press_center
تقديــــم : محمد صلاح
تاريخ الحلقــــة : 8 / 4 / 2008
ضيوف الحلقة : د. محمود عماره خبير اقتصادي ورئيس جمعية رجال الأعمال بفرنسا
أ. حازم شريف رئيس تحرير جريدة المال
د. أماني الطويل خبير بمركز الأهرام للدراسات السياسة و الإستراتيجية
محمد صلاح : خبر مهم بيقول إن 400 من رجال الأعمال والتجار استيقظت ضمائرهم ووقعوا على ميثاق شرف بمنع الاحتكار وضبط الأسعار .. نوعية الأخبار دي مانشرتهاش الصحف لأنها ماحصلتش أصلا إذا كان حد قرا خبر زي ده في أي صحيفة يبقى الصحيفة بتهزر أو نشرتها بمناسبة كذبة ابريل وبتقوله أي كلام ... واهو كلام و السلام
فاصل
محمد صلاح : نطل عليكم الآن من القناة الثانية بعد التعديلات في خريطة برامج التليفزيون بدرنا الميعاد شوية عشان اللي بيناموا بدري يلحقوا يشوفونا ويشوفوا معانا أحوال الصحافة كل أسبوع ..الصحافة اللي فيها أخبار وتقاريروموضوعات مبهجة وفيها أخباروتقارير وموضوعات مش مبهجة قوي....
خلينا في الأخبار المبهجة ...
جريدة روز اليوسف أعلنت عن زيادة كبيرة في الأجورأول يوليو وأبرزت تأكيدات الرئيس حسني مبارك إن العلاوة إل 15 % مش كفاية وإنها يجب أن تزيد
وفي روزا كمان بانت بشاير إلغاء الجمارك على السلع يعني ..سعر الزيت تراجع جنيه ونص والسمنة خمسة جنيه ..الرز جنيه والاسمنت تراجع 30 جنيه دفعة واحدة ....
الأهرام كمان بأجمل خبر من شأنه أن يسعد الملايين " انفراج أزمة الخبز قريبا "...الطوابير انخفضت بمعدلات متفاوتة في بعض المحافظات ،رئيس شعبة المخابز بيقول إن تشديد الرقابة والضوابط الجديدة حلت الأزمة بنسبة 50% ...
الجمهورية نشرت من جانبها أرقام الدعم اللي أعلنها مركز معلومات الوزرا وقالت إن دعم الخبز بيستهلك 8 مليارات جنيه سنويا بنسبة 14.8 % من قيمة الدعم ..بينما المواد البترولية بتاخد 74.3 % من الدعم .
.الأرقام بتقول كمان إن نص الأسر المصرية بتآكل يوميا عشرين رغيف على الأكل ..عشرين رغيف يغمسوا بيهم إيه !!..
الوفد نشرت كمان أحدث قرارات وزير التضامن الاجتماعي د.علي المصيلحي لحل أزمة العيش ..من بين هذه القرارات قرار طالب فيه الوزير من المخابز تهوية الخبز قبل بيعه بتلت ساعات يعني الأفران تخبز والناس تفضل واقفة طوابير تلت ساعات والأفران جوه تكون سايبة العيش بيتهوى ...والناس في الطوابير برة... مش مشكلة .
ومازال الجدل المثارمنذ فترة حول دعم الخبز الحكومة كانت عايزه تعرف هل تبقي على دعم العيش أم تحوله إلى دعم نقدي ؟
الأهرام نشرت الإجابه من خلال استطلاع أجراه مركز معلومات مجلس الوزرا الاستطلاع كشف إن 86% من مستهلكي الخبزعايزين حقهم ناشف عايزين ياكلوا عيش مش عايزين فلوس بيرفضوا تحويل الدعم إلى دعم نقدي
نهضة مصر نشرت ملف كبير بعنوان " قمحنا على أرضنا " .... كيف ؟
كان أهم ما ورد في الملف سؤال ليه مصر بتستورد قمح ؟ وإيه اللي ممكن يحصل لو امتنعت دول القمح الكبرى عن تصديره إلى مصر ؟
في الملف كان أحد الحلول اللي بيراها الخبراء إننا نزرع القمح في كندا و في السودان .
