press_center
تقديم : رولا خرسا
تاريخ الحلقة : 3 يناير2008
ضيوف الحلقة:
أ. حسن نصار
د. رشا عبد الله دكتوراة في الانترنت
الإعلامي / شريف مدكور ، وآخرين
رولا خرسا : لما الأيام بتسعدنا بنقول الدنيا لسة بخير ولو الأيام خاصمتنا بنقول الزمن إتقل خيره وتروح أيام وتيجى أيام ونتخاصم ونتصالح ونزعل ونسامح وفجأة النهاردة اللى كان النهاردة يبقى إمبارح ولو دورنا فى امبارح حنلاقى قصة نحن لها.
والقصة وما فيها النهاردة عن الإنترنت محاسنه ومخاطره لإنه أصبح شريك فى كل بيت ومتهم بإنه مرفق الجماعات أو العائلات وإن اللى بيقعدوا أدامه ممكن دايما بل غالبا مش من طالبى العلم والكمبيوتر أصبح من أساسيات حياتنا والدخول إلى الإنترنت أو شبكة المعلومات الدولية بيتيح فرصة الحصول على كم هائل من المعلومات والبيانات وبيسهل الإتصال بين الناس بين كل قارات العالم بس من ناحية تانية فيه ناس بتسئ إستغلاله بشكل مضاد للدين والأخلاق والآداب والقانون . اللى فتح الموضوع ده كان الصحفى والكاتب عزت السعدنى عمل سلسلة مقالات ولفت نظرنا للموضوع ده عشان كده رحنا له وقابلناه فى التقرير اللى جاى
فاصل تقريرى
الكاتب عزت السعدنى : المستقبل عظيم جدا بالنسبة للنت وبالنسبة للحضارة بس فى الاستخدام هل العيب فى الانسان أو العيب فى الجهاز ، الآلة أم الإنسان أنا شايف إن العيب ليس فى الآلة العيب فى الإنسان نفسه ، الإنسان نفسه يتردد ما بين حاجتين التقدم والإنحراف فيه حاجة بتشده للتقدم لكن الانحراف عوامله رهيبة جدا وعوامله جاذبة أكتر أنا عاوز أقول إن فى الوقت اللى فيه النت ده اللى فيه 200 مليون مشترك فى العالم كله ويمكن أكتر وبيزيدوا كل سنة بنسبة 100 % يعنى السنة دى تقريبا وصلوا لـ300 مليون تقريبا يعنى السنة اللى جاية هيبقوا 400 وهكذا وهكذا لكن هو المسألة كلها إيه إن الواحد يبقى عنده بس جهاز كمبيوتر وبالكمبيوتر يقدر يتصل بشبكة النت باشتراك بسيط أو مجانى أو كده وده بيعرف كل حاجة وبيطلع على كل شئ ويقدر يتكلم مع الناس كلها وبالعكس دلوقتى فيه النت ممكن جدا ، فيه كاميرات بتتركب كاميرا فى الكمبيوتر بتاعك بتبقى صورتك باينه للى انت بتكلمه واللى انت بتكلمها دى برضه صورتها باينة بيحصل حاجات فاضحة جدا وسيئة جدا لدرجة إن فيه عروض ل .. أنا مش عاوز أستخدم كلمة الدعارة عاوز أخليها كلمة انحراف أفضل على النت من غير أى محاسبة ولا أى شئ بيحصل يعنى البنت تتكلم وتقول إبعت لى مثلا 100 جنيه على كارت المحمول وهبعت لك صورتى على النت أدامك دلوقتى فى الأوضاع اللى انت عاوزها وحاجات زى كده وبس وطبعا بعد ما تبعت تعمل الحاجات دى وأنا عاوز أقول إن النت مش مشكلة نفسه لإنه عمل عظيم جدا وعمل حضارى عظيم لكن اللى بيحصل بعد المحادثات دى إن الناس بتحاول تتقابل برة ويشوفوا بعض وحاجات زى كده فيه واحد برضه اللى أعرفه واحد ذوق قاعد بيتكلم كده بيفرفش عن نفسه فى الشغل فعرف واحدة فبيتكلم معاها فبتقول له معرفش إيه وبيقول لها معرفش إيه وحاجات زى كده وبعدين خد ميعاد فى يوم منها إنه يقابلها فهو لما راح يقابلها إكتشف إن الست دى مراته ، مراته هى رخرة كانت بتتكلم فعجبها وحصل طلاق وحصل حاجات مش كويسة أنا مش عاوز أقول حاجات كتيرة حصلت يعنى لما كانت بنت