد الكورة أو الأفريقي دي حقوق هذه الاتحادات بدليل مش نشوف منتخب مصر قبل الأهلي والزمالك ، لما بتيجي بطولة أفريقيا هل تقدر تذيعها مجانا إلا لو اتفقت ودفعت حقها وأحيانا بتسطيع وأحيانا تجد أن الحق أكثر فلا تأخذه ، مباريات الدوري اللي هي ملك للأندية في العالم كله يا إما النادي بيبيع يا إما الأندية بتتفق مع بعض وتعمل رابطة عشان تتفاوض وتبيع لمحطة واحدة فقط أو وكالة إعلان واحدة فقط وهذه المحطة تبيع High lights تبيع الأجوان تبيع لقطات تبيع وتصدر للبلاد الأخرى حصل هذه المشاكل لأن القوانين ماكانتش واضحة ولأن للأسف أحيانا لما تكلم ناس خبراء في الإعلام ما كانتش الحقائق أمامهم واضحة بدرجة كافية وما قالوش الحقائق واضحة ومسلسلة بالدرجة الكافية حق النادي الأهلي ثابت وواضح وجابوا خبراء في القانون من مصر ومن العالم ما أخدوش خطوات إلا بعد هذا والاقتراح إن السنة الجاية تحصل رابطة بين الأندية كلها وتتوزع النسب بينهم كل نادي مكاسبه أد إيه وألقابه أد إيه وجمهوره أد إيه ويبقى فيه نسب وترى مصالحها مجتمعة وتقدر تبيع هذا الدوري بما يحقق مصالح الأندية ويمكنها إنها تحسن أدائها وبما يتيح للمشاهدين أنهم يتفرجوا عليها .
محمد صلاح: فيه بعض المخاوف إن موقف النادي الأهلي يمكن أن يتبعه في مرحلة لاحقة الإعتراض على بث مبارياته على القناة الثانية وقناة النيل للرياضة والقنوات الأرضية دة ممكن يحصل يعني الأول الفضائيات وبعد كده الأرضي بتاع الناس الغلابة
أ.إبراهيم المعلم: شوف النادي الأهلي وأي نادي في مصر لا يستطيع أن يكون خارج القانون ولا فوق القانون ما دام في قانون بيقول إن فيه سيادة للتلفزيون الأرضي وفيه حقوق يبقى الكل يلتزم بها ولا أظن إن فيه نادي يستطيع أن يقول ، إذا حصل في المستقبل تطورات قانونية إنما القانون هو القانون والكل يحترم القانون والكل يسير من خلال القوانين .
محمد صلاح: يبقى بالقوانين ح نشوف المباريات على القناة الثانية وقناة النيل للرياضة ، فضائي بقى الأهلي يصطفل هو واتحاد الكورة ويتصرفوا مع الفضائيات ، نورت يا جميل
محمد صلاح: من أكثر الكلمات شيوعا في الصحافة المصرية في الفترة الأخيرة كلمة " ناشط" إذا كانوا بقى أكتر من حد يبقوا "نشطاء" الجماعة النشطاء دول حنلاقيهم دايما في الجمعيات الأهلية ومنظمات حقوق الإنسان في أكثر من مكان حتى في المجتمعات الثقافية دلوقتي بيبقى فيه ناشط ثقافي ، أنتي بتعتبري نفسك ناشطة يا دكتورة ؟
الدكتورة أنيسة حسونة : لا أنا بعتبر نفسي مساهمة في المجتمع المدني الناشطة دي توصيف شويه جايز أنا في المجتمع المدني وما بعملش نشاط له قيمة ف ما بقاش ناشطة ساعتها
محمد صلاح: هو فيه ناس في المجتمع المدني يبقوا موجودين وما يعملوش نشاط ؟
د. أنيسة حسونة: أه طبعا أنت عندك فوق العشرين ألف جمعية أهلية في مصر بعضها بيعمل نشاط كويس جدا وبعضها لا .
محمد صلاح: طب كلمينا على منتدى مصر الاقتصادي الدولي
د. أنيسة حسونة: المنتدى دة جمعية أهلية كونها بعض رجال الأعمال من عشر سنين الهدف ساعتها كان دعم سياسات الإصلاح الاقتصادي والتوجه نحو اقتصاد السوق ودعم سياسة الإصلاح في جميع المجالات النقاش مع الحكومة وسماع رأي منظمات المجتمع المدني وكافة أطراف أو أطياف المهتمين بالإصلاح الاقتصادي في مصر اقتصادي أو سياسي أو ما يرتبط به .
محمد صلاح: يعني نقدر نقول إن المنتدى زي جمعيات أهلية أخرى منكفأة على ذاتها وبتتعمل مع الجهات اللي بتتعامل معاها زي ما سيادتك قولتي دلوقتي ولاّ ساهمت في توعية الناس في توصيل التغيرات والإصلاحات السياسية والاقتصادية لهم ودعوة الناس للمشاركة في عملية الإصلاح .
د. أنيسة حسونة: أنا أقدر أدعي إن المنتدى قام بالدور دة اللي حضرتك بتقوله لأن أنت ما عندكش العضوية أولا دي مش حاجه حكومية أنت بتدعوا الحكومة علشان فيه حد قدامها بيناقش لكن دة جزء من النشاط بعض الأنشطة الأخرى أنت بتدعوا المختصين عالميا وإقليميا ومحليا للحديث في القضايا اللي بتهم الرأي العام إحنا عملنا مناقشات حول الأحزاب المصرية ، عملنا مناقشات حول الثقافة وما يصدر من إصدارات جديدة ، لكن أنت حاطط ما يهم الموطن المصري المحدود الدخل أو العادي في بؤرة اهتمامك إن أنت عايز تشرح السياسات الاقتصادية دي إيه وعايز تقدم في نفس الوقت توصيات إذا كان أنت شايف وفق ردود الفعل اللي بتجيلك إنها لازم يتم تعديلها بشكل أفضل
محمد صلاح: شايفة إن الموطن اللي هو محدود الدخل اللي بتتكلمي عنه حاسس بجهد المنتدى أو حاسس بشكل عام بجهود منظمات المجتمع المدني تجاهه ؟
محرر بالموقع الموحد للهيئة الوطنية للإعلام
تناول الشيخ إبراهيم جاد الكريم عضو مركز الأزهر العالمي للفتوى الالكترونية خلق التواضع، مؤكداً أنه من الأخلاق الإسلامية الرفيعة التي...
وجه الشيخ محمود عويس محمود عضو مركز الأزهر العالمي للفتوى الإلكترونية رسالة هامة للمسلمين حول الاستمرارية في العبادة بعد انقضاء...
وصف الشيخ السيد عرفة عضو مركز الأزهر العالمي للفتوى الإلكترونية ليلة العيد بأنها "ليلة الجائزة" وواحدة من أجمل الليالي التي...
تحدث الشيخ عبد الله سلامة عضو مركز الأزهر العالمي للفتوى الإلكترونية، عبر فيديو ببرنامج "زاد الصائم" على موقع أخبار مصر،...