الزميل محمد علي إبراهيم رئيس تحرير الجمهورية في الزاوية اللي بيكتبها بإسم المصري ذكر القراء بالاقتراح القديم اللي كان الدكتور حسن خضر وزير التموين السابق عرضه وكان أقترح فيه زراعة القمح لصالح مصر في كندا يومها أو أيامها الصحافة نزلت سخريه من الاقتراح بالكاريكاتير والتعليقات اللي كانت رافضه هذا الاقتراح عدنا تاني إلى نفس الاقتراح .... ربنا يمسيك بالخير يا دكتور حسن .
ومن الأخبار السعيدة أيضا الأهرام زفت البشرى السارة وقالت إن الأرز يعود مره أخرى إلى موائد المصريين 400 جنيه إنخفاض في سعرالطن بعد قرارمنع تصديره .
الجمهورية قالت كمان إن قرار وقف تصدير الأرز تسبب في تراجع أسعاره و إصابة المضاربين بخسائر شديدة ... المهم إن الناس متخسرش ... المضاربين يخسروا ما هم اللي بيضاربوا بقى ....... يخسروا
خلصنا الأخبار المبهجة ندخل على الأخبار اللي مش مبهجه
اهتمت الصحافة بخبر ماكانش ولابد ، خبر وجع بطون الناس عن ضبط جزارين وبائعين للأكلات الشعبية كانوا بيقدموا لحوم الكلاب والقطط والحمير للناس
أخبار اليوم نشرت إن وزارة الصحة اعترفت بزيادة معدلات التسمم وإنها كثفت حملتها لضبط الأطعمة الفاسدة
لكن في الوقت نفسه الوفد بتبرأ الدكتور حاتم الجبلي وزير الصحة من لحوم الحمير والكلاب وبيقول إن عمليات الذبح مسئولية وزارة الزراعة وهيئة الطب البيطري بقت المشكلة دلوقتي وزارة الصحة ولا وزارة و الزراعة .
رئيس هيئة الخدمات البيطرية مش بيرد على وزير الصحة بأن الوزارة بقى مش مسئوله أو اتخذت الإجراءات السليمة لكن فضل إنه يطمن الناس على أكلهم وصرح للجمهورية تصريح بيقول إن لحوم الحمير مفيدة وكمان مغذيه وكمان مليانه بالبروتينات وبالسكريات ... إحنا منعرفش الكلام ده ... إحنا نعرف إن الحمار نقوله شي يمشي .. نقوله يس يقف .
الدكتور حامد سماحه رئيس هيئة الخدمات البيطرية بيأكد يا جماعه إنه طالما صحة الحمار كويسه قبل ما يندبح ف لحمته مفيهاش أي ضرر بالعكس دي كلها بقى بروتين وسكريات .... فيها غذى يعني ، وكمان بيقدم وصفه مثالية لحفظ لحوم الحمير بعدم تعريضها للهوا فتره طويلة ..... إحنا يا جماعه لما بنمشي في الشارع ونشوف حمار متعرض للهوا ودانه بتعمل إيه .... مشاكل ... وعلى طريقة خبراء التغذية بيستكمل الخبير ويقول إ ن المطاعم اللي بتقدم لحوم الحمير في الأسواق لازم تضيف عليها بهارات ... أدوها بهارات كتير .... البهارات بتخلي لحمة الحمير عسل ...... وأبقى قابلني بقى لو عرفت تفرقها عن لحمة البتلو ولا الكندوز لا الجاموسي ولا الحاجات التعبانه دي .
الدكتور حامد سماحه بيتحدى إن أي حد يقدر يتعرف على لحم الحمير إلا بالكشف المعملي وفي النهاية الراجل بيطمنكوا ياجماعه إن فخده الحمار السليم مبتضرش وإن الريش المشوية بالبهارات ممتازة خصوصا لما تقعدوا تاكلوها وانتوا بتسمعوا أغنية بحبك يا حمار ....... بحبك يا حمار مشوي .
على نفس الصفحة من الجمهورية الفقهاء بيردوا على رئيس الخدمات البيطرية وبيقولوا إن لحوم الحمير حرام وإن الرسول عليه الصلاة والسلام نهى الناس عن أكل الحمير .