صغيرة عندها مثلا 22 سنة خريجة جامعة أمريكية وبنت ناس كويسين جدا ولد يضحك عليها ويوصل بها الحال إنه من خلال الشات ده إنها تطلع وتتقابل معاه فى شقة مشبوهة وبوليس الآداب يمسكهم ما نعرفش بقى مسكهم فى أوضاع إيه ومش فى أوضاع إيه مش هى دى القضية لكن إن البنت دى تحولت إلى ملف فى الآداب أنا مش عاوز أقول إن الت ده نمنعه لا بس يبقى فيه رقابة عليه من البيت المصرى ، البيت المصرى مفيهوش رقابة حاليا دلوقتى الأب ساب البيت ومشى ، الأم مشغولة بحاجات كتيرة جدا الأم لإن الأب لا يعرف الأم تدارى ولا تداوى لابد إن إحنا نعلم ولادنا إن لو جه كمبيوتر فى بيتنا كيف فيه رقابة عليه
عودة للاستديو
رولا خرسا : منذ أن استخدم الإنترنت فى التسعينات لم يتوقف عدد مستخدميه عن التزياد وفيه إحصائية بتقول إن عدد مستخدمى الإنترنت فى العالم أكتر من مليار مستخدم سنة 2006 وعددهم فى الدول العربية كان حوالى 8 مليار فى نهاية سنة 2003 أكيد النهاردة زاد أكتر بكتير
الإنترنت إبتدت الناس تفكر فيه فى وزارة الدفاع الأمريكانى وعملوا حدث مع ضرب العراق كان الهدف الأساسى منها إنه يحافظ على شبكة الاتصالات التحتية للحكومة أو الجهاز الإدارى الأمريكى فى حالة قيام حرب نووية النت فيها الامكانية إنها تستخدم إستخدامات أخرى بعدها يمكن ب 10 سنين بدأت تستخدم فى استخدام أكاديمى إن أساتذة الجامعة ودكاترة الجامعات بدأوا يتبادلوا النشرات والبحوث العلمية والآراء لغاية ما ابتدأت تستخدم أول استخدام لما بدأت تظهر حاجة اسمها search engine أو أدوات البحث الكلام ده كان يمكن فى أواخر الثمانينات وفى التسعينات ، الطفرة الحقيقية فى الإنترنت بدأت من منتصف التسعينات لما بدأ يوجه كمان للأعمدة إنما الطفرة الكبيرة اللى حصلت فى الإنترنت ما كانش لها مردود مجتمعى قوى أولاً لإن الناس مش شايفة بعضها أنا شايف يادوبك الإيميل ( e- mail ) بتاعك ممكن لو عثرت لك على ويب أبعت لك ماسيدج ( message ) وأنا مش شايف إن إنت فين والا هترد على فين مكانش لها مردود مجتمعى إلا لما كانت الاستخدامات أكتر في الأعمال وإنتاجا للأعمال فى السنتين ثلاثة الأخرانيين مع ظهور المدونات والبلوك برضه القصة ابتدت بشكل مختلف تماما ، القصة ابتدت بإن إيه الناس عايزة فيه( composite) كومبوسيت معين أو فى مجتمع معين بتقول لبعضها إحنا فين النهاردة عشان الناس تعرف هم فين وابتدت الكلمة حتى يمكن المصطلح ما كانش موجود هو حاجة اسمها ويب بلوك يعنى عبارة عن لوك أو جورنال أو وثيقة أنا بقول فيها أن بعمل إيه على الويب وبعدين واحد بشكل عفوى جدا يبيع كلمة ويب بلوك دى وراح فاصل الويب لوحدها وبعدين عمل فراح عامل البلوك فقال لك ويب بلوك فطلع مصطلح البلوك أو المدونة ابتدأ بقى هنا الإنترنت يأخد شكل مختلف تماما بقى فيه ناس بتستنى المدونة بتاعت شخص معين إذا كانت بيتكلم على موضوع سياسى أو بيتكلم على حاجة لها علاقة بالثقافة أو بيتكلم على حاجة لها علاقة بالإقتصاد ، ابتدأ يبقى فيه شكل من أشكال التبادل الثقافى حوالين موضوع معين ، القصة تطورت أكتر من كده لما دخلنا فى مرحلة ( social net ) أو الشبكة المجتمعية اللى هى أشهر حاجة فيها دلوقتى إحنا بنتكلم عليها دلوقتى هى الفيس بوك اللى هى كانت أصلا تداعى لحاجة قبلها اسمها ماى سبيس ( my space) وحاجة اسمها هاي فايف ( high five ) إنما اللى واخد الهجوم أو اللى طالع اللى هو الفيس بوك ( face book ) لإن ده بقى بيحول الويب زى ما احنا اتعدونا عليه إلى موضوع مجتمع كامل يشمل كل حاجة وانت شايف كل حاجة بتحصل أدامك يعنى انت مجرد ما ( sign in ) أو بتخش على الفيس بوك بتلاقى 50 واحد فى هذا السوق العولمى