المفاجأة الأخرى جت على لسان الدكتور ياسر محمود عضو مجلس الشعب اللي نشرت صحيفة الدستور خبر عن طلب إحاطه قدمه لوزير الزراعة جاء فيه أنه لا يوجد نص في القانون يحرم تجارة الكلاب و القطط و الحمير طلب الإحاطة كشف إن القانون بيحرم بس الذبح خارج السلخانة ..... يعني الذبح خارج السلخانة دا محرم قانونا .... تذبح إيه بقى جوه السلخانة دا موضوع تاني ... عموما الموضوع أتفقس الحمد لله وإلا م كناش حنلاقي حمير لعربيات الكارو
الجمهورية نشرت خبر له علاقة بموضوع الحمير قالت إن البرسيم بيكسب والقطن بيخسر المزارعين بيفضلوا أحيانا إنهم يزرعوا أراضيهم برسيم بدلا من القطن لأنه أسهل وأسرع في التسويق .... وكمان دلوقتي الحمير بتترعرع وممكن ببساطه نفهم إن البرسيم مهم لتسمين الحمير لكن أيضا المهم جدا القطن عشان نعرف نلبس بدل م ناكل والناس بعد كده ... ظروفهم بقى .
خبر تاني من خمس أعمدة في الوفد بيقول إن مصر فيها أربع ملايين مريض نفسي وإن لجنة الصحة في مجلس الشورى تتوقع زيادة أعداد المرضى بسبب زيادة الأسعار بالطبع الخبر فيه نوع من المبالغة لأن ارتفاع الأسعار ممكن يتعب الناس لكن مش ممكن يحولهم إلى مرضى نفسيين و إلا ممكن نقول إزاي الموظف اللي بينزل من بيته ويلاقي حالة المرورالمرتبكة و الزحمة الشديدة والمواصلات الصعبة دا ممكن يبقى مريض نفسي ... ممكن يتعب شويه يعني ... يبقى قول تعب و ماتقولش مرض .
نروح كمان لنوعية أخرى من الأخبار اللي مش ح نقول إنها مبهجه ولا مش مبهجه
خبر نشرته نهضة مصر عن إعلان علقه سائق تاكسي في سيارته بيقول للزباين الرجاء عدم وضع الأيادي على كتف أي أمراه مهما كانت صلة القرابة منعا للإحراج ... سواق التاكسي بيقعد وشايف في المرايا ناس بتحط إيديها على كتاف اللي جنبها فقررإنه يكتب التعليمات عشان محدش يتجاوز .
خبر تاني في نهضة مصر يكشف إن النساء يمثلن 65% من القوه الشرائية يمكن علشان كده الأهرام نشرت نتايج دراسة بتقول إن الرجال أكثر انفعالا من النساء ..... طبعا مش هم اللي بيدفعوا .... الراجل يدفع وينفعل ويتحط من ضمن الناس اللي مرضى نفسيين ..... تعبانيين نفسيين مش مرضى ولا حاجه .
أما الدكتورة إكرام منصور في الجمهورية بتنصح النساء بكيفية التعامل مع الرجال و بتقول إن الراجل أبو عين زايغه عاوز واحده صاحية .... الستات لازم يكونوا صاحيين عشان يخلوا بالهم من الرجالة اللي عنيهم زايغيين .... طبعا أكيد الستات اللي مش صاحيين و نايمين الرجالة بتوعهم أكيد عنيهم بيبقوا زايغيين .... م ستتاهم نايمين .
الأهرام نشرت كمان أحدث موضة في عيادات الأطباء قالت إن الكشف الطبي عند الدكاترة أصبح ب الدولار ونشرت الأهرام حكاية دكتور وابنه في عيادة شعبيه كتب على العيادة ما يلي "الكشف للمصريين ب 150 جنيه ولغير المصريين ب 20 دولار" ... لما تيجي تحسبها حتلاقي برضه المصريين بيدفعوا أكتر ... يمكن يا جماعه الديسكاونت دا للترحيب بالأجانب في مصر وزيادة فرص الاستثمار .
على أي حال الآخر بنختم بخبر موجود في ملحق أجازه أخباراليوم عن قائمة أقوى 100 شخصية عربيه كما ورد في استطلاع مجلة أرابيان بزنس جاء على رأس هذه الشخصيات القوية ... أقوى شخصيات عربيه نانسي عجرم ، وأليسا ، وتامر حسني إلى جانب الوليد بن طلال ، و وليد الأبراهيم ، و محمد الفايد ... نانسي عجرم من أقوى الشخصيات العربية ... ربنا يقويكوا جميعا ... واهو كلام والسلام .
محمد صلاح : أقلام قليلة هي اللي اهتمت في الصحافة على مدى الأسابيع الماضية بالمسئولية الإجتماعية لرجال الأعمال في حل أزمة الرغيف ..أصوات قليلة هي اللي سألت أين الوطني من القطاع الخاص وأين نجوم البزنس الذين دافعوا عن الليبرالية الاقتصادية كمان أصوات قليلة كده هي اللي سألت دور رجال الأعمال بعيدا عن مشروعاتهم الاقتصادية ...
دكتورحسن أبو طالب سأل في مقاله الأخير في الأهرام هو القمح مسئولية مين الحكومة ولا الناس ؟..أستاذ صلاح الدين حافظ سأل السؤال بطريقة أخرى وقال هي الأزمة أزمة خبز ولا أزمة الإمبراطورية الشرسة ؟ ..محمود عمارة كتب عن أزمة الجوع في العالم...أزمات كتيرة تتعلق بتطبيق الأمورالحياتية للناس ... طب فين رجال الأعمال يا دكتور؟
دكتور محمود عمارة : أنا تصوري إن قبل ما اسأل رجل الأعمال أقوله تعالى اعملي مستشفى ولا مدرسة أو عملت إيه في العيش الأول اسأل نفسي هل الراجل ده دفع الضرايب بتاعته اللي عليه أنا مش من مؤيدي فكرة اسيب الحجم الكبير في الأموال اللي هي من حق الشعب على رجل أعمال وهي في صورة ضرايب وآجي أحاسبه أو أقف عند واحد عمل أتوبيسين تلاتة
محمد صلاح : إحنا مابنحاسبهوش .. إحنا بنلومه بس يعني
دكتور محمود عمارة : أنا رأيي الابقى ....أنا مع أني أخد الضرايب بتاعتي كاملة ..ماينفعش رجل أعمال يعمل صفقة بمليار و200 مليون جنيه والعشرين في المية اللي عليه ضرايب مايدفعهمش ..وبعدين أنا مستني منه مدرسة ..لا ..أنا أخد العشرين مليون الأول ..الميتين مليون أسف اللي هما حق الدولة وبعدين أعمل أنا بيهم مدرسة
محمد صلاح: حازم ..أنت رئيس تحرير صحيفة المال وكتبت في مقالك الأخير مؤيد فكرة أستاذ صلاح منتصر حول حل مديونيات الصحف وبان من كتاباتك إنك مؤيد لفكرة الليبرالية الاقتصادية وبالتالي بعيدا عن الحكومة كيف يمكن لرجال أعمال كيف يمكن أن يساهموا في حل مشاكل الصحافة ؟....يحلوا مشاكل الناس
حازم شريف : أنا رأيي المسئولية الاجتماعية ..آه يجب أن نعمل توعية بين الشركات وده بيحصل فعلا ..يعني فيه شركات هي طالعة موضة في العالم كله مش في مصر وبس فكرة المسئولية الاجتماعية بقت جزء من "الحوكمة "للشركات وموضة في الفترة اللي فاتت في العالم كله ...هنلعب الدور دا بالنسبة لتوعية الشركات الكبيرة اللي هي في البورصة ابتدت في فعلا فيه توعية للشركات دي ولكن أنا في هذه اللحظة ومن فترة طويلة شايف إن دا دور الدولة أنا ما قولش إن الدولة ترجع تاني لجبايات ضرايب مرتفعة لكن هناك الكثير من الوسائل الضريبية كي نأخذ من الأغنياء ومن رجال الأعمال ودا حق الدولة الطبيعي ولمصلحة رجال الأعمال ولمصلحة الشركات ولمصلحة المجتمع فرض أنواع معينة من الضرايب لأننا داخلين على مرحلة صعبة الموضوع مش موضوع عيش وبس
محمد صلاح : دكتور محمود ..تكلفة الفرن تقريبا اقتصاديا حوالي 150 ألف جنيه محتاج حوالي 10 أو 15 ألف جنيه عشان يشتغل كل شهر...هو عيب إن رجل أعمال يبقى عنده مصانع أو مزارع يعمل فرن بشكل سريع عشان يساهم في حل الأزمة ؟
دكتور محمود عمارة : لا مش عيب ..أنا بقولك في خلال سنتين 2010 أنا بقولك هيحصل 100 إلى 150 ارتفاع في الأسعارعما هو عليه لسبب بسيط إن زمان كان المصريين أو إحنا دول العالم التالت بناخد مرتين دعم ...دعم الدول الغربية اللي بتدعم الإنتاج هناك اللي أنا بستورده ال 75 % من غذائي اللي أنا بجيبه من بره ودعم من الحكومة الداخلية ...