رولا خرسا : الأستاذ حسن نصار إيه أهم المواقع اللى على العالم العربى ومصر بيحبوا يدخلوا عليها
الأستاذ حسن نصار : والله هو طبعا المواقع كتيرة جدا منها جوجل ومنها الياهو وويكيبيديا والحاجات اللى تدخلى وتستعلمى منها على اصول الكلمات ، إنما الظاهرة المنتشرة قوى فى مصر بالذات والعالم العربى عموما هو الفيس بوك وهو الأكثر انتشارا فى مصر ووصل إلى معدلات حتى سبقت معدلات الإنترنت يعنى إحنا تصنيفنا فى الإنترنت بعيد قوى فى السبعين أو الثمانية
رولا خرسا : على مستوى العالم
الأستاذ حسن نصار : على مستوى العالم من وجهة نظر عدد السكان لعدد المستخدمين إنما على الفيس بوك تقريبا إحنا نمرة 5 على العالم
رولا خرسا : يمكن لازم نشرح شوية للى ما يعرفوش إيه هو الفيس بوك
الأستاذ حسن نصار : هو عبارة عن برنامج تطبيقي على الإنترنت ينتمى إلى جيل جديد على الإنترنت بيسموها الويب تى مومبو يعنى بيبقى الويب الأولانى ده كان الويب نمرة واحد دلوقتى بقى ويب نمرة 2 وهو عبارة عن إنترنت فيه تفاعلية أكثر وابتدت تروح ناحية إن الإنترنت دى بقت أداة اجتماعية وإن فيه سوق للتعبير عن المجتمع كله والمجتمع كله داخل بيتبادل المنافع وبيتبادل المصالح وبيتبادل الرسائل وبيتبادل المعارف عليه ، ميزة الفيس بوك على الإنترنت يعنى انت على الإنترنت لما بتخشى على سايت معين انت مش شايفة انت بتكلمى مين انت بتبعتى رسالة أو بتعملي شاتينج وبتستنى حد يرد عليكى أو ما يردش ، المشكلة فى الفيس بوك إن هو فى الحقيقة سوق انت داخلة كل يوم بتشوفى 50 مليون واحد فى العالم موجودين وعارفة مين من اصحابك موجود أون لاين دلوقتى ومش موجود أون لاين
رولا خرسا : إزاى طب إيه الفرق بينه وبين الويب والإم إس إن اللى كان قبل كدة
الأستاذ حسن نصار : ال msnكان عبارة عن ماسيدج يعنى ببعت لك رسالة وتردى على بطريقة سهلة وبتطور فى الشاتينج على أساس إن إحنا نقدر نعمل جروب إنما القضية هنا إن الإم إس إن لازم أكون أعرفك أو أخش على جروب معين أنا بنتقيه ونقدر نعمل شاتينج مع بعض الفيس بوك بيتيح لك كل هذا وحجم بقى هائل وسط إن فيه حوالى 8 آلاف تطبيق منفصل على الفيس بوك كل اللى انت بتعمليه فى ثانية ان انت بتنزلى الأبليكيشن ده أو التطيبق ده وبتبتدى تستخدميه التطبيق ده بقى ممكن أبعت لك نكتة ، أبعت لك حضن ، أبعت لك درينك أو إن أنا أخش على جروب بيناقش قضية هامة أو قضية أدبية أو قضية فكرية وهو عبارة عن مجتمع زى ما انت شايفة المجتمع بره هتشوفيه على الإنترنت ، الإنترنت ما هو إلا وسيط إتصالى ووسيط معرفى فى نفس الوقت
رولا خرسا : طب من أى سن عادة بيبدئ استخدام الفيس بوك
الأستاذ حسن نصار : الفيس بوك عامل شروط ان المفروض ما تخشيش عليه غير لو عندك 21 سنة
رولا خرسا : يا سلام
الأستاذ حسن نصار : إنما كل الولاد طبعا..