النهاردة الاتنين اتشالوا إذا المواطن المصري خلال السنتين الجايين هيدفع ما يدفعه المواطن الأمريكي أو الإماراتي أو الفرنسي في غدائه وده في منتهى الخطورة ..يعني اللي حصل دلوقت بداية ارتفاع الأسعار في العالم .
محمد صلاح : ربنا يطمنك ..حازم فين المسئولية الاجتماعية فين دور رجال الأعمال في مشاكل تتعلق بالتوظيف والقضاء على البطالة.. مسألة الضرايب دي مسألة تتعلق بالأوراق في النهاية الحكومة أو وزارة المالية هتحاسبهم على الأوراق اللي موجودة ..قانون الضرايب ما بقالوش لسه كتير ماشي في طريقه والحصيلة زي ما انت شايف بتزيد..غيرمشكلة الجوع ..غير مشكلة الغذاء وهي مشكلة بالفعل عالمية ..يعني مش ممكن نستند على إن المشكلة عالمية ونرمي الحمل على جهة واحدة وهي الحكومة ونترك ناس تانية مستفيدة من الأوضاع ولا إيه ؟
حازم شريف : لا أنا ما قلتش كده . أنا قلت الحكومة أنا مابالقيش باللوم على الحكومة ..أنا قلت إن الحكومة من حقها دلوقت إنها تعمل تعديل في السياسات الضريبية بتاعتها من أجل زيادة الحصيلة الضريبية وهي زيادة من وجهة نظري وأنا راجل مع الليبرالية ومع كل حاجة ومع الرأسمالية ولكن باقول في هذه اللحظة تحديدا ثمة تغيير يجب أن يحدث في السياسة الضريبية للدولة من أجل فرض أنواع من الضرائب على السلع الاستهلاكية على الطرق بتاعة مارينا ...كل الكلام دا كله يجب أن يحدث فيه تغيير ...إحنا داخلين على مشكلة ..إحنا من تلات أشهر فاتوا كانت الحكومة بتدرس استبدال الدعم السلعي بدعم نقدي دلوقت لو تلاحظ إنهم بيتكلموا عن الإتنين ..بيتكلم عن زيادة الدعم وزيادة مرتفعة جدا في الأجور هذا يعني المزيد من العجز في الموازنة ..هذا يعني عدم القدرة على مكافحة التضخم في المستقبل....
إحنا داخلين على منحنى قلقان منه يعني ما بقولش ان فيه كارثة .
محمد صلاح : لكن في المقابل فيه ناس بتشتغل وناس بتكسب وبتحقق أرباح عالية جدا وفيه ناس بتشتري زي ماإنت بتقول في مارينا والتجمع الخامس والتجمع السادس .
حازم شريف : بالظبط.....أنا بقول في النهاية افرض ضرايب سيبك من العشرين في المية أنا مع العشرين في المية
محمد صلاح : وبعدين اللي بيشتروا هنا هما هما اللي بيشتروا هنا..يعملوا دور بقى نشوف منهم حاجة للناس
حازم شريف : ماشي فكرة رجل أعمال في النهاية هو شخص طبيعي زي أي واحد فينا بيخاف ويطمح ويمنح ويمنع وبيقلق على مستقبله وعنده رغبة في الامتلاك وفي الاكتناز أحيانا بعضهم لكن أنا مقدرش ألعب على فكرة التوعية بس إن أنا أخاطب الراجل بمنطق خيري أو اخاطب رجال أعمال بمنطق لا علاقة له بالمصلحة أقوله خللي بالك لو الأمور استمرت كده دا يأثر على أعمالك.. في ناس هتفهم وفيه ناس مش هتفهم ..في ناس هتؤدي وفي ناس ماتؤديش دا مجرى لطيف نشتغل فيه ولكن في النهاية أنا شايف وأنا مابرميش هنا المسئولية على الحكومة هي بتعمل أو ما بتعملش
محمد صلاح : هي مش المشكلة إنك ترمي .
حازم شريف: أنا معلش في كلامي مش هي دي القضية لكن دا دور الدولة إذا حبيت إن أنا أرمي دا دور الحكومة على حسب المصطلح اللي أنا هاستخدمه إن هي تعمل بعض التعديل في سياستها الفترة اللي جاية وفيه عجز في الموازنة أعتقد أنه يكون فادح جدا.
محمد صلاح : عارف الخوف من إيه ؟ يا دكتورعادة لما بتفرض ضرايب جديدة أو بتفرض رسوم جديدة يأتي هؤلاء رجال الأعمال أو التجارزي ماهو حاصل ويطلعوها برضه من الناس والناس مش مستحملة يعني هنعود في النهاية إلى أن الناس أو المواطن البسيط يأس ومضطر إنه يدفع اكتر.
دكتور محمود عمارة: شوف هاديك مثال بسيط في الدول اللي هي تخلصت من المشكلة دي الدولة كمنظم وقامت بدورها الحقيقي في البلاد اللي هي تقدمت يعني أنا مقدرش أحاسب رجل أعمال بالمنطق اللي بنتكلم بيه ماعملتش ليه مدرسة ..ماعملتش ليه فرن ماعنديش قانون يقولي حاسبه مش من حقي .
محمد صلاح : ليه قانون أنا مش محتاج قانون ؟
دكتور محمود عمارة: لكن الأول أعمل اللي في غيدي اللي هو القانون برة هل تتخيل إن في فرنسا لو عندك شقة أو بيت تمنه يعادل 4 مليون جنيه مصري مش كتير تدفع ضرايب زيادة عن الضرايب الطبيعية تدفع 4% في صندوق للفقراء خللي بالك أنا النهاردة عندي عقارات ماعليهاش ضرايب ..برة أي عقار أي بيت عليه ضريبة مالهاش علاقة بالأسعار أنا بتكلم عن العقارات اللي هي الأملاك الكبيرة اللي بتزيد عن حد معين لو قلت مثلا بدءا من 10 مليون جنيه العقار لازم يدفع ضرايب في حدود كذا الدخل الصافي النهاردة إنت لو سجلت كل فلوسك في صورة أسهم مش هتدفع ضرايب هل دا يبقى جايز؟
دور المواطن هنا يعمل إيه ؟ فيه حاجة إسمها ضريبة الدخل العام أو الدخل النهائي أنا بعت أسهم مابدفعش ضرايب لكن في النهاية أنا كسبت في النهاية أنا جالي فلوس الفلوس دي لابد أن أدفع عليها أل 20% النهائي اللي بادفعهم مفيش حاجة على الدخل النهائي الصافي بتاعي وده في العالم كله موجود في المغرب في تونس في الجزائر مش بقول أوروبا ....
بالتالي لازم نقف تاني عند دور المنظم اللي هو الدولة وأقولك ان الدولة مسئولة اليوم مش إنها تقعد تقول ماعملتوش ليه ..تفرض وهذه سلطتها وواجبها ..
محمد صلاح: تقولك هنفرض هيصرخوا رجال الأعمال هيطلعوا في النهاية الزيادة من المواطن
دكتور محمود عمارة: ماينفعش ....الراجل اللي كسب مليار دا ويحوله في صورة أسهم وما يدفعش ولا مليم لو أنا أخدت منه 20 % هيحولوا أزاي ع الناس ..أتكلم عن التاجر الصغير اللي هو النهائي المواطن بيتعامل معاه تحت لما أرفع عليه يقولك احملها له لكن دا مابيحملهاش لحد ..هو اللي بيتحملها ودور الدولة إنها تكشف الأدوار دي كلها وتاخد حقوقها اللي متخليناش محتاجين نقوله من فضلك ماعملتش ليه أو تعال اعمل..لا ..أنا مش مستني دا
حازم شريف: أنا عايز أقولك مفاجأة ..إن الكلام دا هيلاقى رضا وقبول من جانب قطاع عريض من رجال الأعمال
دكتور محمود عمارة: دا الطبيعي العادي .