رولا خرسا : أيوة
الأستاذ حسن نصار : بيخشوا يسجلوا نفسهم على إنهم أكبر من كده لإن مفيش checking على السن بمجرد ما بتقولى أنا سنى كذا خلاص يفتكر سنى كدة وهم مش من مصلحتهم قوى إن أنا أمنع السن ده لإن هو ده السن اللى بيحصل فيها الإقبال الشديد على الإنترنت لإن فيه تطلع معرفى عايز أتطلع بمجهودى ، دايما بيبقى عند الشباب أكتر من قبول اللى زينا
رولا خرسا : طيب قول لى حضرتك المخاطر زى المواقع بتاعت الفيس بوك
الأستاذ حسن نصار : طبعا المخاطر الموجودة زى المخاطر اللى موجودة فى الشارع يعنى زى ما انت ماشية فى الشارع عربية تخبطنى ، القضية هى هى ما أنا بقول لك إنت نقلتى المجتمع على الإنترنت هتلاقى النصب وهتلاقى الاحتيال وهتلاقى السرقة وهتلاقى التحرش وهتلاقى البورنو وهتلاقى كل حاجة بس أدامها هتلاقى قضايا فى منتهى الجدية وهتلاقى شباب أنا الحقيقة كنت فى وقت من الأوقات بصفتى كهل قديم يعنى وصلت لمرحلة إن أنا إبتديت أفقد الثقة
رولا خرسا : على فكرة لازم نقول للناس إن كهل يعنى مش عجوز ، كهل يعنى اللى هو
الأستاذ حسن نصار : عدى الأربعين
رولا خرسا : اللى هو آخر مرحلة فى مرحلة الشباب
الأستاذ حسن نصار : بالضبط كدة الكهل قبل الشيخ ، أنا الحقيقة إبتديت أراجع نفسى ، أنا كنت ابتديت أبص للشباب وأقول يعنى الشباب بيعملوا كده ليه وبيلبسوا كده ليه وبيتكلموا كده ليه القضية لا هم عايزين كلمة جادة ، عايزين ناس تحترمهم ، عايزين ناس تقرب منهم وتشوفهم عايزين إيه وهم willing أو عندهم النية أو الرغبة إنهم يتعلموا إنما مين بيكلمهم واللى بيكلمهم بيقول لهم إيه ، أنا الحقيقة مخضوض من حجم الشباب يعنى مثلا أنا بكتب ، أنا شاعر كمان من ضمن الحاجات فأنا بدخل على واحد من الsites اللى موجودة لصلاح جاهين يمكن فيه 4 ، 5 موقع لصلاح جاهين كل واحد فيهم عليه 2000 ، 3000 واحد بيتبادلوا رباعيات صلاح جاهين ، بصى بقى إنت بتتكلمى على رباعية صلاح جاهين اللى قمة حضرتك الارتقاء بالفن الشعرى والتجريد فى رباعية ، فيه 15 ، 20 ألف شاب بيخشوا على السايت شباب منهم ناس لسه فى المدارس إنما غاويين الشعر وغاويين صلاح جاهين بالذات وحافظين رباعياته وبيتبادلوا قضايا هامة جدا فأنا ابتديت من ساعة ما دخلت على الفيس بوك ابتديت أراجع نفسى وأقول لا هم
رولا خرسا : حضرتك عملت لنفسك موقع على الفيس بوك
الأستاذ حسن نصار : أنا عملت موقع وعملت كمان موقع شعرى سميته الركن الشعري أو سميته بالانجليزي القضية ابتدت برضه على سايت صلاح جاهين ، الناس ابتدت تكتب رباعيات واحنا مش بنرد عليها محدش يقدر يرد على القمة صلاح جاهين إنما ياخد منها كلمة ، ياخد منها قافية ويطلع عليها رباعية فأنا إبتديت أكتب لقيت تشجيع شديد من الشباب والشباب عايزين يعنى الشباب شرقان لإن حد يكمله كلمة جادة ، حد يقول له يروح فين ، حد يوجهه إنما إحنا .. إحنا خدنا موقف وابتدينا نرجع لورا ، نعيش الماضى وابتدينا نسيب الشباب لوحده مش لاقى قدوة ، مش لاقى حد يكلمه كلمة كويسة فابتدى يروح مننا
رولا خرسا : بالضبط زى ما بيعملوا دلوقتى يعنى مستنيين أى كلمة عشان خاطر يهزروا يعنى مش مظلومين دايما على فكرة
الأستاذ حسن نصار: لا ما هو مفيش حد ظالم أو مظلوم على طول طبعا النظرة الأحادية دى إنك ما تقدريش تمسكى شاب أو شابة حتى واحد كهل زى تقولى له انت صح على طول أو غلط على طول كلنا فينا الصح والغلط
رولا خرسا : طب الإنترنت بغض النظر عن researches اللى هى الأبحاث اللى بتتعمل لكل الأعمار ولا فيه عمر معين ، سن معين الواحد بيقول خلاص أنا مش هقعد على الإنترنت بيفقد اهتمامه به
الأستاذ حسن نصار : شوفى أنا أعرف أصدقاء شيوخ بقى عدوا الستين لسة عندهم التطلع والرغبة إنهم يدخلوا ويعرفوا وفيه ناس دخلت وخرجت قالت لا ده مش سنى فهى ملهاش علاقة قوى بالسن أد ما لها القدرة على التواصل بالأجيال المختلفة سواء الأجيال اللى تحتك عمريا أو الأجيال اللى عدتك عمريا أنا بطبيعتى معنديش أى مشكلة لا مع دول ولا مع دول أنا بتواصل مع دول وبتواصل مع دول ، أنا مصاحب عواجيز وبحب الشباب فالتواصل عندى ويمكن المرحلة العمرية بتاعتى مساعدانى وثقافتى الإنترنيتية موجودة
رولا خرسا : أيوة بس ده مش بيأثر على علاقاتك الاجتماعية يعنى مش الإنترنت بشكل عام بيأثر على علاقات الناس ببعض
الأستاذ حسن نصار : بصى كل ما التقنية بتتطور مش فى الإنترنت بس فى أى حاجة بتأثر على الحياة الاجتماعية نرجع 100 سنة لورا قبل التليفزيون وقبل الراديو وقبل السينيما كنا بنروح نزور بعض فى البيوت من غير حتى ما نتكلم فى التليفون ، القضية هنا بتختلف زى ما بتكسبى حاجة أدامها بتكسبى كفاءة وجودة بتفقدى حاجة قصادها الكلام ده مش على الإنترنت ، ده على الإنترنت وعلى البلاي ستيشن وعلى التليفزيون
رولا خرسا : فيه ناس مدمنين بلاىستيشن ده حقيقى آه
الأستاذ حسن نصار : بتكسبى حاجة وبتفقدى حاجة قصادها إنما الناتج المعرفى بقى ناتج هام جدا لإنه انت بتشوفى لما كنا بنقرا فى كتب التراث وأمهات الكتب تلاقى العلامة الشيخ حسن النواوى قرأ 40 كتاب فى حياته وعددهم.. وعدد إيه ..وإيه يعنى كاتب فى الحواشى أنا قريت دول دلوقتى كم المعارف غير طبيعى وحتى القدرة اللى احنا شفناها يمكن فى موسوعية القراءة ما بقتش متاحة دلوقتى يعنى الناس من كتر المعارف لازم تتخصص فى موضوع معين عشان تجيده فالكم الهائل من المعرفة المتاحة على الإنترنت وسهولة البحث على الإنترنت كمان.. إنت الأول كنت لما تتزنقى فى كلمة ...دلوقتى حتى المعاجم ، معاجم اللغة العربية كلها موجودة على الإنترنت بجرة القلم بتكتبى الجذر بيطلع لك المحيط وتاريخ المحيط ، تجيب لك كل المعاجم فالقضية إنك بتكسبى حاجة وبتخسرى قصادها حاجة تانية طبعا بتفقدى لها تأثيرات اجتماعية ضارة إنما الكسب قصادها إذا كنا بنتكلم عن عالم بيتحول إقتصاديا يبحث عن النمو ما أداموش غير كده لازم نتنافس ولازم نرفع من كفائتنا ولازم ونتعلم ، فأنا مؤمن إن حتى الشباب اللى واخدها هزار فى وقت من الأوقات هتلاقى العملية ماينفعش هزار لازم يبذل جهد مضاعف عشان يطلع وعشان يرتقى بمستواه كده كله حيقع
رولا خرسا : أستاذ حسين نصار شكرا جزيلا لك
الأستاذ حسين نصار : ميرسى جدا
رولا خرسا : كشف موقع جوجل الشهير المتخصص فى البحث على شبكة الإنترنت إن الألمان والنمساويين من أكتر الناس بحثا عن كلمة هتلر وكتير من أستراليا والمملكة المتحدة أكتر استخداما لكلمة نازى ، أما المصريين والهنود والأنراك فهم يتصدرون قائمة مستخدمى جوجل فى البحث عن الجنس وأكثر الدول بحثا عن كلمة جهاد هى المغرب بعد كدةإندونيسيا بعد كده باكستان فى التقرير اللى جاى قعدنا مع شاب فى نت كافيه وشفنا هو بيعمل إيه