حازم شريف: أنا ما بتكلمش على إنك هتضايقه في البيع عشان كده لما بقول فيما يتعلق بال20 % اللي عاملينها أنا مع بقاءه لكن في النهاية عايز تروح تجيب عربية تمنها 4 مليون جنيه إدفع عليها 4 مليون .. ماينفعش
محمد صلاح: حازم فيه اتهام للصحافة بأنها في النهاية بتروج لرجال الأعمال بتتغاضى في النهاية عن بعض أخطائهم لأنه بقى فيه صحافة رجال الأعمال دلوقت زي مانت متابع وشايف ..أنت شايف انه لو حصل وفرضت بعض الأعباء المالية الجديدة على رجال الأعمال ونجوم البزنس والناس اللي دخولها كبيرة لصالح المواطن ..إيه الدور اللي ممكن تقوم بيه الصحافة عشان خاطر أولا تخفف من احتقان رجال الأعمال مقابل الانفراجة اللي ممكن تحصل للمواطنين ؟
حازم شريف: دا يتوقف على طبيعة الإجراءات ..يعني لو إجراء في الاتجاه دا لأن أنت عندك في النهاية أنت عندك مسطرة بتقف عليها أنت بتقف مع هذه القرارات .
محمد صلاح : أنا خايف إنها تتوقف عند طبيعة المصالح بين رجال الأعمال والصحافة ؟
حازم شريف: خليني أقولك حاجة ..فكرة الصحافة الغير منحازة دي فكرة مش موجودة انتهت خلاص أنا حتى مش مع تسمية صحافة قومية وصحافة مستقلة وصحافة حكومية وصحافة خاصة تمام ..لكي تكون شريف في شروط موضوعية يعني ما ينفعش تقول إن أنا قومي أو حكومي فأنا مستقل ما سمعش الكلام وماينفعش إن أنا أقول إن أنا رايح اشتعل مع الدكتور محمود .
محمد صلاح : فيه معايير للعمل الصحفي ؟
حازم شريف: آه..ماينفعش اشتعل مع الدكتور محمود ف يقوللي اعمل كذا فاعمله .....أتحققت هذه الشروط فدي قضية تانية مش عايز نخش فيها إنما في النهاية لو بيسألني أنا إن في النهاية عندنا سياسات تحريرية معينة ومنحازين لاقتصاد السوق ومع التعددية الديمقراطية ومع النظام الليبرالي عموما وبالتالي أي حاجة هتيجي هاقيسها على المستوى ده .. لو بتسألني أنا كشخص وبالتالي قرارات من هذا النوع كنت باتكلم فيها دلوقت اقف معاهاأو أقف ضد أيا كان رجل أعمال أو مواطن عادي له مصالح أيا كان مين الشخص بمهنية مش هندافع بالمانشيتات اللي على شكل منشورات وخلافه هندافع عن هذه القرارات ...
لو القرارات جاءت عكسية ضد اقتصاد السوق وضد بالتأكيد هناخد موقف ضد مش عشان صالح رجل أعمال او ضد رجل أعمال آخر
محمد صلاح : حتى لو الإعلانات أتقطعت عنك مثلا ؟
حازم شريف: يعني لو أنت عامل مطبوعة عشان مستني إعلان من محمد ماتعملهاش ..اللي غايب عن مصر دلوقت فكرة صناعة الصحافة أنت بتعمل منتج ،هذا المنتج يجب أن يكون منتج جيد ثم أسوق هذا المنتج فتحصل على الإيرادات ..لو أنت بتعمل دا فأنت مش محتاج أن أتوقف انه حضرتك قطعت عني الإعلانات أو الدكتور محمود قطع عني الإعلانات إنما لو أنت باني الموضوع كله على إنه فيه خمسة ستة يحطولك إعلانات فأنت خلاص هتعمل اللي أنت بتقوله عشان كده باقولك فيه شروط موضوعية يخلي عندك حرية حركة .
دكتور محمود عمارة: على فكرة يا أستاذ محمد تعليقا على الجزئية دي ....العالم كله بيبقى فيه فصل بين التحرير والجرنان نفسه والإعلان بيبقى في مكان تاني خالص ..الراجل دا كصحفي ما يتكلمش في الموضوع نهائي بالمرة
محمد صلاح : بس انتوا عايزين تحسسوني أني مش قاعد في مصر ليه ؟
دكتور محمود عمارة: دا خطأ يجب إصلاحه والتوقف عنده ان أساسا رجل الأعمال هو اللي محتاج يعمل إعلان مش الصحفي اللي في الجرنان هو اللي بيدور على الإعلان لو أنا شفت الجرنان بيوزع توزيع عالي 600 ألف نسخة ..500 ألف نسخة ..200 ألف نسخة واصل للشريحة المستهدفة عندي أنا اللي هاجري وراه اعمل إعلان وهو اللي يتمنع ..يعني أجيب واسطة منة شركة الإعلان عشان يعملي إعلان ...الحادث هو العكس تماما
محمد صلاح : أنت رجل أعمال مافكرتش تعمل جرنان ؟
دكتور محمود عمارة: ليه ؟
محمد صلاح : تدافع عن مصالحك
دكتور محمود عمارة: هي دي القضية ..يعني إيه أدافع عن مصالحي هو أنا سارق حاجة عشان أدافع عنها ليه أكون في موقف دفاع ؟
محمد صلاح : يعني اللي عملوا سرقوا !