أحد أصحاب نت كافيه : أكبر موقعين تلاقى جيل الشباب كله يعنى عايش عليه أو عايش فيه موقع الهايد فايف دوت كوم ( hide five.com) وده كان يعنى هو دلوقتى فقد الشهرة بتاعته قوى ، فيه سايد تانى إسمه فيس بوك دوت كوم ( face book .com ) ده مجتمع كبير جدا فيه ناس من كل البلاد العربية أو الأوروبية ، مجتمع الناس بتتقابل فيه بتعرف بعض ممكن بعد كده يتقابلوا بيعرض صوره وبيعرض بياناته والناس بتعرف بعض أكتر من خلاله أكتر هم حتى ممكن يتقابلوا وجها لوجه وبيتكلموا مع بعض ، إنترنت الشات هنتكلم عليها وهنقارن ما بين الشاتس فى الوطن العربى انتشرت بكثرة بنقارن بينها وبين المواقع الموجودة فى أمريكا وأوروبا طبعا المقارنة مش هتبقى لصالحنا ، احنا عندنا هنا مجرد الشات صداقة وانس إزاى ولد بيتعرف على بنت لكن فى أوروبا وأمريكا بنلاقى الشات نفسه متقسم سياسة ودين ورياضة واقتصاد وأعمال الناس بتخش بتنقل خبراتها بتتكلم فى مواضيع كثيرة بتفيد نفسها وبتخرج مكتسبة خبرات ومعلومات ، نسبة كبيرة من استخدام النت فى الوطن العربى شباب دخل فى الموضوع طبعا كبار السن دلوقتى أو سن الوسط لكن الشباب هم اللى محتكرين يمكن دلوقتى بقى فيه جيل أصغر يعنى بقينا نشوف ناس 7 سنين و6 سنين حتى بيستخدموا الإنترنت فائق المهارة استخدامهم فى الأول بيبقى صالح لغاية ما بيبدأ يتعمق قوى فى الإنترنت ويبدأ يجذبه الإعلانات اللى بنتكلم عليها بتبقى بقى بيتحول أفكاره سواء إذا كان هو تربيته سليمة فبيقدر يقاوم وبيكمل فى أعمل صالحة وبنلاقى شباب بيعرضوا أفكارهم وبيعرضوا خبراتهم بيتسخدموه استخدام كويس جدا على عكس شباب تانية ضعاف ، بيئة مش كويسة فسهل جدا خداعه وبيبدأ ينغمس فى الأعمال غير الصالحة وفى المواقع الإباحية ، لعبة الموت دى لعبة اشتهرت جدا فى فترة من الزمن الحمد لله يعنى انقرضت دلوقتى لكن هى النت ساعد على انتشارها ، الناس اتقابلت ، اتعرفوا على بعض أكتر ، اتفقوا يتقابلوا وبقى فيه مجتمعات منها كتير اتنقلت من الغرب لمصر تقليد أعمى ، اشتهرت لعبة الموت إن هى عبارة عن مجموعة بيجربوا لحظات الموت لكن للأسف إن هى ساعات بتؤدى فعلا للموت الدول حست بخطورتها برة فسنت قوانين كتيرة للقضاء عليها إتمسحت مواقعهم كلها من على الإنترنت الحمد لله ساهم كتير قوى إنها تنقرض لكن فيه أمثلة كثيرة شبه لعبة الموت ممكن النت يساعد على انتشارها لإن هو مجتمع كبير قوى ممكن أى حد يوصل ويتقابل ويتفقوا على أى حاجة بخطورة لعبة الموت
رولا خرسا : دكتورة رشا عبد الله حضرتك حاصلة على درجة الدكتوراه بتاعتك على الإنترنت وتأثيره ، الدراسة عملتيها على كام بلد عربى وإيه اللى خلاكى تعملى الدراسة ، إيه اللى طلعتى به من الدراسة
الدكتورة رشا عبد الله : هى الدراسة أنا طول عمرى مهتمة بتكنولوجيا المعلومات عموما من قبل الإنترنت كان حتى فيه شبكة اسمها بيتنت كان ناس قليلة قوى اللى كانت بتستخدمها بس من أيام ما كنت فى الجامعة ، من ايام ما كنت طالبة يعنى اياميها بيتنت دى دخلت مصر وكانت الفكرة نفسها عاجبانى قوى إن ممكن حد يقعد فى بلد ويبعت رسالة لحد وفى ثانية واحدة الشخص اللى بيفصله عنا قارات توصله الرسالة دى فى وقت كان الكلام ده من 15 ، 20 سنة كان عشان نبعت جواب لواحد فى أمريكا ما كنتش ضامنة الجواب ده هيوصل والا لا بعدها ب3 أسابيع أتصل أشوف الرسالة وصلت والا لسه بعديها بشهر على ما آخذ الرد فكانت فكرة إن الاتصال سيختلف جذريا كانت فكرة مثيرة جدا بالنسبة لى يعنى فإبتديت أهتم بالموضوع من ساعتها ويعنى جاء وقت إنى أعمل رسالة الدكتوراه بتاعتى كنت فى أمريكا يعنى حتى أيامها ، فى ميامى فى جامعة ميامى يعنى بالنسبة لى كان إختيار الموضوع كان واضح جدا وسريع جدا أنا كنت عايزة أعمل حاجة لها علاقة بالموضوع ده
رولا خرسا : وكملتى واهتمامك لغاية النهاردة منصب على الموضوع ده
الدكتورة رشا عبد الله : آه الحمد لله عملت كتابين عن الموضوع بعد ما رجعت من امريكا وأبحاث علمية كتيرة فى مجالات دولية والحمد لله
رولا خرسا : طيب لو اتكلمنا عن مصر تأثير الإنترنت على الشباب فى مصر ، على العلاقات الأسرية ، على الناس إزاى؟
د / رشا عبد الله : هو للأسف طبعا يعنى عشان نتكلم كلام علمى هو مفيش دراسات اتعملت ميدانية كفاية انها تغطى الموضوع ده بطريقة علمية يعنى المجهودات اللى أنا بعملها واللى أى حد تانى بيعملها بيبقى مجهود فردى يعنى بيدى بعض التلميح لاتجاهات معينة إنما الحقيقة إحنا محتاجين لمجهود بحثى ضخم عشان بتمويل من حتة معينة عشان نقدر نعمل حاجة تغطى الموضوع بطريقة فعلا علمية طبعا هو فيه اتهامات كتير بتوجه للشباب منها مثلا إن الشباب بيقعد على الإنترنت يعمل شاتينج وما بيبصش على أى حاجة تانية
رولا خرسا : أو ممكن داونلود
الدكتورة رشا عبد الله : أو داونلود للمزيكا وحاجات من دى ، أنا ضد الموضوع ده الحقيقة يعنى أنا البحث العلمى اللى أنا عملته أو كل الأبحاث اللى بتتعمل سواء من الاتصالات أو معلومات مجلس الوزراء برضه يعنى الحقيقة مفيش حاجة فى الأبحاث العلمية بتقول إن الواد بس بيعمل شاتينج على الإنترنت فانا مش عارفة احنا جايبين الصورة دى منين
رولا خرسا : يعنى بيعملوا حاجة تانية
الدكتورة رشا عبد الله : آه بيعمملوا حاجات تانية كتير
رولا خرسا : إسألى الجمهور اللى قاعد اللى بيعمل حاجة تانية يرفع إيده ولا حد ، ده ولا حد بيعمل حاجة تانية ، ولا حد رفع إيده ، لا واحد كده بتردد
الدكتورة رشا عبد الله : انتوا كلكوا طيب بتخشوا على الإنترنت ، وكل الناس بتخش تعمل شاتينج بس لا أهم
رولا خرسا : بيقول لك كله شاتينج بس
الدكتورة رشا عبد الله : لا ده انتوا جايبينهم مختارينهم بقى
رولا خرسا : لا والله صدفة بحتة بتعمل حاجات تانية داونلود مزيك صح ، إيه بتصمم موقع طب والله كويس واحد أهه استثنى
الدكتورة رشا عبد الله : لا هو مش استثنى أنا هقول لك نتكلم فى الموضوع بطريقة علمية عشان ما نبقاش
رولا خرسا : حضرتك عاوزة تقولى الكلام ده يصادفك أوكيه
الدكتورة رشا عبد الله : لا والله أنا بحب الشباب أنا منهم
رولا خرسا : لا انت عاوزة تكسبى الجمهور ناحيتك
الدكتورة رشا عبد الله : لا هى الفكرة بقى إن الكلام ده مش موثق الفكرة ان أى تكنولوجيا جديدة يعنى احنا أول ما جبنا الكمبيوتر فى البيت من المصريين فأول حاجة جاب كمبيوتر فى البيت يعمل إيه ، يلعب جيمز فهو دايما أول حاجة بتيجى جديدة أول ما التكنولوجيا والكلام ده كله ده مش فى العالم كله مش فى مصر بس ده اتجاه عالمى يعنى لما بتنزل حاجة جديدة أول حاجة الناس بتعملها إنها تلعب بها يعنى بياخدوها كلعبة
رولا خرسا : لسة لحد دلوقتى بيلعبوا كوتشينة اسمها إيه
الدكتورة رشا عبد الله : السوليتير آه بس بيشتغلوا كمان يعنى اللى عنده كمبيوتر دلوقتى لو حضرتك عملتى دراسة على استخدامات الكمبيوتر نسبة لعب السوليتير هتلاقيها أقل من استخدامه فى حاجة تانية أكيد حاجة يعنى ضئيلة نسبيا فهو الفكرة ان حتى الشباب دلوقتى بيقبل على الإنترنت حتى لو كان بيعمل شاتينج لفترات طويلة ، بيعمل داونلود
رولا خرسا : يمكن مراحل عمرية