دكتور محمود عمارة: لا مش قصدي ..لا مااقصدش لكن لما تقولي تدافع عن مصالحك ماتوقعنيش في الغلط ..الفكرة إن كل مهنة زي ما أتعلمنا في الغرب كل حلقة ليها المتخصصين بتوعها ..واحد مرة بيقولي ليه ماتعملش قناة طب وأنا دخلي إيه في ده ..هل دي قضيتي هل دي شغلتي هل دي مهنتي ؟
محمد صلاح : بقى بزنس
دكتور محمود عمارة: واشمعنى ده ..عندي خمسين بزنس تاني في الحتة اللي أنا مبدع فيها
محمد صلاح : وبرستيج وحاجات لطيفة
دكتور محمود عمارة: دي داخلة في ثقافة الأفراد اللي هو ماعندوش الثقة في الذات ..ماعندوش الامتلاء الداخلي اللي بيخليه يتمسك بشئ آخر يغطي بيه نفسه يداري على نفسه إما إنه هو في حاجة بيداري عليها ..في حاجة ابتزازية بشكل أو بآخر أو هو شايف إن هو مشروع اقتصادي ناجح ويقدر يعمله كمشروع وفي الحالة دي ممكن
حازم شريف: أنا بس عايز أقول حاجة إن السبب في السؤال ده هو اللي أنا قلته ماحدش بيبص للصحافة على إنها صناعة يعني فيه فرق بين إن أنا اجي أقول للدكتور محمود ليه ما بتعملش جرنان عشان مصالحك وفيه فرق بين لو أنا باعمل مشروع كبير صحفي واعدي على الدكتور أو غيره من المستثمرين وأقوله وأنا بعمل كذا ودي الخطة بتاعتي وأنا رايح الحتة الفلانية إنما الصحافة في مصر أنت عندك منطق الممول واحد بيحط فلوس من أجل حماية مصالحه إنما الحكومة أو الدولة في الجرايد الحكومية بتاعتها يا إما رجال أعمال بيعمل حاجة زي اللي بتتكلم عليها انه هيمول حاجة من أجل هذا المناخ اللي أنت بتتكلم عليه .
محمد صلاح : الموضوع هيطول ..إحنا خلصنا الفقرة .
محمد صلاح : الصحافة المصرية هذا الأسبوع وكأنها أعادت إكتشاف السودان مرة أخرى وكأنها فوجئت إن السودان يمثل العمق الإفريقي والاستراتيجي لمصر وإن السودان لديه إمكانيات هائلة لحل مشاكل الغذاء في مصر وفي السودان غالبية الصحف تحدثت عن الاتنين مليون فدان على حدود مصر والسودان اللي يمكن زراعتها قمحا يمكن كمان تتغنى بأمجاد مصر والسودان العلاقات الأزلية الوثيقة الأكيدة بين الشعبين ...الغريب إن الكلام اللي بيتقال عن تعاون زراعي مصري سوداني قديم لكن في ظل أزمة القمح عالميا والخبز عال
محرر بالموقع الموحد للهيئة الوطنية للإعلام
تناول الشيخ إبراهيم جاد الكريم عضو مركز الأزهر العالمي للفتوى الالكترونية خلق التواضع، مؤكداً أنه من الأخلاق الإسلامية الرفيعة التي...
وجه الشيخ محمود عويس محمود عضو مركز الأزهر العالمي للفتوى الإلكترونية رسالة هامة للمسلمين حول الاستمرارية في العبادة بعد انقضاء...
وصف الشيخ السيد عرفة عضو مركز الأزهر العالمي للفتوى الإلكترونية ليلة العيد بأنها "ليلة الجائزة" وواحدة من أجمل الليالي التي...
تحدث الشيخ عبد الله سلامة عضو مركز الأزهر العالمي للفتوى الإلكترونية، عبر فيديو ببرنامج "زاد الصائم" على موقع أخبار مصر،...