الدكتورة رشا عبد الله : هى طبعا المراحل العمرية دى حاجة بس الحاجة التانية ما هو بعد شوية هيزهق من الشاتينج هيفضل يعمل شاتينج طول عمره ما ينفعش ..هو بتبقى حاجة بتخليه ياخد على الميديا ، التكنولوجيا الجديدة وبعد كده هو ممكن يكتشف هى ممكن توري له أيه تانى يعنى مرة من المرات ياخد معلومات عن الشاتينج سايت وندخله على حاجة تانية ، ندخله على نيوز أو على أى موقع تانى أو معلومات إخبارية أو أى حاجة بيكون هو بيدور عليها ، احنا عندنا حاجات كتير طالعة من مصر مثلا فيه المدونات دلوقتى ده موضوع بلوكس يعنى ده موضوع على فكرة وكالات الإعلامية الأجنبية كلها مهتمة به الشهر ده كانوا عاملين معايا إنترفيو عن الموضوع ده يعنى اقصد إن الموضوع ده وصل لأصداء عالمية محدش حاسس بها
رولا خرسا : طيب خلينا نتكلم عن السيرش ونتكلم بشكل برضه نحاول انا عارفة ان فميش أبحاث علمية متخصصة قوى بس من الصور اللى قريتها إن الشباب فى مصر حتى لما بيعملوا سيرش ما بيعملوش فى حاجات جادة قوى
الدكتورة رشا عبد الله : طيب أنا هقول لحضرتك حاجة البحث اللى عملته كانت main point يعني الحاجة الأساسية اللى فيه إن أنا سألت عن استخدامات الشباب للإنترنت بس هى الفكرة إن فى أى بحث علمى ما ينفعش ياخد حاجة بتفصيل شديد قوى إلا لو كانت التركيز على الحاجة دية بس فبما إن ده أول بحث إتعمل فى العالم العربى فأنا خدته بصورة جينيرالى شوية أو عامى شوية أهم استخدام للإنترنت بالنسبة للشباب بس دول كانوا طلاب جامعة طبعا ما كانوش من كل الأعمار كانوا من فئة طلاب الجامعة فى استخدام الإنترنت كان الحصول على المعلومات ، برضه خلى بال حضرتك إن المعلومات ممكن تكون معلومات على أى حاجة يعنى ممكن يكون معلومات عن كرة القدم أو معلومات عن الباسكيت بول أو معلومات عن ديفيد
رولا خرسا : عن مطر
الدكتورة رشا عبد الله : آه عن أى حد إنما هو البحث عن معلومة موضوع الشاتينج أو التفاعل عبر المحادثات والحاجات دى كلها على الإنترنت كان طبعا بياخد وقت منهم ومهم بالنسبة لهم إنما فى لستة الاهتمامات جه أكشيلى آخر حاجة يعنى فى الأول كان البحث عن معلومة معينة وبعدين الاستكشاف يعنى أنا عيز أكتشف هو فيه إيه فى الدنيا ، إيه الجديد
رولا خرسا : وآخر حاجة الشاتينج برضه عملتى عن تأثير الشاتينج على العلاقات الاجتماعية إيه بقى؟
الدكتورة رشا عبد الله : بصى حضرتك هو لغاية دلوقتى وبرضه دى حاجة عالمية مش بس فى مصر إن احنا مش قادرين نعرف بالضبط هو إيه التأثير لإن هو فيه ناس ، فيه بعض الفئات بتقول إن أنا من ساعة ما أبتديت أعمل كده ، من ساعة ما إبتديت أستخدم الإنترنت وأعمل شاتينج مثلا بقت علاقاتى الأسرية لهم وقت أقل
رولا خرسا : وده حقيقى أنا هقول لك على أولادى بيدخل الأوضة أهلا يا مامى ويدخل الأوضة يقعد على الإنترنت
محرر بالموقع الموحد للهيئة الوطنية للإعلام
تناول الشيخ إبراهيم جاد الكريم عضو مركز الأزهر العالمي للفتوى الالكترونية خلق التواضع، مؤكداً أنه من الأخلاق الإسلامية الرفيعة التي...
وجه الشيخ محمود عويس محمود عضو مركز الأزهر العالمي للفتوى الإلكترونية رسالة هامة للمسلمين حول الاستمرارية في العبادة بعد انقضاء...
وصف الشيخ السيد عرفة عضو مركز الأزهر العالمي للفتوى الإلكترونية ليلة العيد بأنها "ليلة الجائزة" وواحدة من أجمل الليالي التي...
تحدث الشيخ عبد الله سلامة عضو مركز الأزهر العالمي للفتوى الإلكترونية، عبر فيديو ببرنامج "زاد الصائم" على موقع أخبار مصر،...